چىڭگىز ئايتماتوف دەپنە قىلىندى

 ئايتماتوفنىڭ ۋاپاتى مۇناسىۋىتى دۇنيانىڭ خېلى كۆپ ساندىكى دۆلەت باشلىقلىرى قىرغىزىستان پرېزىدېنتى قۇرمانبېك باقىيېۋقا تېلېگرامما يوللاپ تەزىيە بىلدۈردى. قىرغىزىستان ھۆكۈمىتى بۇ كۈنى ئاممىۋى ماتەم پائالىيەتلىرى ئېلىپ باردى.

بۇلارنىڭ ئىچىدە سابىق سوۋېت ئىتتىپاقىدىن ئايرىلىپ چىققان دۆلەتلەردىن رۇسىيە، ئەرمېنىيە، ئۇكرائىنىيە، قازاقىستان ۋە باشقىلاردىن باشقا يەنە فرانسىيە، گېرمانىيە قاتارلىق ياۋروپا دۆلەتلىرىنىڭ رەھبەرلىرىمۇ تەزىيەنامە ئەۋەتكەن.
 
موسكۋادا ياشايدىغان سابىق سوۋېت ئىتتىپاقى پرېزىدېنتى مىخائىل گورباچېۋ چىڭگىز ئايتماتوفنىڭ يېقىن دوستى بولۇش سۈپىتى بىلەن ئۇنىڭ ۋاپاتىغا قايغۇرۇپ مەخسۇس تەزىيەنامە ئېلان قىلغان. قازاقىستان پرېزىدېنتى نۇرسۇلتان نازاربايېف، ئۆزبېكىستان پرېزىدېنتى ئىسلام كەرىموف، ئەزەربەيجان پرېزىدېنتى ئىلھام ئەلىيېف ۋە تۈركىيە باش مىنىستىرى تايىپ ئەردوغان، تاتار پرېزىدېنتى مىنتەمىر شەمىيېف قاتارلىقلار ئايتماتوفنىڭ ۋاپاتىنى پۈتۈن تۈرك خەلقلىرىنىڭ قايغۇسى سۈپىتىدە قارايدىغانلىقىنى بىلدۈرۈشكەن.
 
رۇسىيە پرېزىدېنتى دىمىترىي مېدۋېدېۋ بىلەن باش مىنىستىر ۋلادىمىر پۇتىن بىرىنچى بولۇپ، تەزىيەنامە يوللىغانلار بولۇپ ھېسابلىنىدۇ.