فرانسىيە پرېزىدېنت ئىشخانىسىنىڭ ئاشكارىلىشىچە، ساركوزىي بىلەن جاۋ جىنجۈن سۆھبەت جەريانىدا يەنە، يېقىندا يۈز بەرگەن تىبەتتىكى ۋەقەلەر ۋە بېيجىڭ ئولىمپىك مۇسابىقىسى ئۈستىدە سۆھبەت ئېلىپ بارغان.
فرانسىيە خىتاي دائىرىلىرىنى تىبەت روھانىي داھىسى بىلەن سۆھبەت ئۆتكۈزۈشكە ئۈزلۈكسىز تەۋسىيە قىلىپ كېلىۋاتقان دۆلەت بولسىمۇ، لېكىن بۇ قېتىم تىبەتتە يۈز بەرگەن ۋەقەلەردىن كېيىن ياۋروپا ئىتتىپاقىدىكى دۆلەتلەر ئىچىدە خىتايغا ئەڭ جىددىي ئاگاھلاندۇرۇش بەرگەن دۆلەتلەرنىڭ بىرى بولۇپ قالغان ئىدى. پرېزىدېنت ساركوزىي، ئەگەر خىتاي تىبەتتىكى باستۇرۇشنى توختاتمىسا بېيجىڭ ئولىمپىك مۇسابىقىسىنىڭ ئېچىلىش مۇراسىمىنى بايقۇت قىلىشتىن چېكىنمەيدىغانلىقىنى ئاگاھلاندۇرغان.
فرانسىيىنىڭ ئىنكاسى خىتاي مىللەتچىلىرىنىڭ غەزىپىنى قوزغاپ، خىتايدا فرانسىيە ماللىرىنى، فرانسىيە مەبلىغى بىلەن مۇناسىۋەتلىك سودا ئورۇنلىرىدىن مال سېتىۋېلىشنى بايقۇت قىلىش ھەرىكىتى قوزغىلىشىغا سەۋەب بولغان. ساركوزىينىڭ جاۋ جىنجۈننى قوبۇل قىلغان مەزگىلى خىتاينىڭ چىڭخەي ئۆلكىسىدە تىبەتلەر يەنە نامايىش قىلىپ، ئاز دېگەندە 140 نەپەر تىبەت پۇقراسى ۋە تىبەت راھىبى قولغا ئېلىنغان مەزگىلگە توغرا كەلدى. بۇ ۋەقە چىڭخەينىڭ توڭرېن ناھىيىسىدە پەيشەنبە كۈنى يۈز بەرگەن.