Пакистанда йоқап кәткән икки нәпәр хитай инженерни талибанлар гөрүгә еливалған
Мухбиримиз гүлчеһрә хәвири
2008.09.02
2008.09.02
Талибанниң дир райониға җайлашқан сиват җилғисидики баянатчиси муслимханниң роейтерс агентлиқи мухбириға " бизниң адәмлиримиз икки хитай инженерни гөрүгә алди, биз һазир уларни қамап қойдуқ " дегән.
Талибанларниң билдүрүшичә, гөрүгә елинғанлар һазирчә аман - исән болуп, буларниң тәқдири талибанларниң информатсийә мәркизи тәрипидин бекитилидиған болуп, улар алмаштуруш шәртини пакистан һөкүмитигә җакарлаш алдида икән.
Хәвәрдә көрситилишичә, бу йоқап кәткән икки нәпәр хитай инженер вә уларға шопур һәм қоғдиғучи болған икки пакистанлиқ җүмә күни пакистанниң афғанистан билән чегрилинидиған, талибанлар һәрикәтлинип йүрүдиған пакистанниң дир дегән қәбилә районида алақә үскүнисини ремонт қилип қайтиш йолида гөрүгә елинған.
Гөрүгә елинған икки нәпәр хитай инженер хитай көчмә хәвәрлишиш ширкитиниң хадимлири болуп,пакистан һөкүмити хитайдин әвәтилгән хадимларниң бихәтәрликигә мәхсус адәм аҗритип қоғдап келиватқан болсиму, уларниң йоқап кетиш, гөрүгә елиниш вәқәлири йүз берип турмақта.
Бу пакистанда хитай инженерлириниң иккинчи қетим йоқап кетиши болуп, 2004 - йили өктәбирдә икки нәпәр хитай инженери җәнубий вәзиристан қәбилә районида талибанлар тәрипидин гөрүгә елинип қутқузуш һәрикити җәрянида уларниң бири өлгән.