Җон микейн америка җумһурийәтчиләр партийисиниң президент намзатлиқини қобул қилди

 Америка кеңәш палата әзаси җон микейн қурултайниң йепилиш мурасимида сөз қилип, 11 ‏ - айдики америка президент сайлимиға чүшидиған җумһурийәтчиләрниң намзатлиқини қобул қилди. Буниңдин бир күн аввал аляска валиси сара пейлин җумһурийәтчиләрниң муавин президент намзатлиқини қобул қилип, җумһурийәтчиләргә илһам бәргән иди.

Микейнниң йепилиш мурасимида сөзлигән нутуқи қурултайниң кәйпиятини юқири пәллигә көтәрди. У президент намзатлиқини қобул қилғанлиқини җакарлаш билән биргә, өзиниң иқтисад, ениргийә вә дөләт бихәтәрлик сияситигә даир көз қарашлирини тонуштурди шундақла әгәр өзи сайланса җумһурийәтчиләрниң вашингтондики мәвҗүт сияси қурулмини өзгәртидиғанлиқини билдүрди. У йәнә өзиниң ташқи сияситини шәрһилиди.

Микейн ташқи сиясәткә аит баянида хитайни тилға алмиған болсиму, лекин русийиниң грузийигә һуҗум қилғанлиқини әйиблиди шундақла өзиниң бу йилқи сайламда демократлар намзати барак обамани мәғлуп қилидиғанлиқиға ишәнчиси камил икәнликини билдүрди.

Җон микейн америка дөләт мәҗлисидә хитайни кәскин тәнқид қилидиған кеңәш палата әзалириниң бири болуп кәлгән. Лекин униң пәйшәнбә күнки қурултай нутуқида хитайни тилға алмиғанлиқи кишиләрниң диққитини қозғиған болуп, көзәткүчиләр бу америка - русийә мунасивитиниң грозийә мәсилиси түпәйли җиддийлишип кәткәнлики билән мунасивәтлик болуши мумкин, дәп қаримақта.