Jon mikéyn amérika jumhuriyetchiler partiyisining prézidént namzatliqini qobul qildi

 Amérika kéngesh palata ezasi jon mikéyn qurultayning yépilish murasimida söz qilip, 11 ‏ - aydiki amérika prézidént saylimigha chüshidighan jumhuriyetchilerning namzatliqini qobul qildi. Buningdin bir kün awwal alyaska walisi sara péylin jumhuriyetchilerning mu'awin prézidént namzatliqini qobul qilip, jumhuriyetchilerge ilham bergen idi.

Mikéynning yépilish murasimida sözligen nutuqi qurultayning keypiyatini yuqiri pellige köterdi. U prézidént namzatliqini qobul qilghanliqini jakarlash bilen birge, özining iqtisad, énirgiye we dölet bixeterlik siyasitige da'ir köz qarashlirini tonushturdi shundaqla eger özi saylansa jumhuriyetchilerning washin'gtondiki mewjüt siyasi qurulmini özgertidighanliqini bildürdi. U yene özining tashqi siyasitini sherhilidi.

Mikéyn tashqi siyasetke a'it bayanida xitayni tilgha almighan bolsimu, lékin rusiyining gruziyige hujum qilghanliqini eyiblidi shundaqla özining bu yilqi saylamda démokratlar namzati barak obamani meghlup qilidighanliqigha ishenchisi kamil ikenlikini bildürdi.

Jon mikéyn amérika dölet mejliside xitayni keskin tenqid qilidighan kéngesh palata ezalirining biri bolup kelgen. Lékin uning peyshenbe künki qurultay nutuqida xitayni tilgha almighanliqi kishilerning diqqitini qozghighan bolup, közetküchiler bu amérika - rusiye munasiwitining groziye mesilisi tüpeyli jiddiyliship ketkenliki bilen munasiwetlik bolushi mumkin, dep qarimaqta.