Дуня кишилик һоқуқни көзитиш тәшкилати:"хитай тйәнәнмен мәһбуслирини қоюп бериши керәк"

Дуня кишилик һоқуқни көзитиш тәшкилати бүгүн мәхсус баянат елан қилип, хитайни тйәнәнмен вәқәсигә четишлиқ мәһкумларни олимпиктин аввал қоюп беришкә чақирди.
Мухбиримиз шөһрәт һошур хәвири
2008-06-02
Share

 Бүгүн дуня кишилик һоқуқни көзитиш тәшкилати мәхсус баянат елан қилип, хитайниң олимпик башлиништин бурун, тйәнәнмен вәқәсигә четилип қолға елинған мәһбусларни қоюп беришини тәләп қилди. Баянатта, нөвәттә хитайда тйәнәнмен вәқәси мәһкумлиридин 130 киши барлиқи, буларни олимпиктин авал қоюп бериш керәклики, шу чағдила хитайниң олимпикни тапшуривелишта қилған вәдисигә әмәл қилған болидиғанлиқи билдүрүлди.

Бирләшмә агентлиқниң хәвәр қилишичә, түнүгүн йәни 1 ‏ - июн күни хоңкоңдики 600 кишилик бир гуруппа, 4 ‏ - июн тйәнәнмен вәқәсиниң 19 ‏ - йиллиқини хатирилигән. Хатириләш паалийити хоңкоң бағчисидин һөкүмәт бинасиға қарап үн - тинсиз йүрүш шәклидә давам қилған.

Паалийәтчиләр чекилиригә лата бағлап, 4 ‏ - июн тйәнәнмен вәқәсидә қурбан болғанларға вә сичүәндики йәр тәврәштә қаза тапқанларға һөрмәт билдүргән. Лозункиларда " 4 ‏ - июн вәқәсигә қайта баһа берилсун" дегән тәләп әкс әттүрүлгән. Хатириләш паалийитиниң тәшкиллигүчилиридин Richard Tsoi бирләшмә агентлиқиниң соаллириға җаваб берип мундақ дегән: " сичүәндә йәр тәвриди, нурғун кишиләр өлди. Апәткә ярдәм бериш демәк, демократийә тәлипини тохтитиш болмаслиқи керәк; апәттин қутқузуш демәк, парихорлуққа қарши турушни тохтитиш болмаслиқи керәк."

4 ‏ - Июн һәрикитиниң хатирә һарписида йәнә, хитайниң сабиқ дөләт рәһбәрлиридин яң шаңкунниң тйәнәнмен вәқәсидә өлгәнләрниң санини бир шәхсий меһмандарчилиқ сорунида ашкарилап қойғанлиқи һәққидә хәвәр тарқалди. Ройтерисниң бүгүнки хәвиридә билдүрүлишичә, яң шаңкүн өз өйидики бир меһмандарчилиқ сорунида меһманлириға тйәнәнмен вәқәсидә өлгәнләр саниниң 600 дин артуқ икәнликини ашкарилиған.

Ройтерис бу хәвәрни хоңкоңдики кишилик һоқуқ вә демократийә җәмийитиниң исмини ашкарилимиған бир мәнбәгә асасән билдүргән мәлуматиға асаслинип тарқатқан. Хитай һөкүмити бүгүнгә қәдәр тйәнәнмен вәқәсидә өлгәнләрниң санини йошуруп кәлмәктә иди. яң шаңкүн паш қилған юқарқи мәлуматму, униң өлүмидин 10 йил кейин мәтбуатқа ашкариланған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт