Dunya kishilik hoquqni közitish teshkilati:"xitay tyen'enmén mehbuslirini qoyup bérishi kérek"

Dunya kishilik hoquqni közitish teshkilati bügün mexsus bayanat élan qilip, xitayni tyen'enmén weqesige chétishliq mehkumlarni olimpiktin awwal qoyup bérishke chaqirdi.
Muxbirimiz shöhret hoshur xewiri
2008-06-02
Share

 Bügün dunya kishilik hoquqni közitish teshkilati mexsus bayanat élan qilip, xitayning olimpik bashlinishtin burun, tyen'enmén weqesige chétilip qolgha élin'ghan mehbuslarni qoyup bérishini telep qildi. Bayanatta, nöwette xitayda tyen'enmén weqesi mehkumliridin 130 kishi barliqi, bularni olimpiktin awal qoyup bérish kérekliki, shu chaghdila xitayning olimpikni tapshuriwélishta qilghan wedisige emel qilghan bolidighanliqi bildürüldi.

Birleshme agéntliqning xewer qilishiche, tünügün yeni 1 ‏ - iyun küni xongkongdiki 600 kishilik bir guruppa, 4 ‏ - iyun tyen'enmén weqesining 19 ‏ - yilliqini xatiriligen. Xatirilesh pa'aliyiti xongkong baghchisidin hökümet binasigha qarap ün - tinsiz yürüsh sheklide dawam qilghan.

Pa'aliyetchiler chékilirige lata baghlap, 4 ‏ - iyun tyen'enmén weqeside qurban bolghanlargha we sichüendiki yer tewreshte qaza tapqanlargha hörmet bildürgen. Lozunkilarda " 4 ‏ - iyun weqesige qayta baha bérilsun" dégen telep eks ettürülgen. Xatirilesh pa'aliyitining teshkilligüchiliridin Richard Tsoi birleshme agéntliqining so'allirigha jawab bérip mundaq dégen: " sichüende yer tewridi, nurghun kishiler öldi. Apetke yardem bérish démek, démokratiye telipini toxtitish bolmasliqi kérek؛ apettin qutquzush démek, parixorluqqa qarshi turushni toxtitish bolmasliqi kérek."

4 ‏ - Iyun herikitining xatire harpisida yene, xitayning sabiq dölet rehberliridin yang shangkunning tyen'enmén weqeside ölgenlerning sanini bir shexsiy méhmandarchiliq sorunida ashkarilap qoyghanliqi heqqide xewer tarqaldi. Roytérisning bügünki xewiride bildürülishiche, yang shangkün öz öyidiki bir méhmandarchiliq sorunida méhmanlirigha tyen'enmén weqeside ölgenler sanining 600 din artuq ikenlikini ashkarilighan.

Roytéris bu xewerni xongkongdiki kishilik hoquq we démokratiye jem'iyitining ismini ashkarilimighan bir menbege asasen bildürgen melumatigha asaslinip tarqatqan. Xitay hökümiti bügün'ge qeder tyen'enmén weqeside ölgenlerning sanini yoshurup kelmekte idi. Yang shangkün pash qilghan yuqarqi melumatmu, uning ölümidin 10 yil kéyin metbu'atqa ashkarilan'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet