Хитай билән русийә ядро келишими имзалап, америкиниң башқурулидиған бомба мудапиә пиланини тәнқид қилди
Мухбиримиз әркин хәвири
2008.05.23
2008.05.23
Русийә келишимдики бир милярд долларниң йеримини хитайға ядро йеқилғу қоюқлаш әслиһәси қуруп беришкә сәрп қилип, қалған 500 милйон долларға хитайни йерим қоюқландурулған уран билән тәминләйдикән. Мәзкур келишим русийиниң хитай ядро санаитидики ролини күчәйтиду, дәп қаралмақта.
Икки дөләт рәһбири җүмә күни қошма баянат елан қилип, америкиниң йәр шари башқурулидиған бомба мудапиә системиси қуруш пилани " истратегийилик тәңпуңлуқ вә муқимлиққа яки қирғинчи қоралларни контрол қилиш йолидики хәлқара тиришчанлиққа пайдисиз " дәп көрсәтти. Хитай дөләт рәиси ху җинтав ахбарат елан қилиш йиғинида, "медведевниң тәхткә чиққандин кейин тунҗи чәтәл зияритини хитайда елип барғанлиқини махтап, " бу зиярәт бизниң истратегийилик шериклик мунасивитимизни илгири сүридиғанлиқи, йеңи пәллигә көтүридиғанлиқиға ишинимән ' дәп сөзлиди. Медведев болса " бизниң мунасивитимиздә ақсақлиқниң болмаслиқи наһайити муһим " дәп әскәртиду.
Лекин русийә комерсант гезитидә җүмә күни елан қилинған "истратегийилик мәсилиләр ' дегән мавзудики бир мақалидә, русийиниң хитай билән болған достлуқи енергийә вә қорал - ярақ һәмкарлиқидики ихтилаплар түпәйлидин тәһдиткә учраватқанлиқини язди.
Мақалидә " шәрқий себир - тинч окян нефит турубисиниң тармиқи шүбһә астида қалғанлиқи ", русийә, хитайниң 38 данә һәрбий транспорт айрупилани сетивелиш пиланиниң йоққа чиққанлиқидин хапа икәнликини илгири сүргән.