Yawropa ittipaqi rusiye - gruziye mesilisi heqqide jiddiy yighin chaqiridu

Yawropa ittipaqi düshenbe küni rusiye - gruziye mesilisi jümlidin rusiyining jenubiy assétiye, abxaziyidin ibaret ikki jumhuriyetning musteqilliqini étirap qilish mesilisini muzakire qilip, rusiyige qandaq mu'amile qilish hemde rusiye bilen qandaq munasiwet ornitish heqqide jiddiy yighin chaqiridu.
Muxbirimiz ümidwar xewiri
2008.08.31

  Rusiyining abxaziye bilen jenubiy ossétiyining musteqilliqini étirap qilishi bilen xelq'ara jem'iyetning jümlidin yawropa ittipaqining ghul - ghulisi kücheygen bolup, yawropa ittipaqi burunla rusiyining jenubiy ossétiyege esker kirgüzüshini tajawuzchiliq bilen eyibligen hemde moskwa bilen tiblis arisida urush toxtitish kélishimu tüzüshte aktip rol oynighan idi.

En'giliye bash ministiri brown yawropa ittipaqining rusiye bilen bolghan munasiwitini tüptin qayta oylinish kérek, rusiyining énérgiye arqiliq yawropaning gélidin boghushigha yol qoymasliq kérek dep tekitligen.

Gruziye mesilisi sewebidin rusiye nato bilen bolghan hemkarliqnimu toxtatqanliqini jakarlighan hetta rusiye siyasetchiliri arisida rusiye yawropani gaz we néfit bilen teminleshni toxtitish kérek deydighan pikirlermu meydan'gha chiqqan. Chünki, rusiye yawropani teb'iy gaz we néfit bilen teminleydighan asasliq dölettur.

Rusiyining abxaziye we jenubiy assétiyining musteqilliqini étirap qilishi amérikiningmu tenqidige uchrighan bolup, hazirghiche héch qandaq dölet bu ikki memliketni étirap qilmighan. Bu ehwal rusiyining gherb bilen bolghan munasiwetlirini soghuqlashturmaqta.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.