Teywen yazghuchisi bo yang ependining "rezil junggoluqlar" dégen edebiy mirasi hazir dunyada qedirlenmekte

B b s ning bayan qilishiche, teywen yazghuchisi bo yang ependi 1980 ‏ - yillarda yézip chiqqan "rezil junggoluqlar" dégen bir edebiy eser eyni waqitta bir ewlad ademge qattiq tesir qilipla qalmay, belki yéqinda bo yang ependi wapat bolghandin kéyin, bolupmu hazirqidek tibet, Uyghur mesilisi xelq'araliship, olimpik mesh'ili mesilisi buyiche yüz bergen pikir ixtilapida, bo yang ependining "rezil junggoluqlar" dégen edebiy mirasidiki achchiq tenqidlerning qimmiti téximu östi.

Xewerde bayan qilinishiche, bo yang ependi "rezil junggoluqlar" dégen esiride, tarixi xatirilerdiki sansiz delillerge asasen, xitaylarni 'pasiq', 'tertipsiz', 'jidelxor' , 'özidiki xataliqni ölgüche étirap qilmaydighan' dep teswirligen, xitayning en'eniwiy medeniyitini bolsa 'komzekte sésitilghan medeniyet' dep körsetken idi.

Eyni zamanda, bundaq delil - ispatliq achchiq tenqidke chong quruqluqtiki kommunist xitay hökümiti chidap toralmighanla emes, belki teywendiki gomindangchilarmu chidashliq bérelmey , bo yang ependini 'kommunist partiyining jasusi' dégen bednam bilen türmige tashlighan idi.
 
Hazir teywendiki teynen uniwérsitétida bo yang ependining edebiy mirasliri körgezmisi bar, bu körgezmige bo yang ependi bir ömür yézip qaldurghan 10 nechche ming parche edebiy bayliq toplan'ghan.