Җуңго банкиси террорчиларға пул оборот қилиш билән әйибләнди

Исраилийидә өзлирини террорлуқниң зиянкәшликигә учриған дәп қарайдиған 100 дин артуқ исраилийилик пәйшәнбә күни хитайниң әң чоң банкилиридин бири болған җуңго банкиси үстидин америка сот мәһкимисигә әрз сунуп, мәзкур банкиниң пәләстин тәшкилатлириға пул оборот қилишни тохтитишини тәләп қилди.
Мухбиримиз әркин хәвири
2008.08.22

 Давагәрләр америкиниң лос - анҗелес районидики сот мәһкимисигә сунған әризнамисидә җуңго банкисиниң пәләстин җаһатчи тәшкилатлиридин хамас вә ислами җиһад һәрикитигә пул оборот қилип, исраилийә даирилириниң пул аборотини тохтитиш тоғрисидики тәләплиригә қулақ салмиғанлиқини илгири сүргән.

Давагәрләрниң адвокати нитсана даршан - лейтнер җуңго банкисини " хамас вә ислами җиһадниң террорлуқ һуҗум елип баридиғанлиқини билип туруп ярдәмдә болған" шундақла мәзкур банкиниң америкидики шөбилири арқилиқ пул оборот қилиши америка қануниға хилап икәнликини тәкитлигән.

Әризнамида, 2004 ‏ - йилдин 2007 ‏ - йилғичә болған арилиқта йүз бәргән һуҗумларниң малийә мәнбәси җуңго банкиси оборот қилған бу пуллардин кәлгәнликини әскәртиду. Әризнамида давагәрләр йәнә, 2003 ‏ - йили июлниң башлири җуңго банкисиниң бу тәшкилатлар үчүн бир қанчә милйон доллар пул аборот қилғанлиқини, бу пулларниң көп қисими оттура шәрқـтин җуңго банкисиниң америкидики шөбилиригә йолланғанлиқи, бу йәрдин гуаңҗудики тармақ банкисиға йөткәлгәнликини баян қилған.

Исраилийә даирилири 2005 ‏ - йили 4 ‏ - айда хитай җ х министирлиқи вә мәркизи банкисиниң әмәлдарлири билән көрүшүп, җуңго банкисиниң пәләстин тәшкилатлириға пул аборот қилишни тохтитишни тәләп қилған иди. Әризнамида бу пулларниң ғәрбий қирғақ вә газадики тәшкилат башлиқлириға йоллинип, "террорлуқ һуҗумларни пиланлаш вә елип бериш үчүн ишлитилгән" ликини илгири сүргән. Лекин җуңго банкиси бу мәсилә үстидә һазирға қәдәр пикир билдүрмиди.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.