Веңәндики амминиң наразилиқ һәрикити бастурулди

7 ‏ - Айниң 1 ‏ - күни, хитайда һәр дәриҗилик партийә, һөкүмәт, әдлийә вә һәрбий органлири, хитай коммунистик партийисиниң 87 йиллиқини тәбрикләш үчүн паалийәтләр елип барди. Бу дәл гүйҗу өлкиси веңән наһийисидә йүз бәргән амминиң наразилиқ билдүрүш һәрикити йеңи бастурулған пәйткә тоғра кәлди.

Истансимиз вә башқа ахбарат вастилири игилигән мәлуматлардин қариғанда, бир қанчә күн илгири, веңән наһийисидә бир оттура мәктәпниң қиз оқуғучиси басқунчилиққа учриғандин кейин, өлтүрүлүп ериққа ташливетилгән. Сақчилар өлгүчини өзини өлтүрүвалған дәп һөкүм чиқирип, делони яхши бир тәрәп қилишни тәләп қилған, қизниң ата ‏ - аниси вә савақдашлирини урған. Нәтиҗидә амминиң наразилиқи мәйданға келип, нәччә миңлиған киши наһийилик һөкүмәтни қоршавға алған вә наһийилик сақчи идарисиға от қойған.

Хәвәрләрдин ашкарилинишичә, җинайәт садир қилған гумандарниң йеқин туғқини веңән наһийисиниң әмәлдарлиридин бири икән.
Җәмийәт муқимлиқи вә пат арида өткүзүлидиған олимпик мурасими үчүн, хитай һөкүмити қораллиқ қисим баш қомандани һәмдә нәччә он миңлиған қораллиқ һәрбийни ишқа селип, наразилиқ һәрикитини бастурған.

Сақчи даирилири, амминиң наразилиқидин кейин делони қайтидин бир тәрәп қилидиғанлиқи һәққидә вәдә бәргән.