Сабиқ шаңхәй партком секритари 18 йиллиқ кесилди

Әнгилийә б б с агентлиқиниң хәвиригә асасланғанда, сот чен ляңйүниң 300 миң йүән қиммитидики байлиқини мусадирә қилған болуп, униңға парихорлуқ вә һоқуқидин пайдилинип пара йейиш дегәндәк җинайәтләрни артқан.

Сот мәһкимиси униң җинайи қилмишиниң интайин еғирлиқи, омумниң мүлки, дөләт вә хәлқ мәнпәәтигә еғир зиян кәлтүргәнлики, бирақ, униң җинайитидин пушайман қилип, барлиқ игә болған нәқ пулларни қайтуруп берәлигәнлики үчүн йениклитип җазаланғанлиқини елан қилған.

Хәвәрдә көрситилишичә, мәзкур сабиқ шаңхәй партком секритариниң алған пули 2милйон 400 миң йүән әтрапида болуп, у, иниси чен ляңҗүнниң қанунсиз һалда 600 мо йәрниң ишлитиш һоқуқини қолға кәлтүрүшигә ярдәм қилған. Бирақ, чен ляңйү сотта өзигә артилған бәзи җинайәтләрни қисмән етирап қилсиму, лекин һәммисини биваситә етирап қилмиған.

2006 - Йили чен ляңйүгә мунасивәтлик болған шаңхәй иҗтимаий суғурта делосиға йәнә 20 нәччә юқири дәриҗилик һөкүмәт әмәлдари вә сода - санаәтчиниң четишлиқ икәнликиму билдүрүлгән иди. 7 - Април күни җилин өлкиси суңйүән шәһәрлик оттура сот мәһкимиси шаңхәй иҗтимаий - суғурта делосидики ачқучлуқ шәхсләрдин җаң фамилилик биригә 19 йиллиқ қамақ җазаси һөкүм қилип, униң 1 милярд 300 милйон йүән қиммитидики байлиқини мусадирә қилған.

Чәтәлләрдики хитай демократик көзәткүчилири чен ляңйү мәсилиси һәққидә түрлүк мулаһизиләрни оттуриға қойған болуп, уларниң қаришичә, бу хитай рәһбәрлик қатлимидики җяң земин башлиқ шаңхәй гуруһиға қарши һәрикәтләр, җүмлидин рәһбәрлик қатлимидики ички күрәшләр билән мунасивәтлик икән.