Sabiq shangxey partkom sékritari 18 yilliq késildi

En'giliye b b s agéntliqining xewirige asaslan'ghanda, sot chén lyangyüning 300 ming yüen qimmitidiki bayliqini musadire qilghan bolup, uninggha parixorluq we hoquqidin paydilinip para yéyish dégendek jinayetlerni artqan.

Sot mehkimisi uning jinayi qilmishining intayin éghirliqi, omumning mülki, dölet we xelq menpe'etige éghir ziyan keltürgenliki, biraq, uning jinayitidin pushayman qilip, barliq ige bolghan neq pullarni qayturup béreligenliki üchün yéniklitip jazalan'ghanliqini élan qilghan.

Xewerde körsitilishiche, mezkur sabiq shangxey partkom sékritarining alghan puli 2milyon 400 ming yüen etrapida bolup, u, inisi chén lyangjünning qanunsiz halda 600 mo yerning ishlitish hoquqini qolgha keltürüshige yardem qilghan. Biraq, chén lyangyü sotta özige artilghan bezi jinayetlerni qismen étirap qilsimu, lékin hemmisini biwasite étirap qilmighan.

2006 - Yili chén lyangyüge munasiwetlik bolghan shangxey ijtima'iy sughurta délosigha yene 20 nechche yuqiri derijilik hökümet emeldari we soda - sana'etchining chétishliq ikenlikimu bildürülgen idi. 7 - April küni jilin ölkisi sungyüen sheherlik ottura sot mehkimisi shangxey ijtima'iy - sughurta délosidiki achquchluq shexslerdin jang famililik birige 19 yilliq qamaq jazasi höküm qilip, uning 1 milyard 300 milyon yüen qimmitidiki bayliqini musadire qilghan.

Chet'ellerdiki xitay démokratik közetküchiliri chén lyangyü mesilisi heqqide türlük mulahizilerni otturigha qoyghan bolup, ularning qarishiche, bu xitay rehberlik qatlimidiki jyang zémin bashliq shangxey guruhigha qarshi heriketler, jümlidin rehberlik qatlimidiki ichki küreshler bilen munasiwetlik iken.