Xitay dölet ichi we sirtidiki sezgür dep qarighan intérnét tor betlirini taqiwetti

 Gu'angdungda chiqidighan jenubiy xitay sheher géziti peyshenbe küni, 1 ‏ - awghust künidin bashlap 25 ‏ - awghust künigiche pütün xitay buyiche intérnét tor béketlirini qamal qilishni, 6 olimpik shehiride bolsa 9 ‏ - ayning 20 künige qeder dawamlashturushni qarar qilghanliqini ashkarilidi.

Xewerde yene, xitayning intérnét tor bétining tertipini retke sélish üchün bu charini yolgha qoyghanliqi, bolupmu tor bet arqiliq qanunsiz uchurlarni tarqitish, buning bilen jem'iyet muqimliqigha buzghunchiliq peyda qilish qilmishlirigha qattiq zerbe bérishning nöwettiki muhim mesile ikenliki tekitlen'gen.

Biraq, xelq'ara olimpik komitétining re'isi rogi ependi, xelq'ara jama'et bilen oxshashla öziningmu bu ehwaldin qattiq epsuslan'ghanliqini bildürüp": béyjing olimpik komitétining olimpik mezgilide xelq'ara metbu'atlarning normal pa'aliyet élip bérishigha kapalet béridighanliqi toghrisidiki wedisidin kéyin, intérnét tor betlirini tosup qoyghanliqi méni tolimu ejeplendürdi. Xitayning bu herikitini qet'iy qobul qilghili bolmaydu " dédi.

Roytérs agéntliqining statistikisigha qarighanda, xitay öz ichidiki tor betlerni taqighandin bashqa, xelq'ara kechürüm teshkilati, xongkongdiki alma géziti, kishilik hoquqni közitish teshkilati, erkin waqit géziti, erkin asiya radi'osi, amérika awazi qatarliqlargha a'it tor betler bilen sürgündiki tibet teshkilatining tor bétini pütünley taqiwetken.