Хитайда тарқилишқа башлиған әҗәллик балилар вирусида онлиған бовақ қаза қилди

 Гәрчә һазирға қәдәр бәш миң нәпәр балиниң EV71 типлиқ ентеровирус дәп атилидиған үчәй вируси билән юқумланғанлиқи хәвәр қилинған болсиму, америка авазида нәқил елип көрситишичә, дуня сәһийә тәшкилатиниң хитайда турушлуқ тармиқи мәзкур вирусниң тарқилиш даирисиниң доклат қилинғандин юқири болуши мумкинликини оттуриға қойған.

Хәвәрдә көрситилишичә, дуня сәһийә тәшкилатиниң хитайда турушлуқ вәкили дохтур һанс троедсон, хитайда юқумлуқ кесәл тарқилиш әһваллириниң даим төвәнлитип доклат қилинидиғанлиқини билдүргән һәмдә ентеровируси билән юқумланғанда кесәллик аламәтлириниң көрүнәрлик болмаслиқи сәвәблик йәнә нурғунлиған адәмләрниң бимарни дохтурға көрсәтмәслики сәвәбидинму вирусниң тарқилиш көлимини тоғра мөлчәрлигили болмайдиғанлиқиниму қошумчә қилған.

Мәлум болушичә, мәзкур вируста илгири кейин болуп, 24 бовақ өлгән болуп, буларниң 22 нәпири әнхуй өлкисиниң фуяң шәһиридә, қалған икки нәпири гуаңдуң өлкисидә қаза қилған.

Униңдин башқа , бу вирусқа алақидар пут - қол, еғиз кесәлликлири билән юқумлиниш әһвали хитайниң әнхуй, җеҗяң қатарлиқ өлкилиригә көрүлгән болуп һазир хитай мәмликәт характерлик агаһ болуш һалитигә өткән.

Һалбуки , ентеровирус хитайниң әнхуй, җеҗяң өлкилиригә кәң таралған болсиму, әмма һазирчә мәзкур вирусниң уйғур елидә тарқалғанлиқи мәлум әмәс.