Xitay apet rayonidiki bir milyon 300 ming puqraning tarqaqlashturulush éhtimali barliqini agahlandurdi

 Da'iriler shenbe künidin bashlap myenyang rayonida eger su ambiri gümürülüp chüshse, rayondiki bir milyon 300 ming puqrani qandaq tarqaqlashturush maniwéri élip barmaqchi iken.

Xewerlerge qarighanda xitay herbiy qisimliri béychüen nahiyisining üstün teripidiki tangjyashen kölining süyini éqitidighan qanallarni qazmaqta. Tangjyashen kölining töwen teripidiki yéza - kentlerdin 158 ming adem tarqaqlashturulghan bolup, eskerler béychüen nahiyisini puqralargha taqighan. Lékin shinxu'a agéntliqining bir milyondin artuq puqraning tarqaqlashturulidighanliqigha a'iـt xewiri yerlik qutquzush da'irilirining ret qilishigha uchridi.

Myenyang sheherlik yer tewresh kontrol we qutquzush qarargahining chén pemililik bir emeldari, bir milyon 300 ming ademning tarqaqlashturulidighanliqi toghrisidiki xewer toghra emes, deydu. Chén emeldarning eskertishiche, myenyang wadisidin hazirghiche jem'iy 197 ming adem tarqaqlashturulup bolghan. Myenyang rayoni xitayning eng muhim yadro esliheler bazisi bolup, da'iriler su bésip kétish éhtimali bolghan rayonlardiki yadro we ximiyilik matériyallarni yötkep kétishke tirishmaqta.

Fransiye agéntliqining bu heqtiki bir xewiride, da'irilerning rayondiki 100 ge yéqin konkrét néme ikenliki melum bolmighan yadro eslihelirini jüme küni kechtin burun bixeter jaygha yötkep bolush buyruqi chüshürgenlikini, tangjyashen kölining töwen teripidin 5 ming tonna xeterlik ximiyilik matériyallarni yötkewatqanliqini bildürdi.