«5-ئىيۇل ئۈرۈمچى قىرغىنچىلىقى» نىڭ 15 يىللىقى مۇناسىۋىتى بىلەن ياۋروپا ئەللىرىدە نامايىشلار ئېلىپ بېرىلدى

5-6-ئىيۇل كۈنلىرى «5-ئىيۇل ئۈرۈمچى قىرغىنچىلىقى» نىڭ 15 يىللىقىنى خاتىرىلەش مۇناسىۋىتى بىلەن دۇنيانىڭ ھەرقايسى جايلىرىدا ھەر خىل كۆلەمدە نامايىشلار ئۆتكۈزۈلدى. بىز ئۆرنەك سۈپىتىدە، ياۋروپادىكى 4 شەھەردە ئۆتكۈزۈلگەن نامايىشلار توغرىسىدا مەلۇماتلار بېرىشنى لايىق كۆردۇق.

5-ئىيۇل كۈنى گېرمانىيەنىڭ كارلسرۇخې شەھىرىدىمۇ كۆپلىگەن كىشىلىك ھوقۇق تەشكىلاتلىرىنىڭ ھەمكارلىشىشى، يەرلىك گېرمان ئاھالىسىنىڭ ئىشتىراكىدا نامايىش ئېلىپ بېرىلغان. كارلسرۇخېدىكى ئۇيغۇر زىيالىيسى ئەنۋەر ئەھمەتنىڭ بىلدۈرۈشىچە، بۇ نامايىشقا ئۇيغۇرلاردىن كۆپرەك گېرمانلار قاتناشقان بولۇپ، كارلسرۇخېدىكى ئۇنىۋېرسىتېتنىڭ ئىككى نەپەر پىروفېسسورى «‹شەرقىي تۈركىستانغا ئازاتلىق› دېگەن لوزۇنكىنى بىز كۆتۈرەيلى» دېيىشىپ، ئۆزلىرىنىڭ ئۇيغۇرلارغا ۋە ئۇلارنىڭ كېلەچەكتىكى دۆلىتىگە بولغان ھېسداشلىقلىرىنى نامايان قىلىشقان.

5-ئىيۇل كۈنى نورۋېگىيەنىڭ پايتەختى ئوسلو شەھىرىدىكى پارلامېنت بىناسى ئالدىدىمۇ نامايىش ئۆتكۈزۈلگەن. نورۋېگىيە ئۇيغۇر كومىتېتىنىڭ رەئىسى خەلچەم مەمتىمىن خانىمنىڭ بىلدۈرۈشىچە، «5-ئىيۇل ئۈرۈمچى قىرغىنچىلىقى» نى خاتىرىلەش نامايىشى ئوسلودىمۇ قىزغىن كەيپىيات ئىچىدە داۋام قىلغان.

6-ئىيۇل كۈنى ياۋروپا ئىتتىپاقىنىڭ مەركىزى بولغان بېلگىيە پايتەختى بىريۇسسېلدىمۇ نامايىش ئېلىپ بېرىلغان. بېلگىيە ئۇيغۇر جەمئىيىتىنىڭ رەئىسى ئەكبەرجاننىڭ بىلدۈرۈشىچە، شەھەرنىڭ قايناق سودا مەركىزىدە ئۆتكۈزۈلگەن بۇ نامايىش يەرلىك ئاھالىلەرنىڭ كۈچلۈك دىققىتىنى جەلپ قىلغان.

6-ئىيۇل كۈنى يەنە گوللاندىيەنىڭ ئامستېردام شەھىرىدىكى دام مەيدانىدىمۇ كەڭ كۆلەملىك نامايىش ئېلىپ بېرىلغان. نامايىش مەيدانىدىن زىيارىتىمىزنى قوبۇل قىلغان لاگېر شاھىتى قەلبىنۇر سىدىق خانىمنىڭ بىلدۈرۈشىچە، بۇ نامايىشقا خوڭكوڭلۇقلار ۋە ئىچكى موڭغۇلىيەلىكلەرمۇ ئىشتىراك قىلغان.

5-6-ئىيۇل كۈنلىرى يەنە ياۋروپانىڭ باشقا دۆلەتلىرىدىكى ئۇيغۇرلار مەركەزلىشىپ ئولتۇراقلاشقان شەھەرلەردىمۇ مەخسۇس نامايىشلار ئېلىپ بېرىلغان.