Baqirköy doxturxanisining axbarat xadimi: "Yüsüpjanning ehwali yaxshilinishqa qarap yüzlendi"

Muxbirimiz shöhret hoshur
2020-11-04
Share
yusupjan-emet-dozturxanida.jpg Radiyomiz ziyaritini qobul qilghan we özining xitayning sabiq alahide xadimi ikenlikini ilgiri sürgen, hazir istanbulda qoralliq hujumgha uchrighan yüsüpjan emet doxturxanida. 2020-Yili 2-noyabir, türkiye.
RFA/Shöhret Hoshur

Istanbulda qoralliq hujumgha uchrighan muhajir yüsüpjan emetning salametlik ehwalidiki yüzlinish heqqide muxbirimiz bügün baqirköy doxturxanisidin melumat soridi. Doxturxanining axbarat bayanatchisi yüsüpjan emetning salametlik ehwalining yaxshilinishqa qarap yüzlen'genliki, shunga opératsiye bolümdin mulazimet bölümige yötkelgenlikini bayan qildi. Bügün yene weqening birdin-bir shahiti bolghan sultanjan muxbirimizning ziyaritini qobul qilip, yüsüpjanning oq tégip yerge yiqilghandin kéyinki tunji sözining "Weqeni neq meydandin féysbukqa tarqitish we xitayning süyqestini pash qilish" bolghanliqini tilgha aldi.

Biz istanbulda qoralliq hujumigha uchrighan we nöwette baqirköy dölet doxturxanisida dawaliniwatqan yüsüpjan emetni 3-noyabir chüshtin burun, yeni weqe yüz bérip birqanche sa'ettin kéyin doxturxanining jiddiy qutquzush bölümide ziyaret qilghan iduq. Melum bolushiche, saqchilar tünügün chüshtin kéyindin bashlap, yüsüpjan emetni ziyaret qilish we yoqlashni belgilik derijide chekligen. Shunga biz bügün uning salametlik ehwalidiki yüzlinish heqqide melumat élish üchün baqirköy doxturxanisigha téléfon qilduq. Téléfonimizni qobul qilghan xadim bu heqte doxturxanining axbarat bayanatchisi bilen sözlishishimizni tewsiye qildi. Doxturxanining axbarat bayanatchisi yüsüpjan emetning oqtin zeximlen'gen bir yaridar ikenlikini eskertip, bu heqte melu'amat élish üchün alaqidar hökümet organlirigha iltimas sunushimiz kérekliki we shular ruxset qilghandila, bu heqte melumat béreleydighanliqini éytti. Biz uninggha yüsüpjanning ehwalining alahide ikenlikini eskertip, uningdin héch bolmidi dégende uning hayati bixeterlik ötkilidin ötüp bolghan yaki bolmighanliqi heqqide melumat bérishini soriduq. U bu heqte 10 minuttin kéyin jawab béreleydighanliqini éytti. Qayta téléfon qilghinimizda mezkur bayanatchi yüsüpjan emetning jiddiy qutquzush bölümidin normal dawalash bölümige chiqqanliqi, buni uning salametlik ehwalidiki yaxshinishqa qarap yüzlinish dep atashqa bolidighanliqini bayan qildi. Lékin u yüsüpjanning salametlikining buningdin kéyin toluq eslige kélish yaki kélelmeslik mesilisige hazirche bir néme déyishning téxi baldur ikenlikini eskertti.

3-Noyabirdiki éniqlashlirimiz dawamida bu qoralliq hujum weqesining yüsüpjan emet baqirköydiki bir dostini ziyaret qilip barghanda yüz bergenliki melum bolghan idi. Biz bügün yüsüpjanning ene shu weqe'ege shahit dosti "Sultanjan" ni ziyaret qilduq. Sultanjan weqening bash-axirini bayan qilip ötti.

Melum bolushiche, yüsüpjan oq tégip yerge yiqilghandin kéyin yénida peyda bolghan dosti sultanjan'gha neq meydanni widéyogha élish we uni féysbukta tarqitishni buyrughan. Lékin eyni chaghda téléfoni ishlimigen, uning üstige qanliq sorunni körüp jiddiyleshken sultanjan neq meydandin xewer bérilmigen, peqetla yüsüpjanning téléfoni arqiliq neq meydanni widéyoluq xatirige alghan.

Yuqirida istanbulda qoralliq hujumgha uchrighan yüsüpjan emetning salametlik ehwali we weqening bir qisim neq meydan tepsilati heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet