Erkinlikke sozulghan uzaq yol: qachqundiki hayat (5)

Almasbeg hindistanliq sodigerning yol bashlishi bilen népalgha ötkendin kéyin yene nurghun tekshürüsh ötkelliridin bir - birlep ötüp axiri katmandugha yétip baridu. Shundaq qilip uning muhajirettiki hayati bashlinidu.
Ixtiyariy muxbirimiz qutlan
2013-01-26
Élxet
Pikir
Share
Print
Almasbegning népaldiki b d t ishxanisidin alghan siyasi panaliq guwahnamisi
Almasbegning népaldiki b d t ishxanisidin alghan siyasi panaliq guwahnamisi
RFA/Qutlan


U hindistanliq sodigerning rémontchiliq bilen shughullinidighan tughqinining öyide turup qalidu. Héchqandaq tonushi bolmighan, qolida yéterlik pulimu qalmighan, nege bérip, nede turushi namelum bolghan ehwalda mewhum kélechekni kütüp bir top natonush hindistanliq ishchilar arisida musapirchiliq hayatini bashlaydu.

Almasbeg wetendiki chéghida b d t ning nurghun döletlerde siyasiy musapirlargha yardem qilidighan ishxanilirining barliqini anglighan bolsimu, lékin népaldin ibaret bu yat elde til qiyinchiliqi tüpeyli qandaq qilip bu ishxanini izdep tépishni bilelmeydu. Hindistanliq sodigerdin bu toghriliq yardem bolsimu, lékin umu bilmeydighanliqini éytidu. Amalsiz qalghan almasbeg qandaq qilishini bilmey temtirep qalidu. Hindistanliq sodiger axiri uni bashlap népaldin hindistan'gha ötüp, bihar shtati tewesidiki öz yézisigha élip baridu.

Qachqundiki hayat uni yene bir yat elge élip baridu. U bihar shtatining musulmanlar bilen hindi dinidikiler ariliship yashaydighan bir yézisida 28 künni ötküzidu. Hindistanliq sodigerning a'iliside turup, hindistan musulmanlirining yéza hayatini béshidin kechüridu. Oxshash bolmighan dinlargha étiqad qilidighan hindistan xelqining hayatta inaq - ittipaq ötidighanliqini hés qilidu.

Aridin bir aygha yéqin waqit ötkendin kéyin, hindistanliq sodiger uni bashlap yene népalgha qaytip kélidu. Almasbeg hindistanliq sodigerning katmandudiki tughqining rémontxanisida yene musapirliq hayatini dawamlashturidu. Bir küni hindistanliq sodiger uni katmanduning tamil rayonidiki bir meschitke bashlap bérip imamgha tonushturup qoyidu. Imam uninggha birqanche Uyghur musapirlarning bu yerde yashaydighanliqini éytidu. Bu geptin ilhamlan'ghan almasbeg birqanche kündin kéyin yene héliqi meschitke baridu hemde meschit ichide ikki Uyghur yashning parangliship olturghanliqini köridu. Epsus Uyghur tilida parangliship olturghan bu ikki natonush yash almasbegdin xewpsirep özlirining Uyghur ikenlikidin téniwalidu. Amalsiz qalghan almasbeg rohiy chüshkün halde yene rémontxanigha qaytip kélidu.

Aridin bir qanche kün ötkende a XX isimlik bir Uyghur kishi héliqi ikki neper Uyghur yashni bashlap almasbegni izdep kélidu. Almasbeg ularning yardimi bilen b d t musapirlar mehkimisining katmandudiki ishxanisini izdep tépip, özining siyasiy panahliq iltijasini tapshuridu. Shundin kéyin siyasiy musapirliq salahiyitige érishken almasbeg katmandudiki yéngi hayatini bashlaydu. Lékin iqtisadiy qiyinchiliq hemde kelgüsi üchün chiqish yoli izdesh istiki uni herwaqt izdinishke mejbur qilidu. Axiri nurghun amallar bilen gérmaniyining myunxén shehiridiki Uyghur teshkilatliri bilen alaqilishidu hemde yardem soraydu. Népalgha qéchip chiqqan Uyghurlarning ehwalidin xewer tapqan myunxéndiki dunya Uyghur yashliri qurultiyi ulargha ige chiqidighanliqi heqqide wede béridu.

(Dawami bar)

Toluq bet