Гвәнтанамодин қайтқанда: абабәкри қасимниң бешидин кәчүргәнлири-9

Мухбиримиз қутлан
2014.01.18
guentanamo-turmisi.jpg Гуәнтанамо түрмисиниң сиртқи көрүнүши. 2013-Йили 24-өктәбир.
AFP

Абабәкри қасим қатарлиқ гвәнтанамо түрмисидин қоюп берилгән 5 нәпәр уйғур яш албанийә пайтәхти тиранада өзлириниң йеңи һаятини башлайду. Улар әркинликкә еришип өзлириму ойлап бақмиған ят бир әлдә йеңи һаятини башлиған болсиму, лекин бу улар үчүн қийин җәрян иди.

“гвәнтанамо” дегән тамға һәр вақит уларни йәрлик хәлқ албанлардин айрип туратти. Ғәрб мәтбуатлирида һәр вақит көрүлүп туридиған “террорист” аталғусиниң сайиси уларниң ят әлдики һәр бир қәдимигә соңдишипла йүрәтти.

Улар тәқдиригә тән берип өзлирини қойниға алған бу ят әлни сөйүшкә, униң итаәтмән пуқраси болушқа, албан тилини өгинип өзлиригә лайиқ иш тепип ишләшкә, йеңи аилә қуруп һаятини мәнилик ишларға беғишлашқа тәйяр иди. Вәһаләнки, уларниң албан җәмийитигә сиңип киришигә йилларчә вақитлар кетиду.

Албанийиниң коммунистик система ғулиғандин кейинки техичә әслигә кәлмигән иқтисадий һалити уларниң бу әлдә өз чүшини реаллаштурушқа имканийәт бәрмәйду. Шундақтиму улар пүтүн күчигә тайинип мумкинсизлик ичидин мумкинчилик тепишқа тиришиду. Уларниң тиришчанлиқи, мустәһкәм иман-етиқади шундақла тинимсиз издиниш роһи албан мусулманлирини ахири тәсирләндүриду. Тиранадики мәсчит җамаити әң алди билән уларни өз қойниға алиду. Болупму албанийә дөләтлик телевизийә қанилида улар һәққидә 20 нәччә минутлуқ мәхсус зиярәт филими қоюлғандин кейин албан хәлқиниң уларға  болған қариши пүтүнләй өзгириду.

Улар түркийә вә әрәб әллиридики уйғур аилилириниң қизлири билән тойлишиду. Албанийидә туғулған пәрзәнтлириниң уйғурчә ана тил билән сөзлишиш шараитини өз өйлиридә һазирлайду.

Абабәкри қасим һәр вақит өзиниң уйғурлуқ виҗдани вә мәсулийити билән яшашни унтумайду. У өзлириниң гвәнтанамо түрмисидики алаһидә кәчүрмишлири арқилиқ уйғур мәсилисиниң хәлқараға тонулуши үчүн еғир бәдәлләрни төлигәнликидин пушайман қилмайду, бәлки пәхирлиниду. Йәттә йилдин буян дуняниң һәрқандақ бир йеридин кәлгән мухбирниң зияритини қобул қилишқа тәйяр туриду. Таратқу вә ахбарат васитилири арқилиқ уйғурниң авазиниң дуняға аңлинип турушини издәйду.

Абабәкри қасимниң һекайиси бу йәрдә ахирлашти, әмма у өз сәпдашлири билән балқан йерим арилидики ашу әлдә кәлгүсигә болған үмид билән яшимақта. У өз бешиға кәлгән еғир қисмәтләрниң уйғур хәлқиниң нөвәттики реаллиқиниң бир парчиси икәнликигә, өз бешидин өткүзгән алаһидә кәчүрмишлири арқилиқ милләткә болған мәсулийитини йәниму чоңқур дәриҗидә һес қилғанлиқиға чоңқур ишиниду….

Абабәкри қасим гвәнтанамодин қоюп берилгән 22 нәпәр уйғур қериндишиға вакалитән вәтән туприқини қучақлап яшаватқан вәтәндашлириға шундақла муһаҗирәттики барлиқ уйғур җамаәтчиликигә салам йоллайду!

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.