Gwentanamodin qaytqanda: ababekri qasimning béshidin kechürgenliri - 7

Ababekri qatarliq gwentanamo türmisige qamalghan Uyghur tutqunlar 2004-yilining aldi-keynide resmiy sotlinidu. Ularning sotlinish jeryani nahayiti uzun'gha sozulidu. Köp qétimliq qayta-qayta soraq, tekshürüsh we axirida sotlash arqiliq ularni ikki guruppigha ayriydu. Ababekri qatarliq 5 Uyghurgha deslepki qedemde “Düshmen jengchisi emes” dégen höküm chiqirilidu. Qalghan Uyghurlarning délosi téxiche hel bolmaydu.

Ababekri qatarliq 5 Uyghur gunahsiz dep élan qilin'ghan bolsimu, lékin ularni yenila gwentanamo türmiside tutup turidu. Kéyinche adwokatlarning arilishishi bilen ularni gwentanamodiki türmisidin élip chiqip, anche yiraq bolmighan déngiz boyidiki bir lagérgha yötkeydu. Gunahsiz dep höküm chiqirilghan 9 kishining ichide wetendin chiqqan 5 Uyghur, se'udi erebistanliq bir Uyghur, 2 ereb we afghanistanliq bir özbék bar idi.

Ababekri qatarliqlar gerche gwentanamo türmisidin boshitilip, déngiz boyidiki yéngi lagérgha köchürülgen, xéli köp erkinlikke érishken bolsimu, lékin ular bu yerde yene bir yildek turup qalidu. Amérika terep ularni yerleshtüridighan muwapiq dölet izdeydu.

Aridin bir yildek ötkende tuyuqsizla ababekri qatarliq 5 Uyghurni albaniyege yerleshturidighanliqini uqturidu. Bu xewerdin ular heyran qalidu. Chünki bu besheylenning héchqaysisining albaniye heqqide tüzük chüshenchisi yoq idi.

Axiri ababekri qatarliq 5 Uyghur amérikining herbiy ayropilanigha qachilinip mexpiy halda kubadin albaniyege élip bérilidu.

Kelgüsi heqqide héchqanche teyyarliqi bolmighan 5 neper Uyghur yash tang süzülmigen bir peytte tirana ayrodromigha qon'ghan amérikining herbiy ayropilanidin chüshüp yene bir natonush elning tupriqini desseydu…