Gwentanamodin qaytqanda: ababekri qasimning beshidin kechürgenliri-8

Amérikining herbiy ayropilani tirana ayrodromigha qon'ghinida adre'atik déngizi boyidiki bu kichikkine dölet téxi tün qarangghuluqida idi. Qoralliq eskerlerning himayiside herbiy ayropilandin yerge chüshken gwentanamo tutqunliri alliqandaq bir qorqunch ichide etrapqa ensiz qaraydu. Hemme nerse hetta hawamu ular üchün yat tuyuluwatatti. Shu haman ababekrining kallisidin bir xiyal yalt qilip kechti…

Bu albaniyimu yaki béyjingmu?

Uzun ötmey birqanche pikap ayropilanning qéshigha toxtap, uningdin kastum-burulka kiyip galstuk baghlighan natonush ademler chüshidu. Ularning boy-besti we sirtqi qiyapitige qarap ababekri qatarliq Uyghur yashliri yenikkine tinidu, emma ular chirayliridiki jiddiychiliktin peyda bolghan gheyri-normal keypiyatini yoshuralmaydu.

Gheyriy tildiki salamlishishlar we addiyla élip bérilghan ötküzüp bérish we ötküzüwélish resmiyitidin kéyin ular özlirining xitaygha emes, belki amérikining wedisi boyiche albaniyige élip bérilghanliqini jezm qilidu.

Birqanche pikap ularni tün qarangghuluqi ichide tirana shehirige élip kiridu. Yéshi chongraq alban terjiman yol boyi ababekri bilen xitay tilida sözliship mangidu. Albaniye hökümet da'iriliri ularni tirana shehirining bir chétige jaylashqan siyasiy panahlan'ghuchilarning lagérigha orunlashturidu.

Tün qarangghuluqi kötürülüp tang atidu. Ular balqan yérim arilining sherqiy girwikidiki bu kichikkine dölette gwentanamo türmisidin boshap chiqqandin kéyinki tunji seherni kütüwalidu. Bu ularning uzaq mezgillik tutqunluqtin axiri qutulup erkinlikke érishken tunji sehiri idi.

Otqashtek qizil quyash déngiz yüzidin kötürülüp tirana shehirige öz nurini tökkinide ababekri hemrahliri bilen bille hayatining yéngi bir sehipisini bashlighanliqini hés qildi.

Ular albaniyide némilerni körüp, némilerni béshidin kechürdi? qandaq jeryanlar bilen bu yat tupraqqa özliship, uni özlirining muhajirettiki yene bir wetini süpitide qobul qildi?...

Bu tepsilatlargha qiziqsingiz, awaz ulinishqa diqqet bergeysiz.