Гвәнтанамодин қайтқанда: абабәкри қасимниң бешидин кәчүргәнлири - 5

Мухбиримиз қутлан
2013.12.08
Share on WhatsApp
Share on WhatsApp
Ababekri-Qasim-Obama-Seybin-305 Қураштурулған бу сүрәткә, президент обама, адвукат сейбин виллет вә абабәкри қасим қатарлиқларниң сүрүтлири чүшүрүлгән.
Асасий сүрәт www.huffingtonpost.com Торидин елинди.


Кариб деңизидики бу натонуш аралға америкиниң қәндиһардин учқан һәрбий айропилани әнсиз қониду. Пут - қоллири чәмбәрчас бағлинип қизил рәңлик мәһбус кийими кийдүрүлгән абабәкри башлиқ 22 нәпәр уйғур мусапир яш охшаш қисмәттики башқа мәһбуслар билән биргә бу ят тупраққа дәссәйду.

Иссиқ бәлвағниң көзни қамаштуридиған күчлүк қуяш нури башқа миңлиған инсанларға охшаш уларниңму вуҗудиға сепилиду. Вәһаләнки, “террорист” қалпиқи кийдүрүлгән бу бир топ кишиләр тропик қуяшиниң тонурдәк һараритини әркин дуняда әмәс, бәлки төмүр ришаткилиқ қәпәс ичидә туруп һес қилиду.

Бир - биригә туташтурулуп селинған төмүр ришаткилиқ үсти очуқ түрмиләргә бирқанчә йүзлигән мәһбуслар қамилиду. Түрлүк әлләрдә туғулуп охшимиған мәдәнийәт муһитида өскән бу топ битәләй кишиләр тәқдирниң еғир қисмәтлири билән гвәнтанамо қолтуқидики сирлиқ түрмигә әсир қилиниду. Әрәб, парс, пашту, түрк, уйғур, өзбек вә башқа бирқанчилиған тилларда сөзлишидиған нәччә йүзлигән тутқунлар кубаниң шәрқий қирғиқидики бу мәһбуслар лагерида түрмә һаятини башлайду.

Бәзгәк кесили, һарғинлиқ вә еғир дәриҗидики роһий бесим нәтиҗисидә җисманий җәһәттин қаттиқ һалсизлинип кәткән абабәкри гвәнтанамо түрмисигә қандақ келип қалғанлиқниму сәзмәйду.

Гвәнтанамо түрмиси улар ойлиғандәк иссиқ бәлвағдики ғайиви җай әмәс иди. Өз вақтида қизил кирист җәмийитиниң адәмлири тәшвиқ қилғандәк инсанпәрвәрлик өлчәмлиригә таянған тутуп туруш орниму әмәс иди. Гәрчә тунҗи қетимлиқ сорақтин кейин уйғур тутқунлириниң хата җайда вә хата вақитта тутулуп қалған гунаһсиз кишиләр икәнлики әскәртилгән болсиму, лекин уларни қачан вә қандақ усулда қоюп беридиғанлиқи қараңғу иди.

Гвәнтанамо түрмисидә дәсләпки қәдәмдә давалиниш пурситигә еришкәндин кейин, абабәкриниң бәзгәк кесилидә яхшилиниш аламәтлири көрүлгән болсиму, лекин роһий җәһәттики йоқитиш уни тинимсиз қийнимақта иди. Намәлум келәчәкни күтүп төмүр қәпәс ичидә күнләрни биһудә өткүзүш униң яшлиқ қәлбини азаблимақта иди. Инсаний муамилигә наил болалмаслиқ, бигунаһ бәдәл төләш һәмдә түрмә қаравуллириниң қопал һәрикәтлири униңдики сәвр - тақәтниң чекини тинимсиз хоритип бармақта иди.

Шундақ күнләрниң биридә түрмә даирилири хитай тәрәптин киши келип уларни сорақ қилидиғанлиқни уқтуриду. Бу хәвәр уларни һаң - таң қалдуриду. Америкидәк дәриҗидин ташқири чоң дөләтниң, йәнә келип дуня демократийәсиниң қоғдиғучиси сүпитидә рол ойнаватқан бу зор дөләтниң өз мәһбуслирини хитайниң сорақ қилишиға йол қоюши уларниң тәәҗҗүпләндүриду.

Дегәндәк хитай тәрәпниң сорақчилири гвәнтанамода пәйда болиду. Бу йәргә қамалған уйғур мәһбусларни бир - биләп сорақ сорақ қилиду. Уйғурчини судәк сөзләйдиған хитайлар билән бирқанчә уйғур сорақчидин тәшкиллигән бу өмәк абабәкри башлиқ уйғур тутқунларға попоза вә тәһдитләр билән муамилә қилиду.

Гвәнтанамодики уйғур тутқунлар хитай сорақчилириниң соаллириға җаваб беришни бирдәк рәт қилиду. Абабәкриму уларниң тәһдитлиригә писәнт қилмайду. Гвәнтанамода, йәнә келип америкиниң һәрбий базисиға қурулған бу түрмидә хитай тәрәп әвәткән адәмләрниң пәйда болуши уларниң тәсәввуриға задила сиғмайду.

Еғир үмидсизлик ичидә сорақтин қайтип чиққан абабәкри төмүр ришаткиға йөләнгиничә апақ қуяш нурида җимирлап турған кариб деңизиға қарап чоңқур хиялларға чөмиду. Әмди уларни йәнә қандақ қисмәтләр күтүп турғанду? улар қачанғичә бу төмүр қәпәсләрдә тутуп турулиду? …

(Давами бар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.