ئالدى بىلەن ھەر بىرىڭلارنىڭ مۇبارەك قۇربان ھېيتىنى چىن دىلىمىزدىن قۇتلۇقلايمىز. قۇربان ھېيتىڭلارغا مۇبارەك بولسۇن!!
شەرقىي تۈركىستاندىكى بارلىق مۇسۇلمانلار جۈملىدىن ئۇيغۇرلار چەكلىك شارائىتلاردىن پايدىلىنىپ، ئۇرۇق-تۇغقان ۋە دوستلار ئارا جەم بولۇشۇپ نىسپىي خۇشاللىقتىن ئورتاق بەھرىمەن بولۇۋاتقان بۇ پەيتلەردە چەتئەللەردە ھىجرەتتە ياشاۋاتقان ئۇيغۇرلارمۇ ھېيت-ئايەمدە ھەسسىلەپ ئۆرلەيدىغان پىغانلىرى، سېغىنىش ئوتلىرىنى پەسەيتىشكە تىرىشماقتا.
«كۆزىدىن ئايرىغان خۇدايىم ھاسىسىدىن ئايرىماپتۇ» دېگەندەك، چەتئەللەردىمۇ مەلۇم ساندا ئۇيغۇر جامائىتى شەكىللەندى ۋە ھېيت- ئايەملەردە نامازلارنى بىر گە ئوقۇشىدىغان ۋە ئوز-ئارا ھېيتلىشىپ، ھال مۇڭ بولۇشۇپ، ۋەتەن، ئۇرۇق-تۇغقان ۋە دوست-يار بۇرادەرلەردىن ئايرىلىش ھىجرانلىرىنى بېسىشتا ئۈلپەتلىشىدىغان ھالەت شەكىللەندى.
ھۆرمەتلىك رادىئو ئاڭلىغۇچىلار بۈگۈن يورۇق ساھىللار سەھىپىمىزدە شۇ خىل سېغىش ھەسرەتلىرى ئىپادىلىگەن شېئىر، ناخشا ۋە سۆھبەتلەرنى ئاڭلىتىمىز.