Җәннәт макан

Сәйяһ
2013-09-28
Елхәт
Пикир
Share
Принт


Ана юртум бағрида тарихимиз изнаси бар,
Явға қарши шан қучуп өткән дәвр һәқдаси бар.
Нәччә карван, нәччә дәвран өтти ундин тохтимай,
Нәччә қисмәт, нәччә өтмүш һәсрити, нидаси бар.

Қойни кәңри, миһри отлуқ, худди бир җәннәт макан,
Мәрду- мәрданни йетиштүргән шәһәр-сәһраси бар.
Нәччә әвлад күч елип өскәч әзиз тупрақидин,
Һәр вәтән пәрзәнтидә юрт сөйгүси, сәвдаси бар.

Туприқи һәр зәрриси шеһид қениға ашиян,
Башлиған әлни һидайәткә сатуқ буғраси бар.
Мөһтирәм әҗдад саналған һәзрити нәваий һәм,
Хас йүсүп, мәһмуд кәби шөһрәткә бай данаси бар.

Ни баһадир өтти бунда әл үчүн қанлар кечип,
Титритип яв қәлбини өлгән обуләласи бар.
Чин әқидә, етиқад йолида җан қилған пида,
Назугумдәк әл қизи, әл пәхри һәм бәрнаси бар.

Һәсритидә өртинип молла билал яд әйлигән,
Қәһриман садирға һәм болған макан ғулҗаси бар.
Қәдди тик хантәңри мәғрур туриду һәйвәт билән,
Унда көз қамаштуруп турған гүзәл буғдаси бар.

Әл- вәтән бәхти үчүн аққан қизил қан шаһиди,
Толғинип һәсрәт ақар тарим кәби дәряси бар.
Бу бүйүк тупрақни явдин тазлимақ пәрзи ирур,
Һөрликигә бәл бағлиған ашиқи -шәйдаси бар.

Толуқ бәт