dunyada yüz bériwatqan iqtisadiy tereqqiyat, medeniyet almashturush, xelqaraliq uchur - alaqining nahayiti téz sürette tereqqiy qilishi bilen, yersharilishish hadisisi künséri algha ilgirilep, kimning qaysi dölet yaki qaysi milletke tewe ikenliki, qandaq tilda sözliship, qaysi dingha étiqad qilidighanliqini ayriwélish nahayiti tesliship kétiwatidu. mana mushundaq ebjesh dunyada hem zamangha masliship tereqqiy qilish hem öz xasliqini saqlap qélish we özgichilikini sijil tereqqi qildurush herqaysi millet - qowm kishiliri jiddiy oylanmisa, hel qilish üchün munasip heriket qilmisa bolmaydighan texirsiz mesilige aylandi.
etrapimizdiki qérindash qewmlerge nezer tashlaydighan bolsaq, ularning alliqachan öz yiltizini qidirip, öz kimlikige jawab izdesh we kimlik möhürige öchmes rengde hel bérip, kéyinki ewladlirigha tewerrük süpitide qaldurush üchün heriket qiliwatqanliqini, belki bu heriketning alliqachan yuqiri dolqungha kötürülgenlikini körimiz. uyghurlardimu nesebshunasliq ilmi bir zamanlarda xéli tereqqiy qilghan bolsimu, dewrning ötüshi bilen millitimiz bu ilimni tashliwetkechke, yéqinqi yüz yillardiki tariximiz téxiche toluq eks ettürüp bérilelmeywatidu. mana mushu nuqtini chiqish qilghan halda bügünki sehipimizde «nesebshunasliq we uning ehmiyiti» heqqide mexsus programma ishliduq. qéni emise, quliqinglar bu programmida bolsun.