Abdul'eziz mexsum heqqide we roza héytliq salamlar

Hemmimizge melum, dunyada köpinche kishiler öz kespini ata miras süpitide perzentlirige qaldurup qoyidu. Shunga oxshash bir kesipni bir nechche ewlad toxtimay dawamlashturghan a'ililerni köp körüp, anglap turimiz.

2011.08.27
Share on WhatsApp
Share on WhatsApp

Béziler perzentlirige hüner – sen'itini miras qaldursa, béziler mal – bayliqini, yene béziler emel – mensipini miras qaldurup kétidu. Emma shundaq kishilermu bar ikenki, ular perzentlirige özining heqqaniyet yolidiki küresh éngini, düshmen'ge boyun egmey, xelqni zulmet – asarettin qutuldurush idiyisini, weten – xelq üchün ömürwayet xizmet qilish pikrini miras qaldurup kétidu.

Aldinqi heptilik programmimizda ene shundaq xelq oghlanlirining péshwasi, qelbi hörlükke teshna kishilerning yolbashchisi, zulmette adashqanlarning nurluq mesh'ili, meripetchi ustaz abduqadir damollamni tonushturup ötkeniduq. Bügünki programmimizda, 1924 – yili jahaletning hamiyliri teripidin ayagh asti qilinmaqchi bolghan ata miras inqilab bayriqini öz qoligha élip, zalim yawgha qarshi toxtawsiz küresh élip barghan we weten – xelqning hörlükige intilgen heqqaniyet terepdarlirigha rehberlik qilip, pütün ömrini özining muqeddes éngi üchün atighan, meshhur wetenperwer sha'ir, jama'et erbabi abdul'eziz mexsum we uning bir qisim eserlirini tonushturup ötimiz.

Heqiqet

Heqni dost tutqay jahanda, eqli bar herbir kishi,
Heq üchün qilmaq küresh, chin ehli wijdanning ishi.
Heq bilen naheqni ajratmaqqa danaliq kérek,
Kim uni ajratmisa, yoqtur uning eqli-hoshi.

Bir misal barki heqiqet égilur sunmas dégen,
Sundurushni oylighan exmeqlerning uxlap chüshi.
Kim heqiqetni özige qilmisa yan qoral,
Ketmigey uning béshidin naheqiqetning mushi.

Aqiwet mundaq kishi pushayman otida örtünüp,
Qorilur özining yéghi birle haman özining göshi.
Kimki yashliq ömrini ötküzse pushmansiz eger,
Jan chiqar halettimu, hemrah bolur köngül xushi.

1978-Yil

Roza héytliq salamlar

Biz hazir 11 ayning sultani dep atalghan mubarek ramzan éyini tügitip, roza héytning harpisida turuwatimiz. Bu künlerde, qelbimizdin urghup chiqqan qaynaq héssiyatimizni ipadilep bérishke til ajizliq qilidu – elwette. Chünki héyt---xushalliq we tentene küni. Héyt---hés – tuyghular jush urup, izzet – éhram, hörmet – iltipat ewjige chiqidighan kün.

Shundaqla, héyt-öz ara yardemlishish,  yoqlishish we eplishish üchün eng chong purset küni.

Emdi mushu xasiyetlik künlerning qachan, qandaq bashlan'ghanliqi, musulmanlargha nisbeten néme üchün bunchiwala ehmiyetlik künler ikenliki we musulmanlarning bu künlerge qandaq teyyarliq körüshi kérekliki heqqide qisqiche chüshenche bérish üchün, türkiyide yashawatqan yash diniy ziyaliylirimizdin möminjan bilen élip bérilghan söhbitimizni diqqitinglargha sunimiz.

Eziz radi'o anglighuchilirimiz! yuqirida éytip ötkinimizdek, héyt-tentene we xushalliq küni. Pütün islam alimi bext – sa'adetke chömidighan, barche musulman bashqiche hayajan'gha chömüp, hés – tuyghuliri ipadilep bergüsiz derijide jush uridighan kün. Dost – buraderler, yar – yarenler bir yerge jem bolup, bu künning sheripige tentene qilidighan kün. Lékin her ishning yoli, qa'idisi bolghandek, héyt – ayem ötküzüshningmu özige chushluq qa'ide – yosunliri, qilishqa bolidighan we bolmaydighan terepliri, ruxset we cheklimiliri bolidu – elwette. Chékidin ashuruwétilgen herqandaq ishning insanni bala – qazagha uchrishi yaki hesret – nadametke qélishi muqerrer.

Undaqta, musulmanlar héyt – ayemni qandaq ötküzüshi kérek, némilerge diqqet qilishi, qandaq ishlarni qilmasliqi lazim? mana bu so'allarning jawabini türkiyide yashawatqan yash diniy ziyaliylirimizdin abdulwaris qarim bilen élip bérilghan söhbet arqiliq érishkeymiz.



Weten söygüsi

Abdul'éziz mexsum

Jiger pare, yürek yare, siqilsa ten ara janim,
Weten derdi ghémi millet bilen ölsem yoqtur arminim.
Weten dep, dinu millet dep, béshimgha her bala kelse,
Bilermen bextu iqbalim, shereplik pexru unwanim.

Derixa, wetinimni gheyriler zorlap bésip alghach,
Yürek baghrim köyüp, qanim qizip, qaynaydu wijdanim.
Büyük tarix, azad millitim qulluqqa aylan'ghach,
Peqet taqet qilalmay örtinip yanmaqta heryanim.

Qéyip bashim, éqip yashim, chüshüp rohum, sunup könglüm,
Orap ghem-qayghu halimni yétishmey chare dermanim.
Ézildim, biqarar öldüm we lékin bolmidim na'ümid,
Seweb kim waqitliktur bu ézilgen, bu siqilghanim.

Nishanemge érishmekke ishenchim zor, toluq chünki,
Dégech hörlük üchün qandash-tilekdashlar pida janim.
Tur ey türk oghli bu ar-nomusni kötürmestin,
Téning irghat, közüng ach, bash kötür ewladi turanim.

Oghuzxan chong babam aprasiyap, atilla, bughralar,
Büyük kök tughlirin dep kökke yetti ah tartqanim.
Büyük altun, kümüsh orda qurulghan chaghda shul tughni,
Quchaqlap turghinimda aqsa arman yoq qizil qanim.

Saqal-sachim qizil qan'gha boyalmastin qaza qilsam,
Yumulmastin közüm, dilda qalur hesret we arminim.
Érishmek erkin-azadliqqa heqqaniy küresh birle,
Asarettin weten-milletni qutquzmaq méning shanim.

Ulugh tengrim büyük turanimiz eslige keltür,
Éqit esli éqinda suni pezling birle rehmanim.
Tilek armanlirim weten-milletke erkin-azadliq,
Sanga roshen méning millet-weten dep zarlan'ghanim.

Hebibing hörmiti, yareb ijabet qil du'ayimni,
Manga rehmet eyleban her mushkülümni eyle asanim.
Weten söymek heqiqiy dini islamning shu'aridur,
“Ezizi” shudur hubbul weten tarixi imanim.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.