កន្លងទៅថ្មីៗនេះក្រសួងការបរទេសកម្ពុជា បានស្នើសុំឲ្យអង្គការទេសន្តរប្រវេសន៍អន្តរជាតិ ឬអាយ.អូ.អឹម (IOM) ដឹកជញ្ជូនពលករទាំងនោះមកកម្ពុជាវិញ ពីកោះម៉ូរីស (Mauritius) ក្រោយពីបានទទួលព័ត៌មានថា មានពលករខ្មែរចំនួន ២៤នាក់នោះ នៅលើនាវានេសាទមួយដែលអាជ្ញាធរកោះម៉ូរីស បានឃាត់ទុក។
អាជ្ញាធរនៅកោះម៉ូរីសនោះ បានចាប់ឃាត់នាវានេសាទមួយគ្រឿងនោះ នៅថ្ងៃទី២៨ ខែមិថុនា ឆ្នាំ២០១១ កន្លងទៅនេះដោយសារតែបានចូលក្នុងដែនទឹករបស់កោះនេះដោយខុសច្បាប់។
ពលករម្នាក់នៅក្នុងចំណោម ២៤នាក់ ឈ្មោះ ប៊ុន ណា អាយុ ២៤ឆ្នាំ បានថ្លែងដោយសម្ដីខ្លីៗថា មានការនឹករលឹកស្រុកកំណើតយ៉ាងខ្លាំង៖ «ពីព្រោះបានឃើញស្រុកខ្មែរវិញ»។
ពលករម្នាក់ទៀតឈ្មោះ ណាង មកពីខេត្តឧត្តរមានជ័យ បានថ្លែងដោយខ្លីៗថា មានក្ដីរីករាយណាស់នៅពេលបានមកដល់ស្រុកកំណើតវិញ៖ «ខ្ញុំនិយាយអត់ចេញ គេអត់ធ្វើបាបផង។ អត់មានប្រើគ្រឿងញៀនទេ»។
លោកឧត្ដមសេនីយ៍ទោ ជីវ ផល្លី ជាអនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន បានមានប្រសាសន៍ថា ជាដំបូងលោកនាំពលករទាំងនោះទៅពិនិត្យសុខភាព៖ «ជាគោលបំណងសំខាន់របស់មន្ត្រីអនុវត្តច្បាប់នៃនាយកដ្ឋានប្រឆាំងការជួញដូរមនុស្ស និងការពារអនីតិជនអគ្គស្នងការដ្ឋាននគរបាលជាតិក្រសួងមហាផ្ទៃ គឺយើងសម្ភាសចង់បាន មេខ្យល់ និងជនល្មើស ដែលយើងនឹងស្វែងរកចាប់ខ្លួនរបស់ពួកគាត់ ហើយផ្ដន្ទាទោសទៅតាមផ្លូវច្បាប់»។
លោកបានសន្យាថា អាជ្ញាធររបស់លោកបន្តការស្រាវជ្រាវឲ្យបានស៊ីជម្រៅបន្ថែមទៀត ដើម្បីចាប់ខ្លួនមេខ្យល់ជួញដូរមនុស្ស និងជួញដូរកម្លាំងពលកម្មទៅប្រទេសថៃ និងទៅប្រទេសដទៃទៀតដើម្បីផ្ដន្ទាទោស។
កាលពីខែតុលា កន្លងទៅនេះ នគរបាលប្រឆាំងការជួញដូរមនុស្ស និងការពារអនីតិជនរាជធានីភ្នំពេញ ដឹកនាំដោយលោកឧត្ដមសេនីយ៍ទោ កែវ ធា បានចាប់ឃាត់ស្ត្រីម្នាក់ឈ្មោះ ឈាង រី អាយុ ៥២ឆ្នាំ និងកូនប្រុសម្នាក់ឈ្មោះ មិន សុរិយា អាយុ ២៥ឆ្នាំ បញ្ជូនទៅតុលាការខេត្តបន្ទាយមានជ័យ ដើម្បីចោទប្រកាន់ក្រោមបទជួញដូរកម្លាំងពលកម្ម និងជួញដូរមនុស្ស។
ការចាប់ខ្លួននោះ ដោយសារតែនគរបាលប្រឆាំងការជួញដូរមនុស្សបានទទួលព័ត៌មានសម្ងាត់មកថា មេខ្យល់នេះបានរៀបចំដឹកជញ្ជូនពលករ ២២នាក់ ពីខែត្រព្រៃវែង ទៅកាន់ប្រទេសថៃ តាមច្រករបៀងនៅស្រុកម៉ាឡៃ ខេត្តបន្ទាយមានជ័យ៕