នៅក្នុងសន្និសីទកាសែតមេដឹកនាំគណបក្សទាំងពីរបានលើកមកបង្ហាញរួមគ្នា អំពីឯកសារភស្តុតាងរាប់ម៉ឺនសន្លឹក ស្តីពីចំនួនមនុស្សដែលត្រូវគេបំបាត់ឈ្មោះនៅក្នុងថ្ងៃបោះឆ្នោត អ្នកបោះឆ្នោតខុសច្បាប់ដោយប្រើទម្រង់១០១៨ និងអ្នកបោះឆ្នោតដែលឈ្មោះស្ទួនដដែលៗ ។
លោក កឹម សុខា មេដឹកនាំគណបក្សសិទ្ធិមនុស្សបានចោទថា ៖ «ខេត្តកំពង់ចាម គណបក្សសិទ្ធិមនុស្សខ្វះតែ៨៧៣ទៀតទេ ។ ហើយម្សិលមិញ ម្សិលម៉្ងៃ តែមួយថ្ងៃគត់ ខ្ញុំទៅខេត្តកំពង់ចាមផ្ទាល់ខ្លួន ជាង២ពាន់នាក់ដែលបាត់ឈ្មោះ ។ ដូច្នេះខ្ញុំយកតែ២ពាន់នាក់មកជាសមាជិករបស់គណបក្សសិទ្ធិមនុស្សសុទ្ធសាធ អ៊ីចឹងតើយើងអាចនឹងទទួលយកបានទេ ? ហើយសភាបែបនេះ យើងទៅអង្គុយប្រជុំជាមួយកើតទេ ? យើងអត់អាចទៅអង្គុយជាមួយកើតទេ ព្រោះតំណាងរាស្រ្ដ គាត់មក ៩០នេះ មួយចំនួនមិនមែនជារបស់គណបក្សប្រជាជនទេ វាជារបស់គណបក្សសិទ្ធិមនុស្ស គណបក្សសមរង្ស៊ី និងគណបក្សដទៃ» ។
លោក សម រង្ស៊ី វិញ បញ្ជាក់បន្ថែមថា ៖ «បន្ទាប់ពីលួចសន្លឹកឆ្នោត ឥឡូវចង់មកលួចកៅអីនៅរដ្ឋសភាទៀត អ៊ីចឹងមានន័យថាសភានេះ មិនមែនជាសភាជាតិទេ ជាសភាបក្ស ជាសភាគណបក្សប្រជាជន ។ ភាពមិនប្រក្រតីមិនដែលមានទំហំ មិនដែលមានកម្រិតស្មើនឹងឆ្នាំ ២០០៨ ទេ ។ មុនៗមានខ្លះដែរ ប៉ុន្តែម្ដងនេះ គណបក្សប្រជាជនគាត់ចង់ឈ្នះពេកទៅ គាត់ធ្វើហ្នឹងវាជ្រុលដៃ ធ្វើខ្លាំងពេកទៅ វាធ្លាយ...» ។
ឯកសារភស្តុតាងរបស់គណបក្សទាំងពីរបានអះអាងថា មនុស្សពីរម៉ឺននាក់បានដាក់ពាក្យប្តឹងអំពីការបាត់ឈ្មោះ មិនបានបោះឆ្នោត មនុស្សជាង១០០០ពាន់នាក់ទៀតនៅខេត្តស្វាយរៀង ត្រូវគេចាប់បានអំពីរឿងធ្វើទម្រង់ ១០១៨ខុសច្បាប់ ដើម្បីបន្លំខ្លួនចូលបោះឆ្នោត និងមនុស្សប្រហែល៣០នាក់ ទៅ ៥០នាក់ ក្នុងមួយការិយាល័យមានឈ្មោះស្ទួនដដែលៗនៅក្នុងពេលបោះឆ្នោតនោះ ។
លោក សម រង្ស៊ី ឲ្យដឹងទៀតថាលោកនិងយកឯកសារទាំងនេះដាក់ជាភស្តុតាង និងស្នាមមេដាយពលរដ្ឋ៣០០០នាក់ដែលមិនបានបោះឆ្នោតនៅខេត្តស្វាយរៀង ទាមទារសុំបោះឆ្នោតឡើងវិញ នៅក្នុងបណ្តឹងថ្ងៃស្អែកទៅក្រុមប្រឹក្សាធម្មនុញ្ញ ។
ជាមួយគ្នានឹងការចោទប្រកាន់អគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា សម្ដែងថាគ.ជ.ប.បានដោះស្រាយទៅតាមនីតិវិធីច្បាប់រួចរាល់ គ.ជ.ប.មិនជំទាស់ចំពោះការប្តឹងផ្ដល់របស់គណបក្សទាំងពីរទៅក្រុមប្រឹក្សាធម្មនុញ្ញនោះទេ ។ ប៉ុន្តែគេកំពុងតែរង់ចាំការប្រកាសលទ្ធផលផ្លូវការនៅក្រោយការដោះស្រាយរបស់ក្រុមប្រឹក្សាធម្មនុញ្ញ ។
គណបក្សសិទ្ធិមនុស្ស និងគណបក្សសមរង្ស៊ី ក៏មានគម្រោងបន្ថែមទៀតដែរថានឹងបន្តការប្តឹងទៅសហប្រធាននៃកិច្ចព្រមព្រៀងក្រុងប៉ារីស បើសិនជាការដោះស្រាយចុងក្រោយមិនត្រឹមត្រូវ ។
សម រង្ស៊ី និយាយពីគម្រោងដាក់ពាក្យបណ្ដឹងទៅសហប្រធានសន្និសីទក្រុងប៉ារីស
ទាក់ទងនឹងបណ្តឹងទៅសហប្រធានសន្និសីទក្រុងប៉ារីសនោះ លោកប្រធានគណបក្សសមរង្ស៊ីឲ្យដឹងដូច្នេះ ៖ «គណបក្សសិទ្ធិមនុស្ស ហើយគណបក្សសមរង្ស៊ីបានចាប់ផ្ដើមសរសេរលិខិតទៅឲ្យប្រទេសដែលជាហត្ថលេខីកិច្ចព្រមព្រៀងទីក្រុងប៉ារីស ។ ហើយមុនគេបង្អស់គឺប្រទេសបារាំង និងប្រទេសឥណ្ឌូណេស៊ី ព្រោះបារាំងនិងឥណ្ឌូណេស៊ីជាសហប្រធាននៃសន្និសីទអន្តរជាតិ ស្ដីពីប្រទេសកម្ពុជា ហៅថាសន្និសីទប៉ារីស ។ សន្និសីទប៉ារីសហ្នឹងហើយដែលបានរៀបចំឲ្យកិច្ចព្រមព្រៀងទីក្រុងប៉ារីស ចេញជារូបរាងកាលពីឆ្នាំ១៩៩១ អ៊ីចឹងយើងសរសេរទៅសហប្រធានមុន សហប្រធានបារាំងនិងឥណ្ឌូណេស៊ី ។ សំបុត្រចេញថ្ងៃហ្នឹងហើយ ប៉ុន្តែខ្ញុំមិនអាចលាតត្រដាងខ្លឹមសារបានទេ ។ ឲ្យលោកប្រធានាធិបតីបារាំង លោកប្រធានាធិបតីឥណ្ឌូណេស៊ី គេបានឃើញសិន ។ ប៉ុន្តែជាគោលយើងប្ដឹង យើងថាឥឡូវនេះ កិច្ចព្រមព្រៀងទីក្រុងប៉ារីសត្រូវគេរំលោភហើយ ព្រោះកិច្ចព្រមព្រៀងទីក្រុងប៉ារីសបានចែងថា ត្រូវតែមានការបោះឆ្នោតត្រឹមត្រូវដែលឆ្លុះបញ្ចាំងឆន្ទៈប្រជាពលរដ្ឋពិតប្រាកដ ។ ខ្ញុំលើកឡើងអម្បាញ់មិញហ្នឹង ឆន្ទៈពិតប្រាកដកន្លែងណា ? សុទ្ធតែខ្មោច សុទ្ធតែមនុស្សអត់មានឈ្មោះបោះឆ្នោត សុទ្ធតែជនបរទេស អ្នកអត់គ្រប់អាយុ ឯកសារក្លែងក្លាយ លុបឈ្មោះគេ លួចឈ្មោះគេ រារាំងគេមិនឲ្យគេទៅបោះឆ្នោត ចំពោះអ្នកដែលមានសិទ្ធិពេញលេញ យើងបោះឆ្នោតត្រឹមត្រូវកន្លែងណា ?» ។
លោកប្រធាន សម រង្ស៊ី បានចោទប្រកាន់គណបក្សប្រជាជន ថាមានផែនការយកអាសនៈរបស់គណបក្សក្នុងសម្ព័ន្ធបក្សប្រឆាំងរបស់លោកទៅជាកម្មសិទ្ធិនៃបក្សរបស់ខ្លួនថែមទៀត ហើយថា អំពើនេះគឺជាការរំលោភកិច្ចព្រមព្រៀង ។
លោក សម រង្ស៊ី បានមានប្រសាសន៍ថា ៖ «ទី២ គណបក្សប្រជាជនមានគម្រោងបន្ទាប់ពីលួចសន្លឹកឆ្នោត ឥឡូវចង់មកលួចកៅអីរដ្ឋសភាទៀត ។ អាហ្នឹងយើងប្ដឹង យើងថារំលោភកិច្ចព្រមព្រៀងទីក្រុងប៉ារីសធ្ងន់ណាស់ ព្រោះកិច្ចព្រមព្រៀងទីក្រុងប៉ារីសចែងថា ប្រទេសកម្ពុជាត្រូវអនុវត្តលទ្ធិប្រជាធិបតេយ្យសេរីពហុបក្ស ។ ឥឡូវពហុបក្សកន្លែងណា ? បើគណបក្សប្រជាជនដែលលួចសន្លឹកឆ្នោត បន្លំអីគ្រប់សព្វ បាន៩០កៅអី ។ ឥឡូវបើលួចរបស់យើង កៅអីយើង ២៩ ដែលនៅសេសសល់ហ្នឹង ហើយតាមរូបមន្តកុំជឿថា ចែកហ៊្វុនស៊ិចប៉ិច ១០ ចែករណឫទ្ធិ ៥ គណបក្សប្រជាជនយក ១០, ៤អី អត់មានអ៊ីចឹងទេ ។ រូបមន្តគឺគណបក្សប្រជាជនយកទាំងអស់ បើលួចពីយើង ២៩ គឺគណបក្សប្រជាជនយកទាំង២៩» ៕