ប្រជាកសិករខ្មែរចំនួន ៣នាក់ ត្រូវបានតុលាការខេត្តកំពង់ស្ពឺ ចេញដីកាកោះហៅឲ្យទៅឆ្លើយបំភ្លឺនៅថៃ្ងទី២៧ ខែកក្កដានេះ ក្រោមបទព្រហ្មទណ្ឌចំនួន ៣ករណី ដែលគេបានចោទថា ពួកគាត់បានប៉ុនប៉ងធ្វើមនុស្សឃាត ប្រើអំពើហិង្សាលើអ្នកកាន់កាប់អចលនទ្រព្យស្របច្បាប់ និងរំលោភកាន់កាប់ដីធ្លីកាលពីខែវិច្ឆិកា ឆ្នាំ២០០៨ កន្លងទៅ។
កសិករដែលកំពុងតែរងការកោះហៅនោះ រស់នៅក្នុងឃុំអមលាំង ស្រុកថ្ពង ខេត្តកំពង់ស្ពឺ គឺមានឈ្មោះទី១ មិន ពែង ទី២ ហង្ស បឿន និងទី៣ សួង ណាវីន បានទទួលដីកានេះកាលពីសប្ដាហ៍ថ្មីៗនេះ ចេញដោយចៅក្រមស៊ើបសួរ លោក សុង ប៊ុណ្ណារិទ្ធិ។
ប្រជាកសិករទាំង ៣នាក់នេះ កំពុងតែរងការចោទប្រកាន់តាមមាត្រាទី១៨៥ និង ១៨៦ នៃក្រមព្រហ្មទណ្ឌប្រទេសកម្ពុជា។ តុលាការមិនបានប្រាប់ឲ្យដឹងថា ដើមបណ្ដឹងនៃសំណុំរឿងនេះជានរណាទេ ប៉ុន្តែប្រជាកសិករ និងអ្នកអង្កេតនៃអង្គការមិនមែនរដ្ឋាភិបាលនានា បានឲ្យដឹងថា ដើមបណ្តឹងនោះ គឺក្រុមហ៊ុន HLHI ពីព្រោះកសិករធ្លាប់មានជម្លោះតវ៉ាគ្នាជាមួយក្រុមហ៊ុនកាលពីឆ្នាំ២០០៨ កន្លងទៅ ដើម្បីទាមទារកាន់កាប់ព្រៃឈើសហគមន៍ជាង ១ពាន់ហិកតា ដែលពួកគាត់អាស្រ័យផលលើផ្លែឈើ និងរុក្ខជាតិនានា។
កសិករខ្មែរឈ្មោះ មិន ពែង អាយុ ៤២ឆ្នាំ នៅក្នុងភូមិអូរអង្គំ ឃុំអមលាំង ស្រុកថ្ពង ខេត្តកំពង់ស្ពឺ បានថ្លែងប្រាប់វិទ្យុអាស៊ីសេរី តាមទូរស័ព្ទនៅថ្ងៃទី២៦ ខែកក្កដានេះថា លោកមានការព្រួយបារម្ភអំពីការចាប់ខ្លួននៅពេលចូលទៅឆ្លើយបំភ្លឺ។
លោក មិន ពែង បានឲ្យដឹងថា ៖ «បើរឿងយុត្តិធម៌ខ្ញុំអត់ភ័យទេ តែខ្លាចតែអយុត្តិធម៌។ នៅពេលដែលខ្ញុំឡើងទៅ គេចោទប្រកាន់ពីបទប៉ុនប៉ងមនុស្សឃាត តែខ្ញុំគ្មានប៉ុនប៉ងមនុស្សឃាតផង»។
វិទ្យុអាស៊ីសេរីមិនអាចទាក់ទងសុំការបញ្ជាក់បាននៅឡើយទេពីលោក ទៀង សុវិន តំណាងក្រុមហ៊ុន HLHI នោះ។
មេធាវីការពារក្ដីឲ្យប្រជាកសិករចំនួន ៣នាក់ គឺលោក ឡុង លន់ នៃអង្គការការពារសិទ្ធិមនុស្សអាដហុក បានមានប្រសាសន៍ថា ៖ «ខ្ញុំនឹងទៅចូលរួមដើម្បីស្ដាប់ការសាកសួររបស់លោកចៅក្រម។ រឿងហ្នឹងខ្ញុំដូចជាអត់ទាន់ដឹងច្បាស់ទេ រឿងភាគីម្ខាងទៀតនោះ»។
អ្នកស៊ើបអង្កេតជាន់ខ្ពស់របស់អង្គការអាដហុក លោក ចាន់ សុវ៉េត ដែលកំពុងតែតាមដានសំណុំរឿងនេះ បានមានប្រសាសន៍ថា វាជាការគំរាមកំហែងមួយដល់កសិករដែលបានតវ៉ាកន្លងមក។
លោក ចាន់ សុវ៉េត មានប្រសាសន៍ដូច្នេះ ៖ «តុលាការធ្វើនេះ គឺធ្វើដើម្បីបញ្ចប់រឿង។ បើសិនជាធ្វើបញ្ចប់រឿង គាត់ចាំបាច់សាកសួរអីបន្តទេ គឺស្នើសុំព្រះរាជអាជ្ញាលើកលែងចោទទៅវាផុតបាត់ទៅហើយ ប៉ុន្តែចៃដន្យរឿងនេះវាហាក់បីដូចជាចង់បង្ហាញប្រាប់ថា ថៃ្ងក្រោយកុំឲ្យប្រជាពលរដ្ឋធ្វើអ៊ីចឹងទៀត ឧទាហរណ៍»។
កាលពីខែមីនា កន្លងទៅនេះ តុលាការខេត្តកំពង់ស្ពឺ ចាប់ឃុំខ្លួនកសិករចំនួន ២នាក់ មានលោក យូ ថូ និងលោក ឃឹម វុទ្ធី នៅពេលចូលទៅឆ្លើយបំភ្លឺនៅក្នុងតុលាការ។ កសិករចំនួន ២នាក់នោះបានរងការចោទថា បានញុះញង់ឲ្យមានការងើបតវ៉ា និងដុតបំផ្លាញខ្ទមយាមចំនួន៦ របស់ក្រុមហ៊ុន ភ្នំពេញ ស៊ូហ្គើរ៍ និងក្រុមហ៊ុនកំពង់ស្ពឺ ស៊ូហ្គើរ៍ របស់លោក លី យ៉ុងផាត់ ដែលរងការចោទថា បានរឹបយកដីស្រែរបស់កសិករប្រមាណជាង ១ពាន់ហិកតាពីប្រជាពលរដ្ឋជាង ៣ពាន់គ្រួសារនៅក្នុងភូមិចំនួន ១១ភូមិនៅឃុំអមលាំង ស្រុកថ្ពង ខេត្តកំពង់ស្ពឺនោះ។ ក្រោយមកតុលាការបានដោះលែង និងលើកលែងការចោទប្រកាន់ ដោយសារតែរកមិនឃើញកំហុស និងមានការតវ៉ារបស់កសិករជាង ១ពាន់នាក់ទាមទារច្រើនថ្ងៃ សុំឲ្យតុលាការដោះលែងវិញ៕