ជន​ជាតិ​ទំពួន​ជាង​៦០​នាក់ ហាម​ឃាត់​ការ​កាប់​ព្រៃ​សហគមន៍​នៅ​រតនគិរី

សហគមន៍​ជន​ជាតិ​ដើម​ទំពួន ភូមិ​ផ្អរ ឃុំ​កិចុង ស្រុក​បរកែវ ប្រមាណ ៦០​នាក់ បាន​នាំ​គ្នា​ចុះ​ទៅ​ហាម​ឃាត់​កម្មករ​ប្រហែល ៤០​នាក់ ដែល​បាន​កាប់​ទន្ទ្រាន​ដី​ព្រៃ​សហគមន៍ នៅ​ថ្ងៃ​ទី​២០ មិថុនា​នេះ ហើយ​បាន​ដក​ហូត​កាំបិត​ផ្គាក់​ចំនួន​១០ ជា​វត្ថុ​តាង​បញ្ជូន​ទៅ​សាលា​ឃុំ។
ដោយ គង់ យុទ្ធនា
2010-06-20
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ទំពួន៣០៥
កុមារ​ជន​ជាតិ​ទំពួន​នៅ​ខេត្ត​រតនគិរី
Photo courtesy of Wikipedia

សហគមន៍​ជន​ជាតិ​ទំពួន ភូមិ​ផ្អរ ប្រមាណ ៦៣​នាក់ បាន​នាំ​គ្នា​ចុះ​ទៅ​ទប់​ស្កាត់​មិន​ឲ្យ​មាន​ការ​កាប់​ទន្ទ្រាន​ដី​ព្រៃ និង​ដី​ចម្ការ​របស់​ពួក​គាត់​ត​ទៅ​ទៀត​ឡើយ នៅ​ពី​ព្រឹក​ថ្ងៃ​ទី​២០ ខែ​មិថុនា​នេះ បន្ទាប់​ពី​ឃើញ​ថា មាន​កម្មករ​ស៊ី​ឈ្នួល​ជាង ៤០​នាក់ កំពុង​ធ្វើ​សកម្មភាព​កាប់​ឆ្ការ​លើ​ដី​ទំនាស់​នោះ។

ប្រធាន​សហគមន៍​ភូមិ​ផ្អរ លោក ហន់ រ៉ បាន​ថ្លែង​ថា មិន​មាន​អំពើ​ហិង្សា​កើត​ឡើង​ទេ ដោយ​កម្មករ​ទាំង​នោះ នាំ​គ្នា​ចាក​ចេញ នៅ​ពេល​ដែល​អ្នក​ភូមិ​ចុះ​ទៅ​ហាម​ឃាត់ ហើយ​ជា​មួយ​គ្នា​នេះ អ្នក​ភូមិ​បាន​ដក​ហូត​កាំបិត​ផ្គាក់ ចំនួន​ជាង​១០ ដែល​ក្រុម​កម្មករ​ទាំង​នោះ​ទម្លាក់​ចោល​មុន​ពេល​ចាក​ចេញ។

លោក ហន់ រ៉ មាន​ប្រសាសន៍​ដូច្នេះ ៖ «ប៉ះ​ពាល់​អា​ដើម​ចន្ទី ដើម​ចន្ទី​គេ​ដាំ ៧​ឆ្នាំ ៨​ឆ្នាំ ហើយ អា​ខ្លះ​ហ្នឹង ៩​ឆ្នាំ​ហើយ​បង ហើយ​គេ​នៅ​ៗ ទាន់​កាប់​ទេ គេ​ថា​ចាំ​កាប់​ព្រៃ​អស់​ហ្នឹង គេ​យក​ម៉ាស៊ីន​កាត់​តែ​ម្ដង។ គេ​ទិញ​ពី​ភូមិ​ផ្អរ ប៉ុន្តែ​ម្ចាស់​ហ្នឹង​មាន​តែ ៧​នាក់​ទេ លក់​ដី​ហ្នឹង ខ្លះ​មួយ​ហាត់ ខ្លះ​ហ្នឹង​កន្លះ​ហាត់។ មាន​តា​ប៉ុណ្ណឹង​ហើយ​គេ​វាទ​ហ្នឹង​ទាំង​អស់»

ប្រធាន​សហគមន៍​រូប​នេះ​អះអាង​ថា​នឹង​បញ្ជូន​កាំបិត​ទាំង​នេះ​ទៅ​ថ្នាក់​ឃុំ ដើម្បី​រក្សា​ទុក​ជា​វត្ថុ​តាង​នៃ​ការ​ចូល​ទន្ទ្រាន​ដោយ​កម្មករ​ស៊ី​ឈ្នួល​របស់​ឈ្មោះ នី សង្ស ជា​មន្ត្រី​ប៉ូលិស​ខេត្ត។

ជំទប់​ទី​២ ឃុំ​កិចុង លោក រចំ ភើន ថ្លែង​ថា លោក​បាន​ចូល​រួម​ស្ដាប់​ការ​ប្រជុំ​របស់​សហគមន៍ ក្រោយ​ពេល​ដែល​ពួក​គាត់​បាន​ដក​ហូត​កាំបិត​ទាំង​នេះ ហើយ​ឃើញ​ថា សហគមន៍​បាន​ធ្វើ​ការ​ហាម​ឃាត់​ដោយ​សន្តិវិធី​ជា​ច្រើន​សារ​ហើយ មិន​ឲ្យ​មាន​ការ​កាប់​ឆ្ការ​នៅ​លើ​ដី​ទំនាស់​សរុប ១៨០​ហិកតារ​នោះ។

លោក រចំ ភើន មាន​ប្រសាសន៍​ដូច្នេះ ៖ «ទៅ​ទប់ ២​ដង​ហើយ​បង អា​លើក​មុន​ហ្នឹង ថ្ងៃ​១៤ ហើយ​ថ្ងៃ​២០ បាន​កាំបិត​១២ ហើយ​កាំបិត​ហ្នឹង ប្រជា​ពលរដ្ឋ​រក​ឃើញ​មួយ​កន្លែង​២ មួយ​កន្លែង​៣ គេ​ប្រមូល​ទៅ ហើយ​អ្នក​ខ្លះ​ហ្នឹង​គេ​ប្រគល់​ឲ្យ​ប្រជា​ពលរដ្ឋ​អ្នក​ទៅ​ចាប់​ហ្នឹង»

លោក រចំ ភើន បាន​បន្ត​ថា ទំនាស់​ដែល​កំពុង​កើត​មាន​នា​ពេល​នេះ គឺ​បណ្ដាល​មក​ពី​ឈ្មោះ នី សង្ស បាន​ទិញ​ដី​ពី​អ្នក​ភូមិ ៧​គ្រួសារ ប៉ុណ្ណោះ ដែល​ក្នុង​នោះ​ខ្លះ​បាន​លក់​កន្លះ​ហិកតារ ខ្លះ​មួយ​ហិកតារ និង​ខ្លះ​ច្រើន​បំផុត លក់​ត្រឹម ២​ហិកតារ។ លុះ​ដល់​គេ​ចូល​មក​កាប់​ឆ្ការ បែរ​ជា​កំណត់​យក​ទាំង​ចម្ការ​អ្នក​ភូមិ​ដទៃ​ទៀត ដែល​មិន​បាន​លក់​នោះ​ផង។

មន្រ្តី​ប៉ូលិស​ខេត្ត​រតនគិរី ឈ្មោះ នី សង្ស ដែល​ត្រូវ​បាន​ចោទ​ក្នុង​រឿង​នេះ អះអាង​ថា លោក​មាន​ឯកសារ​គ្រប់​គ្រាន់​លើ​ផ្ទៃ​ដី​ដែល​បាន​ទិញ ទំហំ ២២​ហិកតារ ហើយ​អ្នក​ភូមិ​បាន​ចូល​ទៅ​លួច​ដាំ​ដុះ​លើ​ដី​របស់​លោក និង​បាន​ញុះ​ញង់​អ្នក​ដទៃ​ទៀត​បង្ក​បញ្ហា។

លោក នី សង្ស មាន​ប្រសាសន៍​ដូច្នេះ ៖ «២២​ហាត់ មាន​ប្លង់​ឌឺម៉ាស់​ត្រឹម​ត្រូវ​មួយ​កំផ្លេ។ មាន​រំលោភ​ម៉េច​រំលោភ​សម័យ​នេះ រំលោភ​ទាល់​រឿង...»

មេ​ឃុំ​កិចុង លោក រចំ ឡាយ អះអាង​ថា មាន​ឯកសារ​ផ្ទេរ​សិទ្ធិ​គ្រប់គ្រង​កាន់​កាប់​មក​ឲ្យ​ឈ្មោះ នី សង្ស មែន ប៉ុន្តែ​បង​របស់​អ្នក​លក់​ម្នាក់ ដែល​មិន​រស់​នៅ​ក្នុង​ភូមិ​ជាង ១០​ឆ្នាំ​មក​ហើយ​នោះ បាន​ត្រឡប់​មក​ភូមិ​វិញ ហើយ​ធ្វើ​ការ​តវ៉ា​លើ​ដី​ទាំង​នោះ ដោយ​គាត់​សម្អាង​ថា គាត់​មិន​បាន​លក់។

ឃុំ​កិចុង មាន​ទំនាស់​ដីធ្លី​កើត​ឡើង​ជា​ច្រើន ហើយ​មន្ត្រី​សម្របសម្រួល​អង្គការ​សិទ្ធិ​មនុស្ស​អាដហុក​ខេត្ត​រតនគិរី លោក ប៉ែន ប៊ុណ្ណារ៍ បាន​កត់​សម្គាល់​ថា ភាគ​ច្រើន​មាន​ការ​រំលោភ​ដោយ​ជន​អ្នក​មាន​អំណាច ទៅ​លើ​សហគមន៍។

លោក ប៉ែន ប៊ុណ្ណារ៍ មាន​ប្រសាសន៍​ដូច្នេះ ៖ «ជា​ទូទៅ ដី​សហគមន៍​ជន​ជាតិ​ភាគ​តិច គឺ​ជា​ដី​ដែល​តាម​ផ្លូវ​ច្បាប់​មិន​អាច​លក់​ដូរ​បាន»

សហគមន៍​ភូមិ​ផ្អរ មាន​ទំនាស់​ដីធ្លី​រ៉ាំរ៉ៃ​ជា​មួយ​នឹង​ឈ្មួញ​ឯកជន​មួយ​ចំនួន ហើយ​កាល​ពី​ឆ្នាំ​២០០៨ អ្នក​ភូមិ​ក៏​ធ្លាប់​បាន​ចុះ​ទប់​ស្កាត់​ការ​កាប់​ទន្ទ្រាន និង​ដក​ហូត​បាន​កាំបិត​ចំនួន​១៩ និង​ម៉ាស៊ីន​អារ​ឈើ ២​គ្រឿង បញ្ជូន​ទៅ​តុលាការ​ដែរ៕

មតិ (0)
  • បោះពុម្ព
  • ចែករំលែក
  • អ៊ីម៉ែល