អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា និងអភិបាលខេត្តព្រៃវែង លោក ហាស សារ៉េត នៅថ្ងៃទី៥ ខែកញ្ញា បានសម្ដែងការកក់ក្តៅ និងសុវត្ថិភាព ចំពោះក្រុងព្រៃវែង នៅខេត្តព្រៃវែង ពីការគម្រាមកំហែងដោយសារទឹកជំនន់នៅថ្ងៃអនាគត នៅគ្រាដែលទំនប់ទឹកខ្សែក្រវាត់ក្រុងព្រៃវែង កំពុងត្រូវបានសាងសង់ ដើម្បីទប់ទល់ទឹកជំនន់ឆ្នាំ២០១៣។
ទំនប់ទឹកនោះមានប្រវែងជាង២គីឡូម៉ែត្រ តម្លៃ១លាន៧សែនដុល្លារអាមេរិក ក្រោមប្រាក់កម្ចីសម្បទានពីធនាគារអភិវឌ្ឍន៍អាស៊ី។
ក្រៅពីនេះ ស្ពានចំនួនពីរកន្លែងជាខ្សែក្រវាត់ក្រុងព្រៃវែង គឺមានតម្លៃជិត៤លានដុល្លារអាមេរិក កំពុងត្រូវបានសាងសង់ក្រោមប្រាក់កម្ចីសម្បទានពីធនាគារអភិវឌ្ឍន៍អាស៊ី។ បន្ថែមលើនេះទៀត ស្ពានមួយកន្លែងទៀត តម្លៃ៥៧ម៉ឺនដុល្លារអាមេរិក កំពុងតែត្រូវបានសាងសង់នៅក្នុងភូមិកោះគោ ឃុំមានជ័យ ស្រុកស្រីសន្ធរ ខេត្តកំពង់ចាម។
អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា បានមានប្រសាសន៍ប្រាប់អ្នកកាសែតនៅខេត្តព្រៃវែង ថា ទំនប់ទឹកខ្សែក្រវាត់ក្រុងនោះ គឺជាយុទ្ធសាស្ត្រដ៏សំខាន់ ការពារក្រុងព្រៃវែង នៅឆ្នាំ២០១៣ និងឆ្នាំក្រោយៗទៀត៖ «ក្រៅពីនេះ មានតួឯកច្រើនទៀត ប៉ុន្តែតួឯក ADB (ធនាគារអភិវឌ្ឍន៍អាស៊ី) ហ្នឹង ដើរតួស្ដារឡើងវិញនូវហេដ្ឋារចនាសម្ព័ន្ធផ្លូវថ្នល់ ស្ពាន ហើយដោយមានការសម្របសម្រួលពីក្រសួងជំនាញគមនាគមន៍ ក្រសួងអភិវឌ្ឍន៍ជនបទ ហើយពីមន្ទីរជំនាញតាមខេត្តនានា។ ថ្ងៃនេះសប្បាយចិត្តណាស់»។
ទាក់ទងនឹងការស្ដារឡើងវិញនូវទំនប់ទឹក នៅខេត្តព្រៃវែង មន្ត្រីគម្រោងនៃធនាគារអភិវឌ្ឍន៍អាស៊ី លោក ឡុង វូពិសិដ្ឋ បានមានប្រសាសន៍ថា គម្រោងស្ដារឡើងវិញនៃទំនប់ទឹកខ្សែក្រវាត់ក្រុងព្រៃវែង គឺជាគម្រោងមួយនៅក្នុងចំណោមគម្រោងចំនួន២០ ក្រោមប្រាក់កម្ចីសម្បទានពីធនាគារអភិវឌ្ឍន៍អាស៊ី៖ «សារៈសំខាន់របស់គម្រោងនេះមួយទៀត គឺផ្លូវហ្នឹង ដើម្បីការពារទឹកជំនន់ កុំឲ្យហូរចូលលិចខេត្តព្រៃវែង ទាំងមូល អាហ្នឹងជាសារៈសំខាន់មែនទែន ព្រោះយើងធ្វើគម្រោងហ្នឹង គឺគម្រោងផ្លូវថ្នល់ផង និងគម្រោងប្រឡាយទឹកផងឲ្យវា (Link) ភ្ជាប់ជាមួយគ្នា»។
ប្រជាពលរដ្ឋឈ្មោះ ម៉ៅ ហៃ អាយុ៥៥ឆ្នាំ នៅភូមិ៨ សង្កាត់កំពង់លាវ ក្រុងព្រៃវែង ខេត្តព្រៃវែង នៅក្បែរទំនប់ទឹកនោះ បាននិយាយថា នៅពេលមានទឹកជំនន់ម្តងៗ ប្រជាពលរដ្ឋព្រួយបារម្ភអំពីសុវត្ថិភាពក្រុងព្រៃវែង៖ «កាលពីមិនទាន់មានទឹក និងទំនប់ទឹកហ្នឹង ភ័យដែរហ្នឹង ពេលណានោះ វាអត់មានប្រឡាយដោះទឹកហ្នឹង ទឹកហូរគួចខ្លាំងតាមហ្នឹងណា។ និយាយពីធ្វើដំណើរពិបាកណាស់ វាអត់មានផ្លូវឆ្លងកាត់តែម្តង ហើយស្ពានអត់មាន ស្ពាននៅឯណានោះ»។
គម្រោងស្ដារឡើងវិញនូវទំនប់ទឹក និងស្ពាន នៅខេត្តព្រៃវែង និងខេត្តកំពង់ចាម ដែលគេបង្ហាញអ្នកកាសែតនោះ គឺជាផ្នែកមួយនៃគម្រោងស្ដារឡើងវិញរបស់រដ្ឋាភិបាល ក្រោមប្រាក់កម្ចីសម្បទានពីធនាគារអភិវឌ្ឍន៍អាស៊ី នៅខេត្តចំនួន៦ ដែលមានតម្លៃសរុបជាង៦៧លានដុល្លារអាមេរិក។
ខេត្តទាំង៦នោះ មានដូចជា ខេត្តព្រៃវែង បន្ទាយមានជ័យ កំពង់ធំ សៀមរាប កំពង់ចាម និងខេត្តកណ្ដាល ដែលរងការខូចខាតធ្ងន់ធ្ងរជាងគេ ដោយសារទឹកជំនន់ឆ្នាំ២០១១ កន្លងទៅនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។