អគ្គលេខាធិការនៃអាជ្ញាធរជាតិប្រយុទ្ធប្រឆាំងនឹងគ្រឿងញៀន លោកឧត្ដមសេនីយ៍ លួ រ៉ាមីន បានមានប្រសាសន៍ឲ្យដឹង នៅឯពិធីបើកសិក្ខាសាលារយៈពេល ៤ថ្ងៃ ស្ដីពី «ការប្រើបំពានគ្រឿងញៀននិងមេរោគអេដស៍» ដែលរៀបចំដោយអង្គារកាតូលិចសង្គ្រោះនិងអភិវឌ្ឍន៍ ហៅកាត់ថា CRS នាថ្ងៃអង្គារនេះថា ការឆ្លងរាលដាលមេរោគអេដស៍តាមរយៈការប្រើប្រាស់គ្រឿងញៀនមានការកើនឡើងយ៉ាងឆាប់រហ័ស ។
លោក លួ រ៉ាមីន មានប្រសាសន៍ថា ៖ «ការឆ្លងរាលដាលមេរោគអេដស៍ មានការពាក់ព័ន្ធនឹងការប្រើគ្រឿងញៀន ដូចជាមានការកើនឡើង យ៉ាងឆាប់រហ័សគួរឲ្យព្រួយបារម្ភនៅព្រះរាជាណាចក្រកម្ពុជាយើងខ្ញុំ នេះជាបញ្ហាថ្មី ដែលយើងទាំងអស់គ្នាត្រូវផ្ដោតការយកចិត្តទុកដាក់ ដោះស្រាយឲ្យបានខ្លាំងខ្លា និងម៉ត់ចត់» ។
នៅឯសិក្ខាសាលាដែលមានអ្នកចូលរួមមកពី ២១ប្រទេស លោក លួ រ៉ាមីន បានមានប្រសាសន៍ថា តាមការសិក្សាស្រាវជ្រាវ និងការអង្កេតផ្សេងៗ បានរកឃើញថា និន្នាការថ្មីនៃការឆ្លងរាលដាលមេរោគអេដស៍ តាមបណ្ដាប្រទេសនិងតំបន់មួយចំនួន ក្នុងពិភពលោក គឺមានពាក់ព័ន្ធនឹងការប្រើបំពានគ្រឿងញៀន គឺការចាក់គ្រឿងញៀនតាមសរសៃ ។
មិនទាន់មានតួលេខពីចំនួននៃអ្នកប្រើប្រាស់គ្រឿងញៀនដោយការចាក់ម្ជុលស៊ីរ៉ាំងនៅក្នុងប្រទេសកម្ពុជានៅឡើយទេ ប៉ុន្តែ លោក លួ រ៉ាមីន បានមានប្រសាសន៍ថា មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ របស់ក្រសួងសុខាភិបាល នឹងធ្វើការជំរឿនពីចំនួននេះ ។
អ្នកសម្របសម្រួលគម្រោងប្រចាំប្រទេសកម្ពុជារបស់អង្គការ UNODC លោក Lars Pedersen បានមានប្រសាសន៍ថា ស្ថានភាពប្រើប្រាស់គ្រឿងញៀននៅក្នុងប្រទេសកម្ពុជា បានឈានដល់កម្រិតធ្ងន់ធ្ងរ ហើយលោកថា ការរីករាលដាលថ្មីនៃមេរោគអេដស៍នៅក្នុងប្រទេសកម្ពុជា គឺមានទំនាក់ទំនង ជាមួយនឹងការរួមភេទនៅពេលប្រើប្រាស់គ្រឿងញៀន និងការប្រើប្រាស់គ្រឿងញៀនដោយការប្រើម្ជុលនិងស៊ីរ៉ាំងរួមគ្នា ។
លោកបានមានប្រសាសន៍ទៀតថា ៨០% នៃអ្នកប្រើប្រាស់គ្រឿងញៀន មានអាយុចន្លោះពី ១០ ទៅ ២៥ឆ្នាំ ហើយថា ពួកគេបានធ្លាក់ខ្លួនប្រើប្រាស់គ្រឿងញៀន គឺដោយសារតែគ្រឿងញៀន គឺងាយរកបាន ហើយពួកគេមិនដឹងពីគ្រោះថ្នាក់នៃគ្រឿងញៀនឡើយ ។
តំណាងអង្គការកាតូលិចសង្គ្រោះនិងអភិវឌ្ឍន៍ ហៅកាត់ថា CRS ប្រចាំប្រទេសកម្ពុជា លោកស្រី ស៊ូហ្សាន ស៊ីលវឺស (Susan Silveus) បានមានប្រសាសន៍ថា កម្មវិធីដើម្បីប្រយុទ្ធប្រឆាំងនឹងជំងឺអេដស៍តាមរយៈការប្រើប្រាស់គ្រឿងញៀនរបស់អង្គការCRS អាចនឹងចាប់មានដំណើការនៅឆ្នាំ ២០០៨ ឬក៏ឆ្នាំ២០០៩ ខាងមុខ ហើយបន្តរហូតដល់ឆ្នាំ ២០១៣ ជាមួយនឹងទឹកប្រាក់ប្រមាណ ១លាន ៦សែនដុល្លារក្នុងមួយឆ្នាំ ដែលភាគច្រើនជាជំនួយពីទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ ហៅកាត់ថា USAID និងមួយចំនួនទៀត បានមកពីវិភាគទាន ។
អគ្គលេខាធិការនៃអាជ្ញាធរជាតិប្រយុទ្ធប្រឆាំងនឹងជំងឺអេដស៍ លោក តែង គន្ធី បានមានប្រសាសន៍ថា ការរីករាលដាលឆ្លងមេរោគអេដស៍ គួរឲ្យកត់សម្គាល់ គឺតាមរយៈអ្នករកស៊ីផ្លូវភេទ ការរួមភេទរវាងបុរសនិងបុរសដូចគ្នា និងអ្នកប្រើប្រាស់គ្រឿងញៀនតាមរយៈការចាក់ ។
ចំនួនអ្នកផ្ទុកមេរោគអេដស៍ បានធ្លាក់ចុះពី ៣% នៅក្នុងឆ្នាំ១៩៩៨ មកនៅត្រឹម ០.៩% នៅក្នុងឆ្នាំ២០០៧ ៕