បុរសឈ្មោះ ឌួង សុធា ដែលអះអាងថា ជាតំណាងឲ្យពលរដ្ឋចង់ឲ្យមានការអភិវឌ្ឍនៅនឹងកន្លែង ស្ថិតនៅភូមិ២២ សង្កាត់បឹងកក់២ ខណ្ឌទួលគោក មានប្រសាសន៍ថា នៅព្រឹកថ្ងៃទី៥ ខែមិថុនានេះ សមត្ថកិច្ចខណ្ឌទួលគោក បានដាក់ពង្រាយកម្លាំងរាប់សិបនាក់មករុះរើលំនៅរបស់ពលរដ្ឋដែលត្រូវភ្លើងឆេះ ប៉ុន្តែបានដកថយវិញបន្ទាប់ពីពលរដ្ឋប្រឆាំងតវ៉ា។
លោក ឌួង សុធា មានប្រសាសន៍ដូច្នេះ ៖ «គាត់ (ពលរដ្ឋ) ទ្រាំនៅអត់បានទេ ពេលដែលគាត់ធ្វើ (អាជ្ញាធរ) មកចាប់គាត់ តែសុំឲ្យវាស់អត់វាស់ (វាស់បែងចែកដី)។ បងប្អូនអាជ្ញាធរហ្នឹងរៀបចំ ដាក់ថ្ងៃដាក់ខែមកថាថ្ងៃណា? បើខាងរាជធានីហ្នឹង លោក កែប ជុតិម៉ា គាត់ថា ប្រជាជនទាំងអស់អាចសង់លំនៅរបស់ខ្លួនឡើងវិញចុះនៅផ្ទៃដីនេះ ព្រោះថា រដ្ឋអត់មានយកធ្វើអីទេ នេះជាសម្ដីរបស់គាត់ក្រោយភ្លើងឆេះរួចបានពីរថ្ងៃ»។
ស្ត្រីវ័យចំណាស់ឈ្មោះ សារី មានប្រសាសន៍ថា ពលរដ្ឋពួកគាត់បានរស់នៅហាលភ្លៀង និងកម្ដៅថ្ងៃយ៉ាងវេទនាអស់រយៈពេលបីខែមកហើយ ប៉ុន្តែរហូតមកដល់ពេលនេះនៅមិនទាន់មានដំណោះស្រាយនៅឡើយ។
អ្នកស្រី សារី បានឲ្យដឹងដូច្នេះ ៖ «ដល់រដូវភ្លៀងហើយ មានក្មេង ចាស់ជរាឈឺច្រើនណាស់ ហើយក្ដៅ រាករូស គ្រុនឈាមចំពោះក្មេងៗ ដល់អ៊ីចឹងគាត់បានរៀបចំទីលំនៅបន្តិចបន្តួចគ្រាន់នឹងនៅ ដល់ពេលឥឡូវហ្នឹងអាជ្ញាធរឲ្យប្រជាជនទាំងអស់ដែលបានរៀបចំហ្នឹងរុះរើទាំងអស់»។
ស្ត្រីវ័យកណ្តាលមិនប្រាប់ឈ្មោះម្នាក់ទៀតបញ្ជាក់ឲ្យដឹងថា អស់ពេលបីខែហើយ ដែលគ្រួសារ និងកូនតូចៗរបស់គាត់រស់នៅក្រោមដំបូលប្រក់កៅស៊ូយ៉ាងលំបាកវេទនា ទន្ទឹងរង់ចាំអាជ្ញាធរបែងចែកដីជូនពួកគាត់សង់លំនៅ ប៉ុន្តែអាជ្ញាធរមិនត្រឹមតែបែងចែកដីជូនពួកគាត់ ថែមទាំងមកគំរាមពលរដ្ឋមិនឲ្យសង់លំនៅបណ្តោះអាសន្នរស់នៅថែមទៀត។
ស្ត្រីសុំមិនប្រាប់ឈ្មោះឲ្យដឹងដូច្នេះ ៖ «មិនទាន់មានដំបូលផង ទើបសង់បានមួយចំហៀង ឥឡូវគាត់ (អាជ្ញាធរ) មកប្រាប់ឲ្យរុះ។ គាត់អត់អាណិតអាសូរដល់ប្រជាជនសោះ។ ខ្ញុំផ្ទះឆេះអស់ហើយ តែខោអាវក៏គ្មានដែរ ដល់ពេលគាត់ធ្វើអ៊ីចឹងខ្ញុំនិយាយមិនចេញទេ ខ្ញុំចង់តែហូរទឹកភ្នែកទេ»។
លោក ចាន់ សុវ៉េត មន្ត្រីស៊ើបអង្កេតជាន់ខ្ពស់នៃសមាគមអាហដុក មានប្រសាសន៍ថា អាជ្ញាធរ មិនគួរមានការយឺតយ៉ាវក្នុងការបែងចែកដីជូនពលរដ្ឋដើម្បីសង់លំនៅនោះទេ។
លោក ចាន់ សុវ៉េត មានប្រសាសន៍ថា ៖ «ការអនុវត្តរបស់មន្ត្រីរាជរដ្ឋាភិបាលហ្នឹង ធ្វើឡើងមិនត្រឹមត្រូវ អនុវត្តផ្ទុយពីគោលការណ៍ដើមដែលបានកំណត់។ ឧទាហរណ៍ដូចជាការគាត់ឆេះផ្ទះអស់មួយសាហើយ រហូតដល់ពេលនេះនៅដោះស្រាយមិនចេញ។ ដូច្នេះយើងមានការព្រួយបារម្ភខ្លាំងណាស់ជុំវិញការប្រើប្រាស់ឥទ្ធិពលកម្លាំងប៉ូលិស កម្លាំងប៉េអឹមមកធ្វើបាបប្រជាពលរដ្ឋក្នុងការដែលពួកគាត់ទាមទារតវ៉ាឲ្យដោះស្រាយតែប៉ុណ្ណោះ»។
កាលពីយប់ថ្ងៃទី៨ ខែមីនា ឆ្នាំ២០១០ អគ្គិភ័យបានឆាបឆេះផ្ទះប្រជាជនភូមិ២២ សង្កាត់បឹងកក់២ ខណ្ឌទួលគោក រាជធានីភ្នំពេញ អស់ផ្ទះជាង ២០០ខ្នង បណ្តាលឲ្យប្រជាជនជាង ២០០គ្រួសារគ្មានទីជម្រក។
វិទ្យុអាស៊ីសេរី មិនទាន់អាចទាក់ទងមន្ត្រីសាលាក្រុងភ្នំពេញ ដើម្បីបំភ្លឺជុំវិញការតវ៉ារបស់ប្រជាពលរដ្ឋនៅសង្កាត់បឹងកក់២ បានទេនៅថ្ងៃទី៥ ខែមិថុនានេះ ។ ប៉ុន្តែលោក ឃឹម សំអាន អភិបាលរងខណ្ឌទួលគោក មានប្រសាសន៍ថា ការដែលអាជ្ញាធររារាំងមិនឲ្យពលរដ្ឋនៅភូមិ២២ សង្កាត់បឹងកក់២ សង់លំនៅលើទីតាំងលំនៅត្រូវភ្លើងឆេះ គឺមិនចង់ឲ្យពលរដ្ឋខាតលុយកាក់ទៅលើការសាងសង់ ព្រោះអាជ្ញាធរមិនចង់ឲ្យពលរដ្ឋសង់លំនៅលើទីតាំងត្រូវភ្លើងឆេះនេះតទៅទៀតទេ។
លោក ឃឹម សំអាន មានប្រសាសន៍ដូច្នេះ ៖ «យើងមិនឃាត់គាត់ទេរឿងធ្វើសម្រាប់ជ្រក ឬជួសជុលនៅឲ្យបានវិញ។ ថ្ងៃក្រោយមានការរុះរើទៅវាលំបាក ហើយបង់ខាតថវិកាច្រើនសម្រាប់បងប្អូនប្រជាពលរដ្ឋហ្នឹងទៀត។ គាត់អត់បានស្ដាប់ពួកយើងទេ គាត់ដឹងតែពីស្រែកជេរយើង។ ខ្ញុំសំណូមពរថា បងប្អូនប្រជាពលរដ្ឋធ្វើការពិចារណាឲ្យបានម៉ត់ចត់ក្នុងការរស់នៅទីនេះ ទីនេះមិនមានអ្វីល្អសម្រាប់បងប្អូនទេ រស់នៅលើភក់ជ្រាំ»។
ដែន អយុធ្យា ៖ មានន័យថា អាជ្ញាធរចង់ឲ្យពលរដ្ឋទៅរស់នៅសង្កាត់ចោមចៅទាំងអស់ ឬយ៉ាងម៉េច? ឃឹម សំអាន ៖ បាទ! អ៊ីចឹងហើយ។
ទោះយ៉ាងនេះក្តី ពលរដ្ឋបានអះអាងថា ប្រសិនបើការតវ៉ារបស់ពួកគេមិនបានសម្រេច ប្រជាពលរដ្ឋគ្រោងឡើងទៅតវ៉ា់ដល់មុខសាលារាជធានីភ្នំពេញ និងពីមុខផ្ទះលោកនាយករដ្ឋមន្ត្រី ហ៊ុន សែន បន្តទៀត នៅថ្ងៃច័ន្ទ ទី៧ ខែមិថុនា សប្តាហ៍ខាងមុខនេះ៕