ការទាមទាររបស់ក្រុមស្ត្រីផ្សព្វផ្សាយសា្របៀរអង្គរ គឺបំណងឲ្យក្រុមហ៊ុនស្រាបៀរ ខេមប្រ៊ូវ គោរពច្បាប់ការងារដូចមានចែងក្នុងលិខិតលេខ ៦១/១១ ចុះថ្ងៃ៧ កក្កដា ឆ្នាំ២០១១ របស់ក្រុមប្រឹក្សាអាជ្ញាកណ្ដាលសម្រេចបង្គាប់ឲ្យក្រុមហ៊ុនស្រាបៀរអង្គរ ខេមប៊្រូវ សងប្រាក់ថ្លៃធ្វើការចុងសប្ដាហ៍មកកម្មករគ្រប់ចំនួន ១០០% ទៅស្ត្រីចំនួន ៣៤នាក់ ដែលបានប្ដឹងទៅក្រុមប្រឹក្សាអាជ្ញាកណ្ដាលចាប់ពីឆ្នាំ២០០៧ ដល់ឆ្នាំ២០១០ និងបង្គាប់ឲ្យក្រុមហ៊ុនអនុវត្តកិច្ចសន្យាការងារគ្មានថិរវេលាកំណត់ ចំពោះកម្មករ និយោជិក ដែលធ្វើការក្នុងក្រុមហ៊ុនចាប់ពី ២ឆ្នាំឡើងទៅ។
អ្នកស្រី ភី ធី ជាអ្នកតវ៉ាមួយរូបក្នុងចំណោមអ្នកតវ៉ាជាច្រើនរូប បានឲ្យដឹងថា រហូតដល់ថ្ងៃទី៣ នៃការធ្វើបាតុកម្ម ក្រុមហ៊ុនមិនចេញមកដោះស្រាយទេ តែមានមេការស្ត្រី បានទូរស័ព្ទហៅពួកគាត់ឲ្យទៅជួយលក់ស្រាបៀរ ដោយបានសន្យាជួយចេញប្រាក់ថ្លៃម៉ូតូឌុប។
អ្នកស្រីថា មានស្ត្រីកំពុងឈរតវ៉ាខ្លះខ្លាចបាត់បង់ការងារ និងប្រាក់ចំណូល ក៏ព្រមទៅជួយលក់ស្រាបៀរវិញ កាលពីរសៀលថ្ងៃអង្គារ ធ្វើឲ្យកម្លាំងតវ៉ាជាស្ត្រីហាក់ថយចុះនៅថ្ងៃពុធ ទី២៧ ខែកក្កដា តែកើនចំនួនបុរសមកពីសហជីពផ្សេងៗ បានមកចូលរួមតវ៉ាដោយមានជួយទូងស្គរតវ៉ា។
ក្រុមស្ត្រីឈរតវ៉ានៅមុខក្រុមហ៊ុនស្រាបៀរ ខេមប៊្រូវ អះអាងថា នៅថ្ងៃទី២៧ ខែកក្កដានេះ គ្មានសមត្ថកិច្ចបង្ក្រាបពួកគាត់ទេ គឺសមត្ថកិច្ចជួយការពារសន្តិសុខដល់ពួកគាត់ និងការពារសុវត្ថិភាពភ្ញៀវធ្វើដំណើរកាត់មហាវិថីព្រះនរោត្តម។
ស្រ្តី និងសហជីពធ្វើការក្នុងក្រុមហ៊ុនស្រាបៀរ ខេមប៊្រូវ ឲ្យដឹងថា មានស្ត្រីផ្សព្វផ្សាយស្រាបៀរអង្គរ ប្រមាណ ៤៥០នាក់ និងបុគ្គលិកផ្សេងទៀតសរុបប្រមាណ ៥០០នាក់៕