អ្នកស្រី លី មុំ បានរៀបរាប់ឲ្យដឹងក្រោយពេលអ្នកស្រី និងតំណាងអ្នកភូមិ ៧នាក់ផ្សេងទៀត បានចូលទៅជួបមន្ត្រីខុទ្ទកាល័យនៃទីស្ដីការគណៈរដ្ឋមន្ត្រីថា មន្ត្រីខុទ្ទកាល័យនៃទីស្ដីការគណៈរដ្ឋមន្ត្រីទទួលបន្ទុកវិវាទដីធ្លី មិនទទួលយកសំណើរបស់ពួកគាត់ទេ ប៉ុន្តែត្រូវបានមន្ត្រីខុទ្ទកាល័យលោកនាយករដ្ឋមន្ត្រី ហ៊ុន សែន បានទទួលយកសំណើនោះ ដោយសន្យាថា គេនឹងបញ្ជូនសំណើនេះទៅលោកនាយករដ្ឋមន្ត្រី។
អ្នកស្រី លី មុំ បានឲ្យដឹងថា ៖ «យើងសង្ឃឹមថា គាត់នឹងដោះស្រាយឲ្យយើង ព្រោះអីប្រជាជនហ្នឹងមកហ្នឹងដើម្បីឲ្យគាត់ដោះស្រាយ ការដោះស្រាយហ្នឹងមិនបានយុត្តិធម៌ ឬយ៉ាងណា យើងនឹងទៅផ្ទះសម្ដេចនាយកម្ដងទៀត!»។
ខ្លឹមសារក្នុងលិខិតស្នើសុំនោះបានបញ្ជាក់ថា សុំឲ្យលោកនាយករដ្ឋមន្ត្រី ហ៊ុន សែន កាត់តំបន់ដែលពួកគាត់កំពុងរស់នៅបច្ចុប្បន្ន ចេញពីគម្រោងអភិវឌ្ឍន៍បឹងកក់ និងសុំផ្ដល់ប្លង់កម្មសិទ្ធិឲ្យពួកគាត់ ព្រោះអ្នកភូមិជាង ៣ពាន់គ្រួសារ ក្នុងនោះមានមន្ត្រីរាជការស៊ីវិល កងកម្លាំងនគរបាលជាតិ កងយោធពលខេមរភូមិន្ទ និងប្រជាពលរដ្ឋរស់នៅចំនួន ៨ភូមិ គឺភូមិ១ ភូមិ៣ ភូមិ៦ ភូមិ២០ ភូមិ២១ ភូមិ២២ ភូមិ២៣ និងភូមិ២៤ ដែលបានរស់នៅជាអចិន្ត្រៃយ៍នៅក្នុងភូមិទាំងនេះតាំងពីឆ្នាំ១៩៧៩មក។
អ្នកភូមិជាច្រើនទៀតបានលើកឡើងថា កាលពីឆ្នាំ២០០៦ សាលារាជធានីភ្នំពេញបានចុះទៅវាស់វែងធ្វើប្លង់កម្មសិទ្ធិឲ្យពួកគាត់ ដោយយកប្រាក់ក្នុង ១គ្រួសារ ២ម៉ឺនរៀល ប៉ុន្តែតាំងពីពេលនោះមក គេនៅមិនទាន់បានផ្ដល់ប្លង់កម្មសិទ្ធិឲ្យនៅឡើយ ហើយរដ្ឋាភិបាលបានវិនិយោគតំបន់បឹងកក់នេះឲ្យក្រុមហ៊ុន ស៊ូកាគូ ទៅវិញ។
ក្រុមអ្នកភូមិបានបញ្ជាក់ថា ៖ «ប័ណ្ណកម្មសិទ្ធិហ្នឹង យើងបានទទួលឲ្យធ្វើប្លង់ហ្នឹងនៅថ្ងៃ៤ ខែ៤ ឆ្នាំ២០០៦ អ៊ីចឹងយើងមកសើរើប្លង់ហ្នឹងឡើងវិញ។ គេចង់បានដីពួកខ្ញុំគេប្រមាថថា ពួកខ្ញុំហ្នឹងរស់នៅមិនស្របច្បាប់ សំណង់មិនសមរម្យអី! ខ្ញុំគិតថា ពួកអស់លោកហ្នឹងរស់នៅស្របច្បាប់ ខ្ញុំក៏ស្របច្បាប់ដែរ! កុំចោទថា លើដីរដ្ឋកន្លែងណា! គឺជាដីរដ្ឋទាំងអស់គ្នា ព្រោះអ្នកទាំងអស់គ្នាកើតមក មិនមែនទូលដីមកទេ! ខ្ញុំធ្វើមន្ត្រីរាជការដែរ ក្រុមហ៊ុន ស៊ូកាគូអ៊ីនហ្នឹង កុំលោភលន់ពេក យកតែ ១០០ហិកតារបានហើយ ទុកឲ្យពួកខ្ញុំ ៣០ហិកតារហ្នឹងអភិវឌ្ឍដោយខ្លួនឯង!»។
អភិបាលរងរាជធានីភ្នំពេញ លោក ម៉ាន់ ឈឿន ក៏ដូចជាមន្ត្រីនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន មិនបានធ្វើអត្ថាធិប្បាយអំពីបញ្ហានេះទេ។
ប្រជាពលរដ្ឋបានសម្ដែងនូវការព្រួយបារម្ភថា គម្រោងធ្វើផ្លូវនៅតំបន់បឹងកក់ដែលសាលារាជធានីបានប្រកាសកាលពីពេលថ្មីៗនេះ នឹងប៉ះពាល់ដល់លំនៅដែលពួកគាត់កំពុងរស់នៅបច្ចុប្បន្ន។
ជម្លោះដីនៅតំបន់បឹងកក់នៅកណ្ដាលទីក្រុងភ្នំពេញ មានផ្ទៃដីទំហំ ១៣៣ហិកតារ ដែលប៉ះពាល់ដល់ប្រជាពលរដ្ឋជាង ៤ពាន់គ្រួសារ ហើយក្នុងឆ្នាំ២០០៩កន្លងទៅ ប្រជាពលរដ្ឋជាង ១ពាន់គ្រួសារត្រូវបានគេបណ្ដេញចេញ។
ជម្លោះនេះបានកើតមានឡើងតាំងពីឆ្នាំ២០០៧មក បន្ទាប់ពីក្រុមហ៊ុន ស៊ូកាគូ មានច្បាប់វិនិយោគពីរដ្ឋាភិបាលចំនួន ៩៩ឆ្នាំ អភិវឌ្ឍបឹងកក់ធ្វើទីក្រុងគុជ ឬទីក្រុងថ្មីនៅតំបន់នោះ ក្នុងតម្លៃវិនិយោគទុនជាង ៧៩លានដុល្លារអាមេរិក។
កិច្ចសន្យានោះបានធ្វើឡើងរវាងលោក ឡាវ ម៉េងឃីន ជាសមាជិកព្រឹទ្ធសភានៃគណបក្សប្រជាជនកម្ពុជា និងជាប្រធានក្រុមហ៊ុន ដែលជាអ្នកជួលពីសាលារាជធានីភ្នំពេញ៕