អាជ្ញាធរនៃប្រទេសកម្ពុជា និងវៀតណាម បានសម្រេចបោះតម្រុយបង្គោលកំណត់ព្រំដែនបណ្ដោះអាសន្នលេខ២៧០ កាលពីថ្ងៃ២៥ ខែឧសភាកន្លងមកនេះ នៅភូមិអញ្ចាញ ឃុំជ័យជោគ ស្រុកបុរីជលសា ខេត្តតាកែវ កំពុងតែចោទជាចម្ងល់ចំពោះការបិទបាំងមិនឲ្យមហាជនចូលមើលជាក់ស្ដែងដល់កន្លែងបោះបង្គោលនោះ។
បុរសម្នាក់អះអាងនៅថ្ងៃ៤ ខែមិថុនា ថាជាអ្នកគាំទ្រគណបក្សប្រជាជនកម្ពុជា តែសុំលាក់ឈ្មោះ ថ្លែងថា គាត់សោកស្ដាយដែលសមត្ថកិច្ចខេត្តទៅរារាំងគណបក្សប្រឆាំង មិនឲ្យចូលមើលបង្គោលព្រំដែនបោះបណ្ដោះអាសន្ននោះ។ គាត់ថា រដ្ឋាភិបាលខំធ្វើការស្មោះត្រង់ ឈានទៅបោះបង្គោលព្រំដែនលេខ២៧០ មិនឲ្យមានការទិតៀន តែបែរជាមានក្រុមមនុស្សបង្កឲ្យមានការសង្ស័យកាន់តែច្រើនថា បង្គោលនោះពិតជាបានបោះបណ្ដោះអាសន្ននៅលើដីស្រែអ្នកស្រុក។
បុរសដដែលបានឲ្យដឹងថា ៖ «សូមអស់លោកជាថ្នាក់ដឹកនាំរាជរដ្ឋាភិបាល គួរតែបើកចំហឲ្យគ្រប់គណបក្ស តំណាងរាស្ត្រ ទៅពិនិត្យឲ្យស្គាល់ជាក់ស្ដែង ថាការបិទបាំង ឬក៏មិនបិទបាំង ឲ្យឃើញទាំងអស់គ្នាទៅ! កុំឲ្យគេវាយប្រហារដល់គណបក្សប្រជាជន»។
ការទិតៀននេះបានធ្វើឡើងមួយថ្ងៃ ក្រោយពីក្រុមតំណាងរាស្ត្រគណបក្សប្រឆាំងត្រូវបានរារាំងច្រើនកន្លែង នៅតាមផ្លូវទៅកាន់កន្លែងបោះបង្គោលនោះ ដោយប៉ូលិស និងក្រុមប្រជាជនក្មេងៗ មិនឲ្យចូលទៅមើលដល់កន្លែងបោះបង្គោលព្រំដែនបានទេ។
ប្រជាជនភូមិព្រៃម្លូ ឃុំក្រពុំឈូក ស្រុកកោះអណ្ដែត លោក ត្រាញ់ បានអះអាងថា ៖ «ចង់ដឹងថា បោះបង្គោលលើដីខ្មែរ ឬលើដីវៀតណាម ពិត ឬមិនពិត?»។
ក្រុមប្រឹក្សាស្រុកទ្រាំងគណបក្ស សម រង្ស៊ី លោក ម៉ក់ សោ អះអាងថា ៖ «ខ្ញុំតូចចិត្តណាស់សព្វថ្ងៃ ដែលខ្ញុំមិនបានចុះទៅដល់បង្គោលនោះផ្ទាល់!»។
ក្រុមប្រឹក្សាឃុំត្រពាំងក្រញូង លោក អ៊ូ អែម ថ្លែងថា ៖ «បើរាជរដ្ឋាភិបាលថាមាសសុទ្ធហើយ យើងមិនត្រូវខ្លាចភ្លើងទេ! យើងត្រូវតែបញ្ជូនអ្នកសារព័ត៌មាន និងអ្នកដែលចង់ដឹងហេតុពិតនោះ ឲ្យទៅដល់ទិសដៅ។ ប្រៀបធៀបដូចព្រំដែនខាងលិចនោះ យើងទៅមើលទាំងអស់គ្នា សៀមវាចង់ឈ្លានពានមែន! ឯផ្នែកខាងកើតនេះ គ្រាន់តែបោះទៅនេះ ខ្មែរយើងចង់ដឹងការពិត តើបោះលើដីខ្មែរ ឬលើបន្ទាត់ព្រំដែន គឺអាជ្ញាធរមិនឲ្យចូល!»។
ទាក់ទិននឹងបញ្ហានេះ ប្រធានក្រុមខណ្ឌសីមាបោះបង្គោលព្រំដែនគោកកម្ពុជាទី៤ លោក ស៊ឹន សុធានី ធ្លាប់មានប្រសាសន៍ប្រាប់វិទ្យុអាស៊ីសេរី កាលពីថ្ងៃពុធ ទី២៦ ឧសភា ថា ការដាំបង្គោលកាលពីថ្ងៃ២៥ ឧសភានោះ មិនបានគិតថា ដាំលើដីស្រែ ឬមិនមែនដីស្រែនោះទេ ព្រោះតំបន់នោះជាវាលស្មៅ។ បើដីស្រែប្រជាជន គឺនៅប្រហែល ២០០ម៉ែត្រ ទៅ ៣០០ម៉ែត្រឆ្ងាយពីទីនោះ។ លោកថា ទីតាំងបង្គោលព្រំដែនមិនអាចដាំទៅតាមចំណង់ចំណូលចិត្តប្រជាជនកម្ពុជា ឬប្រជាជនវៀតណាមទេ គឺដាំទៅតាមផែនទី។
លោកបានឲ្យដឹងថា បង្គោលព្រំដែននៅខេត្តតាកែវ ភាគខាងកើតនៃប្រទេសកម្ពុជា មានចំនួនប្រមាណ ៧៣គីឡូម៉ែត្រ ជាប់នឹងខេត្តពីររបស់ប្រទេសវៀតណាម ដែលគេគ្រោងដាំបង្គោលចំនួន ៣៧។ ក្នុងចំណោមបង្គោលព្រំទាំង ៣៧ បង្គោលព្រំលេខ២៧០ ដែលកំពុងមានការតវ៉ាពីពលរដ្ឋខ្មែរនាពេលនេះ ទើបនឹងមានការឯកភាពគ្នាបោះជាតម្រុយនៅឡើយ៕