នាយកនៃសភាពាណិជ្ជកម្មរបស់ប្រទេសបេឡារូស លោក ម៉ីកហៀល មីយ៉ាតលីកូវ (Mikhail Myatlikov) និងអនុប្រធានសភាពាណិជ្ជកម្មនៃប្រទេសកម្ពុជា លោកឧកញ៉ា ស៊ន សុខណា នៅថ្ងៃទី១១ ខែកុម្ភៈ បានចុះហត្ថលេខាទ្វេភាគីលើកដំបូងលើកិច្ចព្រមព្រៀងពាណិជ្ជកម្មរវាងប្រទេសទាំងពីរ ដើម្បីបើកផ្លូវឲ្យប្រទេសកម្ពុជា និងប្រទេសបេឡារូស ផ្លាស់ប្តូរទំនិញពាណិជ្ជកម្មទៅវិញទៅមកនៅថ្ងៃអនាគត។
ផ្អែកតាមកិច្ចព្រមព្រៀងនោះ គឺតម្រូវឲ្យភាគីទាំងពីរផ្ដល់ព័ត៌មាន និងផ្លាស់ប្ដូរប្រតិភូពាណិជ្ជកម្មរវាងប្រទេសទាំងពីរ ដោយរៀបចំកិច្ចប្រជុំ និងព្រឹត្តិការណ៍តាំងពិព័រណ៍ពាណិជ្ជកម្មនានា ដើម្បីឲ្យយល់ដឹងអំពីវិស័យជំនួញ សេដ្ឋកិច្ច និងការនាំចេញរវាងប្រទេសទាំងពីរ។
ជាមួយគ្នានេះ កិច្ចព្រមព្រៀងនោះបានចែងទៀតថា ភាគីទាំងពីរផ្សព្វផ្សាយអំពីសក្ដានុពលនៃការនាំចេញរបស់ក្រុមហ៊ុននានា ដែលជាក្រុមហ៊ុនខ្នាតតូច និងក្រុមហ៊ុនខ្នាតមធ្យមជាដើម។
អនុប្រធានសភាពាណិជ្ជកម្មនៃប្រទេសកម្ពុជា លោកឧកញ៉ា ស៊ន សុខណា បានមានប្រសាសន៍ប្រាប់វិទ្យុអាស៊ីសេរី ក្រោយពីការចុះហត្ថលេខានោះថា កម្ពុជាត្រៀមនាំចេញផលិតផលណាដែលក្រុមហ៊ុននានានៅប្រទេសបេឡារូស ត្រូវការពីកម្ពុជា។
លោកឧកញ៉ា ស៊ន សុខណា៖ «ឥឡូវនេះចាប់អនុវត្តខ្លះហើយ មានរៀបចំ។ គេទើបរៀបចំហ្នឹងដោយសារតែខាងខ្មែរយើងនាំចូលត្រាក់ទ័រហ្នឹងពីប្រទេសបេឡារូសយូរមកហើយ ច្រើនឆ្នាំហើយ តែដល់ឥឡូវនេះគេរៀបចំដំឡើងជារោងចក្រដំឡើងត្រាក់ទ័រនៅខ្មែរហ្នឹង។ អ៊ីចឹងបន្តិចទៀតគេរៀបចំពិធីបើកសម្ពោធជាផ្លូវការ ហើយគេធ្វើនៅកន្លែងដំឡើងត្រាក់ទ័រនៅព្រែកលៀប ផ្លូវជាតិលេខ ៦អា ដោយសារតែមានអ្នកវិនិយោគខ្មែរម្នាក់ហ្នឹង គាត់បាននាំចូលត្រាក់ទ័រហ្នឹងពីប្រទេសបេឡារូស ហើយបេឡារូសហ្នឹងគេបានយល់ព្រមបង្កើតរោងចក្រដំឡើងត្រាក់ទ័រហ្នឹងនៅខ្មែរ ជាពិសេសយើងផ្ដោតលើការនាំចូលជីគីមី ហើយនឹងគ្រឿងយន្តកសិកម្មមួយចំនួនទៀត»។
ប្រធានសភាពាណិជ្ជកម្មនៃប្រទេសបេឡារូស លោក ម៉ីកហៀល មីយ៉ាតលីកូវ បានមានប្រសាសន៍ភាសាបេឡារូស ហើយត្រូវបានប្រែសម្រួលជាភាសាខ្មែរថា ប្រទេសកម្ពុជា និងប្រទេសបេឡារូស នៅឆ្ងាយពីគ្នាមែន ប៉ុន្តែផ្ទៃដីក្រឡាប្រទេសទាំងពីរមានទំហំដូចគ្នា និងមានសក្ដានុពលសេដ្ឋកិច្ចរៀងៗខ្លួន ដើម្បីតភ្ជាប់ពាណិជ្ជកម្មជាមួយគ្នា។
លោក ម៉ីកហៀល មីយ៉ាតលីកូវ៖ «ឯកឧត្ដមបានដឹងហើយនៅប្រទេសបេឡារូស គឺជាប្រទេសមួយធំជាងគេដែរក្នុងការផលិតជីគីមីកសិកម្ម។ នៅប្រទេសកម្ពុជា យើងមានកំពង់ផែដ៏ធំ ហើយខ្ញុំណែនាំឲ្យបានស្គាល់នូវឯកឧត្ដមដែលធ្វើពាណិជ្ជកម្មខាងផ្នែកជីគីមីហ្នឹង ដើម្បីនាំចូលមកដោយត្រង់តែម្ដង»។
លោក ម៉ីកហៀល មីយ៉ាតលីកូវ បានឲ្យដឹងថា ប្រទេសបេឡារូស ត្រូវការនាំចូលអង្ករ ត្រី កៅស៊ូស្រស់ និងថ្នាំជក់ពីកម្ពុជា នៅគ្រាប្រទេសនេះមានសក្ដានុពលក្នុងការផលិតត្រាក់ទ័រ ជីគីមីកសិកម្ម រថយន្តធំៗ គ្រឿងចក្រទំនើបៗ រោងចក្រស្លដែក និងគ្រឿងអេឡិចត្រូនិកជាដើម សម្រាប់នាំចូលកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។