លោក កុយ គួង អ្នកនាំពាក្យក្រសួងការបរទេសខ្មែរបានមានប្រសាសន៍ថា កិច្ចចរចាដែលគ្រោងនឹងធ្វើឡើងនៅទីក្រុងភ្នំពេញនាថ្ងៃទី៦-៧ មេសានេះ នឹងមិនមានអ្វីប្រែប្រួលនោះទេ។
លោក កុយ គួង បានឲ្យដឹងថា ៖ «កិច្ចប្រជុំហ្នឹងធ្វើនៅទីស្ដីការគណៈរដ្ឋមន្ត្រីខ្មែរយើងហ្នឹង។ កិច្ចប្រជុំនេះហៅកិច្ចប្រជុំគណៈកម្មការព្រំដែនចម្រុះ ហៅ JDC ដែលមានខាងភាគីកម្ពុជាយើងដឹកនាំដោយឯកឧត្ដម វ៉ា គឹមហុង ហើយភាគីខាងថៃគឺលោក វ៉ាស៊ីន ដែលលោកធ្លាប់ដឹកនាំ JDCហ្នឹង ប្រជុំចុងក្រោយនៅសៀមរាប ក៏ដូចជាចុងក្រោយនេះនៅបាងកក ហើយកិច្ចប្រជុំពីថ្ងៃស្អែក ថ្ងៃខានស្អែកនេះ គឺយើងបន្តពិភាក្សាអំពីកំណត់ហេតុហើយនិងកិច្ចព្រមព្រៀងបណ្ដោះអាសន្នដែលយើងមិនទាន់បានបញ្ចប់នៅសៀមរាបក៏ដូចជានៅបាងកកនាពេលចុងក្រោយនេះ»។
លោក កុយ គួង ក៏បានបញ្ជាក់អំពីចំណុចខ្លះៗដែលនឹងត្រូវធ្វើការចរចានោះ ជាពិសេសគឺបញ្ហាព្រំដែនដែលកំពុងមានបញ្ហានៅក្បែរប្រាសាទព្រះវិហារ។
លោក កុយ គួង បានបញ្ជាក់ថា ៖ «នេះគេហៅថា គណៈកម្មការបច្ចេកទេស ដូច្នេះគេពិភាក្សាតែទៅលើរឿងបញ្ហាបច្ចេកទេស ដូចជាបញ្ហាការវាស់វែងកំណត់បង្គោលសីមា បោះបង្គោលហើយនិងការដោះមីនអីជាដើម។ ជាការពិតគឺផ្ដោតទៅលើតំបន់ដែលមានបញ្ហាជាមុន»។
កាលពីថ្ងៃសុក្រទាហានខ្មែរនិងទាហានថៃបានវាយប្រយុទ្ធគ្នាពីរលើកនៅត្រង់ចំណុចព្រលានឥន្ទ្រីនៅចំណុចចង្កេះភ្នំទ្រព្យនិងចំណុចសំបុកឃ្មុំក្បែរបរិវេណប្រាសាទព្រះវិហារ ហើយត្រូវបានគេរាយការណ៍ថា កងទាហានថៃបានស្លាប់និងរងរបួសជាច្រើននាក់ រីឯខាងភាគីកម្ពុជាមិនមានរបាយការណ៍ស្ដីអំពីគ្រោះថ្នាក់នោះទេ។
លោក វ៉ា គឹមហុង ប្រធានគណៈកម្មាធិការព្រំដែនកម្ពុជាបានមានប្រសាសន៍ថា តាមគម្រោងគណៈប្រតិភូថៃដែលនឹងចរចាអំពីបញ្ហាព្រំដែននោះអាចនឹងមកដល់ប្រទេសកម្ពុជានៅល្ងាចថ្ងៃអាទិត្យ ទី៥ មេសានេះ។
លោក វ៉ា គឹមហុង បានមានប្រសាសន៍ថា ៖ «នៅដដែល អត់មានកែប្រែទេ ស្អែក ខានស្អែក ២ថ្ងៃ អត់មានប្រែប្រួលទេរហូតមកដល់ថ្ងៃនេះ»។
បញ្ហាជម្លោះព្រំដែនកម្ពុជាថៃជាពិសេសនៅតំបន់ក្បែរប្រាសាទព្រះវិហារបានពុះកញ្ជ្រោលឡើងនៅពេលដែលប្រទេសកម្ពុជាបានដាក់បញ្ចូលប្រាសាទព្រះវិហារជាបេតិកភណ្ឌពិភពលោក កាលពីដើមខែកក្កដា ឆ្នាំ២០០៨ ហើយកងទ័ពថៃបានចាប់ផ្តើមការលុកលុយនៅតំបន់នោះធ្វើឲ្យមានការប្រយុទ្ធគ្នាជាច្រើនលើកដែលបណ្តាលឲ្យស្លាប់មនុស្សនិងរបួសជាច្រើននាក់៕