សេចក្ដីសម្រេចរបស់លោក ហ៊ុន សែន ចេញកាលពីថ្ងៃទី៣ ខែមីនា ហើយបានផ្សាយជាសាធារណៈកាលពីថ្ងៃអង្គារ ទី១៥ ខែមីនា បានចាត់តាំងលោក ហោ ណាំហុង រដ្ឋមន្ត្រីក្រសួងការបរទេស និង លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន និងមន្ត្រីមួយចំនួនទៀត រៀបចំពាក្យបណ្ដឹង និងឯកសារទៅតុលាការយុត្តិធម៌អន្តរជាតិ ដើម្បីបកស្រាយសាលក្រមខ្លួនថ្ងៃទី១៥ ខែមិថុនា ឆ្នាំ១៩៦២។
លោក ហ៊ុន សែន បញ្ជាក់បន្ថែមថា ក្រុមការងារត្រូវបន្តទំនាក់ទំនងការងារជាមួយតុលាការយុត្តិធម៌អន្តរជាតិរហូតដល់ទទួលបានលទ្ធផលបញ្ចប់នៃការបកស្រាយសាលក្រមខាងលើ។
លោក ហ៊ុន សែន កាលពីថ្ងៃទី១៤ ខែមីនា មានប្រសាសន៍ឲ្យដឹងថា ការបកស្រាយរបស់តុលាការយុត្តិធម៌អន្តរជាតិ ជាការចាំបាច់ដើម្បីស្វែងរកដំណោះស្រាយជម្លោះព្រំដែន ៖ «ដល់តុលាការអន្តរជាតិ (ក្រុង) ឡាអេ ឡើងវិញហើយ បកស្រាយសាលក្រម។ បើឃើញថា កម្ពុជានៅលើដីគេ យើងសុខចិត្តថយ ប៉ុន្តែបើអ្នកឯងនៅលើដីខ្ញុំ អ្នកឯងថយ! យើងគោរពសាលក្រមតុលាការអន្តរជាតិទាំងអស់គ្នា»។
សេចក្ដីប្រកាសព័ត៌មានរបស់តុលាការយុត្តិធម៌អន្តរជាតិ ផ្សាយនៅលើគេហទំព័រតុលាការ បានបញ្ជាក់ថា សេចក្ដីសម្រេចរបស់តុលាការដែលមានការគាំទ្រភាគច្រើន កាលពីថ្ងៃទី១៥ មិថុនា ឆ្នាំ១៩៦២ បានរកឃើញថា ប្រាសាទព្រះវិហារស្ថិតនៅក្នុងបូរណភាពទឹកដីកម្ពុជា។ សេចក្តីសម្រេចក៏បានបញ្ជាឲ្យថៃ ដកកងទ័ព ឬក៏ប៉ូលិសខ្លួនចេញពីប្រាសាទ និងតំបន់ជុំវិញបរិវេណប្រាសាទព្រះវិហារ។
សាលក្រមតុលាការក៏បានបញ្ជាឲ្យថៃ មានតួនាទីប្រគល់ចម្លាក់បុរាណ និងបំណែកប្រាសាទទាំងឡាយណាដែលបានផ្លាស់ប្ដូរទីកន្លែងដោយសារអាជ្ញាធរថៃ ចាប់ពីការគ្រប់គ្រង់ប្រាសាទព្រះវិហារចាប់តាំងពីឆ្នាំ១៩៥៤។
លោក សម រង្ស៊ី ប្រធានគណបក្ស សម រង្ស៊ី កាលពីថ្ងៃអង្គារ ទី១៥ ខែមីនា បានសម្ដែងការគាំទ្រពាក្យបណ្តឹងរបស់រដ្ឋាភិបាលកម្ពុជា ឲ្យមានការបកស្រាយសាលក្រមទាក់ទងនឹងប្រាសាទព្រះវិហារ។
លោក សម រង្ស៊ី បន្តថា កម្ពុជាចាំបាច់ស្នើឲ្យប្រទេសឥណ្ឌូណេស៊ី ធ្វើការកោះប្រជុំប្រទេសជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ដើម្បីស្វែងរកការធានាមិនឲ្យមានការរំលោភបូរណភាពទឹកដីខ្មែរ។
លោក សម រង្ស៊ី មានប្រសាសន៍បន្ថែម ៖ «ប្រទេសឥណ្ឌូណេស៊ី មិនគ្រាន់តែជាប្រធានសហគមន៍អាស៊ានទេ ប៉ុន្តែប្រទេសឥណ្ឌូណេស៊ី គឺជាសហប្រធាននៃសន្និសីទអន្តរជាតិទីក្រុងប៉ារីស ស្ដីពីកម្ពុជា គឺប្រទេសឥណ្ឌូណេស៊ី ជាមួយនឹងប្រទេសបារាំង ដែលជាសហប្រធានមួយទៀតនោះ គឺមានតួនាទីពិនិត្យស្ថានការណ៍នៅប្រទេសដែលបណ្ដាលមកពីការឈ្លានពានពីសំណាក់ប្រទេសថៃ...»។
លោក ហ៊ុន សែន កាលពីថ្ងៃច័ន្ទ ទី១៤ ខែមីនា ក៏បានអំពាវនាវជាថ្មីម្ដងទៀតឲ្យប្រទេសឥណ្ឌូណេស៊ី បញ្ជូនក្រុមអ្នកសង្កេតការណ៍ឥណ្ឌូណេស៊ី មកប្រទេសកម្ពុជា ដោយផ្ទាល់តែម្ដង នៅពេលដែលប្រទេសថៃ នៅមានការស្ទាក់ស្ទើរក្នុងការទទួលយកអ្នកសង្កេតការណ៍ឥណ្ឌូណេស៊ី មកត្រួតពិនិត្យការផ្ទុះអាវុធនៅតំបន់មានជម្លោះព្រំដែនកម្ពុជា-ថៃ ក្បែរប្រាសាទព្រះវិហារ។
កម្ពុជាបានរៀបចំទទួលក្រុមអ្នកសង្កេតការណ៍ឥណ្ឌូណេស៊ី ដោយមានរៀបចំជាគណៈកម្មការដែលមានមន្ត្រីកម្ពុជា ឋានៈជាឧបនាយករដ្ឋមន្ត្រី ដើម្បីធ្វើការជាមួយក្រុមអ្នកសង្កេតការណ៍ទាំងនោះ។
កម្ពុជា និងថៃ មានគម្រោងជួបប្រជុំគ្នារវាងគណៈកម្មការព្រំដែនរួម (GBC) និងគណៈកម្មការចម្រុះខណ្ឌសីមា និងបោះបង្គោលព្រំដែន (JBC) កម្ពុជា និងថៃ នៅឥណ្ឌូណេស៊ី នៅថ្ងៃទី២៤ និង ២៥ មីនា នោះ៕