លោកនាយករដ្ឋមន្ត្រី ហ៊ុន សែន នៅថ្ងៃទី១៤ ខែកុម្ភៈ ឆ្នាំ២០១២ បានចាត់ទុកប្រទេសចិន ជាអ្នកបានចូលរួមចំណែកយ៉ាងច្រើន និងយ៉ាងសំខាន់ក្នុងការផ្ដល់ប្រាក់កម្ចីដោយគ្មានលក្ខខណ្ឌសំរាប់ប្រទេសកម្ពុជា ជាពិសេសចំណាយលើការសាងសង់ផ្លូវជាតិ និងសាងសង់ស្ពានឆ្លងកាត់ទន្លេជាច្រើនកន្លែង។
ផ្លូវជាតិលេខ៦ ដែលបានបើកការដ្ឋានសាងសង់ និងពង្រីកឲ្យធំទូលាយនេះ គឺចាប់ពីស្ពានជ្រោយចង្វារ នៅរាជធានីភ្នំពេញ កាត់តាមខេត្តកណ្តាល ខេត្តកំពង់ចាម ខេត្តកំពង់ធំ និងឆ្ពោះទៅកាន់ខេត្តសៀមរាម ជាទីក្រុងអង្គរ និងជាតំបន់ដែលមានសក្ដានុពលផ្នែកទេសចរណ៍ដ៏សំខាន់នៃប្រទេសកម្ពុជា។
លោក ហ៊ុន សែន បានមានប្រសាសន៍ទៅកាន់ប្រជាពលរដ្ឋខ្មែរជាច្រើនពាន់នាក់នៅក្នុងពិធីបើកការដ្ឋានសាងសង់ផ្លូវជាតិលេខ ៦ នៅចំណុចសង្កាត់ព្រែកលៀប ខណ្ឌឫស្សីកែវ រាជធានីភ្នំពេញថា ផ្លូវជាតិលេខ ៦ នេះ ជាផ្លូវនាគវាត់កន្ទុយ និងមានសារសំខាន់យ៉ាងខ្លាំង។
លោក ហ៊ុន សែន៖ «តួនាទីផ្លូវហ្នឹងវាសំខាន់សំរាប់យើង។ តភ្ជាប់មួយជុំ ជុំវិញបឹងទន្លេសាប ចេញមកពីចំណងទាក់ទងដ៏ល្អរវាងព្រះរាជាណាចក្រកម្ពុជា ជាមួយសាធារណរដ្ឋប្រជាមានិតចិន ដែលបានកសាងឡើង តាំងពីអ្នកដឹកនាំជំនាន់មុន គឺសម្ដេចព្រះ នរោត្តម សីហនុ ព្រះវរបិតាជាតិខ្មែរ ជាមួយអ្នកដឹកនាំចិន តាំងពីជំនាន់មុននោះ ម៉ៅ សេទុង ជូ អេងឡាយ...»។
ឯកអគ្គរដ្ឋទូតចិនប្រចាំនៅប្រទេសកម្ពុជា លោក ផាន ហ្គួងហ្សេ បានមានប្រសាសន៍ជាភាសាចិន ហើយត្រូវបានប្រែសម្រួលជាភាសាខ្មែរថា ផ្លូវជាតិលេខ៦នេះ គឺជាផ្លូវសេដ្ឋកិច្ច និងទេសចរណ៍នៅកម្ពុជា៖ «ផ្លូវលេខ៦ ជាសរសៃឈាមដ៏ធំមួយរបស់សេដ្ឋកិច្ចប្រទេសកម្ពុជា។ ផ្លូវនេះមិនត្រឹមតែតភ្ជាប់ពីភ្នំពេញ ទៅប្រាសាទអង្គរដែលជារតនៈសម្បត្តិរបស់អរិយធម៌ប្រទេសកម្ពុជា និងឈានជំហានទៅដល់ខេត្តបន្ទាយមានជ័យ និងក្លាយទៅជាច្រករបៀងសេដ្ឋកិច្ច ដែលតភ្ជាប់ជាមួយប្រទេសថៃ»។
ដំណើរការសាងសង់ផ្លូវជាតិលេខ៦នេះ និងស៊ីរយៈពេល ៣ឆ្នាំ ចាប់ពីឆ្នាំ២០១២ ដល់ឆ្នាំ២០១៥ ក្រោមប្រាក់កម្ចីរបស់ប្រទេសចិន ចំនួនជាង ៧០លានដុល្លារអាមេរិក សាងសង់ដោយក្រុមហ៊ុនសៀងហៃ គ្រុប (Shanghai Group)។ គំរោងសាងសង់នេះគឺជាគំរោងមួយនៅក្នុងចំណោមគំរោងអភិវឌ្ឍន៍ចំនួន ៧ ជាង ៥០០លានដុល្លារអាមេរិក ក្រោមប្រាក់កម្ចីពីប្រទេសចិន។
គំរោងសាងសង់ផ្លូវជាតិលេខ៦នេះ បានធ្វើឡើង គឺដោយសារតែមានកំណើនប្រជាពលរដ្ឋខ្មែរច្រើនជាងមុន និងមានចរាចរណ៍លើផ្លូវជាតិនេះកាន់តែចង្អៀតជាងមុន។
នៅក្នុងឱកាសនោះដែរ លោកនាយករដ្ឋមន្ត្រី ហ៊ុន សែន បានសម្រេចដាក់ឈ្មោះផ្លូវជាតិនេះឲ្យមានឈ្មោះតែមួយ គឺផ្លូវជាតិលេខ៦។ កន្លងមកផ្លូវនេះគឺមួយផ្នែកមានឈ្មោះថា ផ្លូវ៦អា (6A) ដែលបានជួសជុលដោយប្រទេសជប៉ុន ក្រោយពីប្រទេសកម្ពុជា បានរៀបចំការបោះឆ្នោតសាកលលើកដំបូងនៅឆ្នាំ១៩៩៣៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។