ការឯកភាពនេះបានធ្វើឡើងនៅក្នុងកិច្ចប្រជុំលើកទី៣១ របស់នាយនគរបាលអាស៊ាន នៅក្នុងប្រទេសឡាវ នៅថ្ងៃទី៣១ ខែឧសភា ដល់ថ្ងៃទី២ ខែមិថុនា ឆ្នាំ២០១១ កន្លងទៅនេះ។
បទឧក្រិដ្ឋអន្តរជាតិដែលគេបានរួមដៃគ្នាប្រយុទ្ធប្រឆាំងនោះ មានដូចជាអំពើភេរវកម្ម ការជួញដូរគ្រឿងញៀន ការជួញដូរមនុស្ស ការជួញដូរអាវុធខុសច្បាប់ ការលាងលុយខុសច្បាប់ បទល្មើសពាណិជ្ជកម្ម បទល្មើសឆ្លងដែនខុសច្បាប់ និងបទល្មើសបច្ចេកវិទ្យាជាដើម។
អ្នកនាំពាក្យអគ្គស្នងការដ្ឋាននគរបាលជាតិកម្ពុជា លោកឧត្ដមសេនីយ៍ឯក គៀត ចន្ថារិទ្ធ ដែលទើបបានវិលត្រឡប់ពីការចូលរួមក្នុងកិច្ចប្រជុំនោះ បានមានប្រសាសន៍នៅថ្ងៃទី៧ ខែមិថុនា ថា តំណាងប្រទេសសមាជិកអាស៊ានចំនួន ១០ និងប្រទេសជាដៃគូ បានចុះហត្ថលេខាលើកំណត់ហេតុរួមគ្នា ស្ដីពីការប្រយុទ្ធប្រឆាំងបទឧក្រិដ្ឋទាំងនោះ។
លោក គៀត ចន្ថារិទ្ធ មានប្រសាសន៍បន្តដូច្នេះ ៖ «ដើម្បីធ្វើយ៉ាងណារក្សាសន្តិសុខ ស្ថិរភាពនៅក្នុងតំបន់អាស៊ានរបស់យើង ប្រឆាំងអំពើឧក្រិដ្ឋកម្មគ្រប់បែបយ៉ាង ដែលខ្ញុំរៀបរាប់អម្បាញ់មិញ។ កម្ពុជាយើងក៏ទទួលបានលទ្ធផលសហប្រតិបត្តិការ ដើម្បីពង្រឹងសន្តិសុខប្រឆាំងឧក្រិដ្ឋកម្មឆ្លងដែននៅក្នុងព្រះរាជាណាចក្រកម្ពុជាយើងដែរ»។
គេបានយល់ព្រមបង្កើតទូរស័ព្ទហៅជាបន្ទាន់ ឬ ហតឡាញ (Hotline) ដើម្បីទាក់ទងគ្នានៅក្នុងតំបន់ប្រឆាំងអំពើឧក្រិដ្ឋកម្មទាំងនោះ។
ប្រទេសជាដៃគូទាំងនោះមានដូចជា ប្រទេសចិន (China) ប្រទេសកូរ៉េខាងត្បូង (South Korea) ប្រទេសជប៉ុន (Japan) ប្រទេសអូស្ត្រាលី (Australia) និងប្រទេសនូវែលហ្សេឡង់ (New Zealand) ព្រមទាំងមានតំណាងមកពីប៉ូលិសអន្តរជាតិ អ៊ិនធើផូល និងលេខាធិការដ្ឋានអាស៊ាន។
វិធានការពង្រឹងសន្តិសុខនៅក្នុងតំបន់នោះ គឺនៅស្របពេលដែលមន្ត្រីជាន់ខ្ពស់រដ្ឋាភិបាលកម្ពុជា កំពុងតែមានព្រួយបារម្ភអំពីស្ថានការណ៍គ្រឿងញៀននៅក្នុងប្រទេសកម្ពុជា។
រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី១ ខែមិថុនា កន្លងមកនេះ បានមានប្រសាសន៍ថា ក្រុមឧក្រិដ្ឋជនកំពុងតែព្យាយាមប្រើប្រាស់ប្រទេសកម្ពុជា ជាទីតាំងផលិតគ្រឿងញៀន ចែកចាយ ឆ្លងកាត់ ប្រើប្រាស់គ្រឿងញៀន និងនាំចេញគ្រឿងញៀននៅក្នុងតំបន់ ប៉ុន្តែលោកបានជំរុញឲ្យអាជ្ញាធរនគរបាលកម្ពុជា បន្តបង្ក្រាបបទល្មើសគ្រឿងញៀនឲ្យខ្លាំងក្លា និងប្រសិទ្ធភាព នៅឆ្នាំ២០១១។
លោក ស ខេង បានថ្លែងដូច្នេះ ៖ «ខ្ញុំគិតថា បើសិនណាបញ្ហានេះនៅតែបណ្ដែតបណ្ដោយទៀត គឺប្រហែលជាប្រសិទ្ធភាពនៃការប្រយុទ្ធប្រឆាំងគ្រឿងញៀនក៏នៅតែមានបញ្ហា។ តែទុកឲ្យគ្រឿងញៀនវាត្រួតត្រាយើង យើងពិតជាមានបញ្ហា។ អ៊ីចឹងយើងត្រូវតែត្រួតត្រាគ្រឿងញៀនឲ្យបាន»។
មន្ត្រីអគ្គស្នងការដ្ឋាននគរបាលជាតិកម្ពុជា បានមានប្រសាសន៍ថា ប្រទេសកម្ពុជា មិនមែនជាគោលដៅនៃការវាយប្រហារអំពើភេរវកម្មទេ ប៉ុន្តែកន្លងមកមេដឹកនាំបណ្ដាញភេរវកម្ម ចេ.អាយ (JI) នៅតំបន់អាស៊ី ឈ្មោះ ហាំបាលី (Hambali) បានមកសម្ងំលាក់ខ្លួននៅក្នុងទីក្រុងភ្នំពេញមួយរយៈ។
ក្រោយមក ហាំបាលី ត្រូវបានអាជ្ញាធរថៃ បានចាប់ខ្លួននៅឆ្នាំ២០០៣ កន្លងទៅ ប្រគល់ឲ្យសហរដ្ឋអាមេរិក៕