រដ្ឋមន្ត្រីក្រសួងការបរទេសកម្ពុជា លោក ហោ ណាំហុង និងរដ្ឋមន្ត្រីក្រសួងការបរទេសស៊ែប លោក វុក ហ្សេរ៉េមីក នៅថ្ងៃទី១១ ខែតុលា ឆ្នាំ២០១១ បានឯកភាពគ្នាជាគោលការណ៍ដើម្បីគាំទ្រគ្នាទៅវិញទៅមកនៅលើឆាកអន្តរជាតិ និងពង្រីកកិច្ចសហប្រតិបត្តិការជាមួយគ្នា លើវិស័យកសិកម្ម អប់រំ និងវិស័យយោធារវាងប្រទេសទាំងពីរ។
ការគាំទ្រគ្នានេះ មានដូចជា៖ ប្រទេសស៊ែប គាំទ្រកម្ពុជា ឲ្យក្លាយជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខរបស់អង្គការសហប្រជាជាតិ។ ចំណែកឯភាគីកម្ពុជាវិញ បានគាំទ្រមិនឲ្យមានការបំបែករដ្ឋរបស់ប្រទេសស៊ែប ដោយអាជ្ញាធរនៅកូសូវ៉ូ (Kosovo) ទេ។
ភាគីទាំងពីរគ្រោងចុះហត្ថលេខាលើអនុស្សរណៈយោគយល់គ្នាជាផ្លូវការនាពេលខាងមុខ លើការឯកភាពគ្នានេះ។
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង បានមានប្រសាសន៍នៅក្នុងសន្និសីទកាសែតនៅឯក្រសួងការបរទេសកម្ពុជាថា ប្រទេសកម្ពុជា និងប្រទេសស៊ែប កំពុងតែស្ដារទំនាក់ទំនងល្អឡើងវិញ ៖ «ការទស្សនកិច្ចរបស់ឯកឧត្ដមរដ្ឋមន្ត្រីការបរទេសស៊ែបនេះ ជាការតភ្ជាប់ឡើងវិញ ធ្វើឲ្យមិត្តភាពជាប្រវត្តិសាស្ត្រនេះ ធ្វើឲ្យសហប្រតិបត្តិការដ៏យូរលង់នេះ ធ្វើយ៉ាងម៉េចឲ្យមានជីវភាពរស់រវើកចាប់ផ្ដើមឡើងវិញ»។
ជាមួយគ្នានេះដែរ រដ្ឋមន្ត្រីក្រសួងការបរទេសស៊ែប លោក វុក ហ្សេរ៉េមីក បានមានប្រសាសន៍ថា ទំនាក់ទំនងរវាងប្រទេសទាំងពីរ គឺកម្ពុជា និងស៊ែប នៅក្នុងប្រវត្តិសាស្ត្រ គឺស្មើភាពគ្នា ជាមិត្តភាព និងកិច្ចសហប្រតិបត្តិការល្អប្រសើរកន្លងមក ៖ «យើងគាំទ្រគ្នាទៅវិញទៅមកយ៉ាងពេញទំហឹងលើបញ្ហានានានៅលើឆាកអន្តរជាតិ។ យើងបន្តបែបនេះ នៅថ្ងៃអនាគតទៀត។ យើងបានចាត់ទុកកម្ពុជា ជាមិត្តភ័ក្ដិគួរជាទីទុកចិត្តគ្នាទៅវិញទៅមក។ ខ្ញុំមានការរីករាយណាស់នៅថ្ងៃនេះ ចំពោះការគាំទ្រ និងសាមគ្គីភាពនេះ។ បើសិនណាយើងអនុញ្ញាតឲ្យមានការបំបែករដ្ឋនោះ នៅថ្ងៃក្រោយទៀតនឹងមានការចង់បំបែករដ្ឋនៅកន្លែងដទៃទៀត»។
ចំណុចសំខាន់ៗដែលលោក ហោ ណាំហុង និងលោក វុក ហ្សេរ៉េមីក បានឯកភាពគ្នានៅថ្ងៃទី១១ ខែតុលា ឆ្នាំ២០១១ មានជាអាទិ ទី១ ប្រទេសស៊ែប ទទួលនិស្សិតអាហារូបករណ៍ពីប្រទេសកម្ពុជា នៅឆ្នាំ២០១២។ ទី២ បន្តកិច្ចសហប្រតិបត្តិការលើវិស័យការពារជាតិ ទី៣ បន្តកិច្ចសហប្រតិបត្តិការលើវិស័យកសិកម្ម ពាណិជ្ជកម្ម សេដ្ឋកិច្ច និងទេសចរណ៍។ ទី៤ ភាគីកម្ពុជា និងភាគីស៊ែប បានឯកភាពគ្នាលើកលែងទិដ្ឋាការដើម្បីជំរុញឲ្យមានទស្សនកិច្ច និងទេសចរណ៍រវាងប្រទេសទាំង២៕