រដ្ឋមន្ត្រីក្រសួងការបរទេសកម្ពុជា លោក ហោ ណំាហុង និងជាឧបនាយករដ្ឋមន្ត្រី នៅថ្ងៃទី២ ខែមិថុនា ឆ្នាំ២០១១ បានសម្ដែងការជឿជាក់ថា កម្ពុជានឹងឈ្នះក្ដីជាមួយភាគីថៃ ជាថ្មីទៀត នៅឯតុលាការយុត្តិធម៌អន្តរជាតិ នៅទីក្រុងទ្បាអេ (Haque) ប្រទេសហុល្លង់ (Netherlands) ដោយសារតែភាគីកម្ពុជា មានប្រៀបលើផ្លូវច្បាប់ទល់នឹងភាគីថៃ។
ប្រតិកម្មនេះបានធ្វើឡើងនៅក្នុងសន្និសីទកាសែត នៅថ្ងៃទី២ ខែមិថុនា ឆ្នាំ២០១១ នៅឯអាកាសយានដ្ឋានអន្តរជាតិភ្នំពេញ ក្រោយពីបានវិលត្រឡប់មកពីការចូលរួមក្នុងសវនាការនោះរយៈពេល ២ថ្ងៃ ចាប់ពីថ្ងៃទី៣០ ខែឧសភា ដល់ថ្ងៃទី៣១ ខែឧសភា កន្លងទៅនេះ។
តុលាការយុត្តិធម៌អន្តរជាតិ គ្រោងប្រកាសសេចក្ដីសម្រេចជំហានដំបូងនៅក្នុងរយៈពេល ៤០ថ្ងៃ ឬ ៤៥ថ្ងៃខាងមុខ។
លោក ហោ ណាំហុង បានមានប្រសាសន៍ថា សំណួរជាច្រើនរបស់កម្ពុជា មិនត្រូវបានភាគីថៃ ឆ្លើយតបទេ គឺមានចម្លើយដដែលៗ រីឯភាគីកម្ពុជាវិញ មានហេតុផល និងភស្តុតាងជាច្រើនបង្ហាញក្នុងសវនាការអំពីការឈ្លានពានរបស់កងទ័ពថៃ កន្លងមក។
លោកបន្តថា ៖ «ក្នុង ៣ចំណុចដែលខ្ញុំស្នើ គឺតុលាការគេអាចយកតាមហ្នឹង តុលាការគេអាចយកចំណុចណាមួយក្នុង ៣ហ្នឹង ឬតុលាការគេអាចចេញចំណុចថ្មីណាមួយស្រេចលើគេ»។
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង បានប្ដឹងទៅតុលាការយុត្តិធម៌អន្តរជាតិ កាលពីថ្ងៃទី២៨ ខែមេសា ឆ្នាំ២០១១ កន្លងទៅ ចំនួន ៣ចំណុច ដូចតទៅ ៖ ទី១ សុំឲ្យថៃ ដកកងទ័ពចេញពីតំបន់ក្បែរប្រាសាទព្រះវិហារ គឺតំបន់ ៤,៦គីឡូម៉ែត្រការ៉េ ទី២ ហាមឃាត់រាល់សកម្មភាពយោធាថៃ នៅតំបន់ប្រាសាទព្រះវិហារ ឬការឈ្លានពាន និងទី៣ បញ្ឈប់រាល់សកម្មភាពដែលបង្ករឿងដោយភាគីថៃ ធ្វើឲ្យមានស្ថានការណ៍តានតឹង។
ភាគីថៃ ដឹកនាំដោយរដ្ឋមន្ត្រីក្រសួងការបរទេសថៃ លោក កាស៊ីត ភិរម្យ (Kasit Piromya) បានសុំឲ្យតុលាការយុត្តិធម៌អន្តរជាតិ បដិសេធសំណើរបស់កម្ពុជា និងបានប្រាប់ទៅតុលាការថា ពុំមានយុត្តាធិការសម្រេចលើបញ្ហាទឹកដី។
អ្នកវិភាគឯករាជ្យលើស្ថានការណ៍ជម្លោះរវាងថៃ និងកម្ពុជា លោកបណ្ឌិត ទ្បៅ ម៉ុងហៃ បានមានប្រសាសន៍ថា តុលាការយុត្តិធម៌អន្តរជាតិពិបាកទទួលយកសំណើរបស់ថៃ ៖ «ជាការឈ្លានពានរបស់ថៃ មកលើតំបន់ដែលសេចក្ដីសម្រេចរបស់តុលាការ ឆ្នាំ១៩៦២ បានសម្រេចទទួលស្គាល់ថា ជារបស់ខ្មែរ គឺស្ថិតក្រោមអធិបតេយ្យភាពរបស់ខ្មែរ គឺដែនដីខ្មែរ»។
ភាគីកម្ពុជា បានសម្រេចប្ដឹងទៅតុលាការយុត្តិធម៌អន្តរជាតិ ដោយសារតែភាគីថៃ បានឈ្លានពានកម្ពុជា ចំនួន ៣លើកធំៗ គឺទី១ ថ្ងៃទី១៥ ខែកក្កដា ឆ្នាំ២០០៨ ទី២ គឺថ្ងៃទី៤ ដល់ថ្ងៃទី៧ ខែកុម្ភៈ ឆ្នាំ២០១១ និងទី៣ គឺនៅថ្ងៃទី២២ ខែមេសា ដល់ថ្ងៃទី៤ ខែឧសភា ឆ្នាំ២០១១ នៅតំបន់ប្រាសាទព្រះវិហារ និងប្រាសាទតាមាន់ និងប្រាសាទតាក្របី ខេត្តឧត្តរមានជ័យ។
ព័ត៌មានដែលមន្ត្រីរដ្ឋាភិបាលកម្ពុជា ទទួលបាន គឺក្រុមអាវលឿងថៃ មានផែនការគាបសង្កត់រដ្ឋាភិបាលថៃ មិនឲ្យទទួលយកសេចក្ដីសម្រេចរបស់តុលាការយុត្តិធម៌អន្តរជាតិខាងមុខ៕