ស្ត្រីឈ្មោះ ខៀវ យ៉ុម រស់នៅភូមិជប់គគីរខាងកើត លើតំបន់ខ្នងភ្នំដងរែក បានមានប្រសាសន៍កាលពីរសៀលថ្ងៃសៅរ៍ ទី៥ ខែមីនា ថា កាលពីពេលថ្មីៗ ទាហានថៃបានប្រាប់មកទាហានការពារព្រំដែនខ្មែរនៅតំបន់នោះ ឲ្យប្រាប់ប្រជាពលរដ្ឋខ្មែរមួយចំនួនមិនឲ្យធ្វើការដាំដំណាំអាស្រ័យផលនៅតាមចម្ការដែលប្រជាពលរដ្ឋខ្មែរធ្លាប់តែដាំដុះនោះបានទេ។
ស្ត្រីដដែលបានមានប្រសាសន៍ថា កាលពី២ខែមុន ថៃបានបញ្ជាឲ្យគាត់ដកដំឡូងមីដែលដាំនៅក្នុងចម្ការខ្លះចោល ដោយថា ដើមដំឡូងខ្លះបានដាំចូលទៅក្នុងតំបន់ដែលហាមឃាត់ ៖ «ថៃវាប្រាប់ខ្មែរ ឲ្យខ្មែរហ្នឹងមកប្រាប់ប្រជាជនឲ្យដកដើមដំឡូង។ ថៃវានិយាយផ្ទាល់ជាមួយខ្ញុំថា ចាប់ពីត្រឹមផ្លូវមុខផ្ទះខ្ញុំទៅជើងមិនឲ្យដាំដុះអីទេ មិនឲ្យធ្វើផ្ទះតទៅទៀត។ ម្សិលម្ង៉ៃ (៣ មីនា) មក ១៨នាក់ដើរល្បាតនៅក្រោយផ្ទះខ្ញុំប្រហែលជា ១០ម៉ែត្រ»។
ប្រភពពីប្រជាពលរដ្ឋបានឲ្យដឹងថា មានអ្នកភូមិខ្មែរប្រហែលជា ៤គ្រួសារ ដែលមានដីចម្ការនៅជិតបន្ទាត់ព្រំដែន ហើយត្រូវទាហានថៃ ហាមឃាត់មិនឲ្យដាំដំណាំ។
ចំណែកកងទាហានខ្មែរដែលកំពុងប្រចាំការពារព្រំដែននៅតំបន់នោះ បានទទួលស្គាល់ថា ទាហានថៃ ពិតជាបានហាមឃាត់ប្រជាពលរដ្ឋខ្មែរមួយចំនួនមិនឲ្យដាំដំណាំនៅតាមចម្ការរបស់គេខ្លះដែលនៅជិតៗបន្ទាត់ព្រំដែនមែន ចាប់តាំងពីអំឡុង ២ខែមុនរហូតមកដល់ពេលនេះ ៖ «នៅក្នុងដីខ្មែរតែទាំងអស់ហ្នឹងឯង! បើគិតតាមផែនទីវាមានដំណាំធ្វើតាំងពីជំនាន់ខ្មែរក្រហមនៅនោះ តែប្រជាពលរដ្ឋគ្នាដាំដំឡូងដាំអីទៅវាមិនឲ្យដាំ។ វាមិនបានមកដកដំឡូងទេ វាគ្រាន់តែថា ឲ្យយើងដកចេញ តែយើងមិនទាន់បានដកទេ។ តែសម្រាប់ការដាំដុះដូចជាម្ទេសក្ដីបន្តិចបន្តួចបាន តែដាំកើត រ៉ៃកើតហិកតារមិនបានទេ»។
អាជ្ញាធរខេត្តឧត្តរមានជ័យ បានឲ្យដឹងថា គេធ្លាប់បានទទួលការប្ដឹងពាក់ព័ន្ធនឹងបញ្ហានេះពីភាគីថៃ តាំងតែពីកាលជាង ២ឆ្នាំ មុនមកម្ល៉េះ ក៏ប៉ុន្តែអាជ្ញាធរខ្មែរបានប្រកាន់ជំហរថា បញ្ហានោះសូមឲ្យរក្សាស្ថានភាពដូចដើម នៅពេលដែលគណៈកម្មការព្រំដែននៃប្រទេសទាំងពីរមិនទាន់បានបញ្ជាក់ថា កន្លែងណាជាទឹកដីខ្មែរ និងកន្លែងណាជាទឹកដីថៃ ឲ្យបានច្បាស់លាស់ទេនោះ។
លោក វ៉ាត ប៉ារ៉ានីន នាយករដ្ឋបាលសាលាខេត្តឧត្តរមានជ័យ បានមានប្រសាសន៍ថា លោកសូមបដិសេធចោលចំពោះសកម្មភាពដែលទាហានថៃ បានហាមឃាត់មិនឲ្យប្រជាពលរដ្ឋខ្មែរដាំដំណាំក្នុងចម្ការនៅជិតៗបន្ទាត់ព្រំដែនដើម្បីចិញ្ចឹមជីវិតនោះ ពីព្រោះតែពេលបច្ចុប្បន្នការកំណត់ព្រំដែននៃប្រទេសទាំងពីរមិនទាន់បានធ្វើឡើងដោយគណៈកម្មការជាតិទទួលបន្ទុកព្រំដែននៃប្រទេសទាំងពីរនៅឡើយទេ ដូច្នេះលោកយល់ថា ចំពោះការធ្វើចម្ការរបស់ប្រជាពលរដ្ឋទាំងសងខាងដែលនៅជិតៗបន្ទាត់ព្រំដែន គឺសូមឲ្យនៅធ្វើបានដដែលដរាបណាគណៈកម្មការព្រំដែនខ្មែរ-ថៃ មិនទាន់បានបញ្ជាក់ឲ្យច្បាស់លាស់ត្រង់ណាជាដីខ្មែរ ត្រង់ណាជាដីថៃ ច្បាស់លាស់នៅឡើយនោះ។
លោក វ៉ាត ប៉ារ៉ានីន មានប្រសាសន៍បញ្ជាក់ដូច្នេះ ៖ «គំនិតរបស់ខ្ញុំគិតថា អ្វីដែលប្រជាជនយើងធ្លាប់គ្រប់គ្រងធ្លាប់អាស្រ័យផលពីមុនមក សូមឲ្យគាត់អាស្រ័យផលកន្លែងដដែលចុះ។ ចង់និយាយថា សូមឲ្យរក្សាភាពដើម។ នៅពេលណាដែលគណៈកម្មការវាស់វែងព្រំដែនរវាងប្រទេសទាំង២ កម្ពុជា-សៀម បានកំណត់រួចទើបយើងអនុវត្តន៍ទៅតាមការកំណត់របស់ថ្នាក់ជាតិនៃគណៈកម្មការវាស់វែងព្រំដែននេះ»។
មន្ត្រីសាលាខេត្តឧត្តរមានជ័យ បានឲ្យដឹងថា គេនឹងអញ្ជើញអភិបាលស្រុកបន្ទាយអំពិល ឲ្យមករាយការណ៍បញ្ហានោះ ដើម្បីធ្វើជារបាយការណ៍ជូនបន្តទៅថ្នាក់ជាតិ និងរិះរកវិធានការដោះស្រាយមួយដ៏សមស្របជូនប្រជាពលរដ្ឋខ្មែរដែលកំពុងមានបញ្ហាទាំងនោះ៕