ការ​បង្កើត​កិច្ច​ព្រមព្រៀង​នាំ​ចេញ​អង្ករ​កាតែល​រវាង​អាស៊ាន​អាច​នឹង​បរាជ័យ

ក្រុម​អ្នក​នាំ​ចេញ​អង្ករ​កម្ពុជា បាន​បង្កើត​ជា​សហព័ន្ធ​អ្នក​នាំ​ចេញ​អង្ករ ពាក់​កណ្ដាល​ឆ្នាំ​២០១២ ដើម្បី​សម្រួល​បែប​បទ និង​បង្កើន​ការ​នាំ​ចេញ​អង្ករ ដើម្បី​ទទួល​បាន​តម្លៃ​ខ្ពស់​លក់​នៅ​លើ​ទីផ្សារ​អន្តរជាតិ។ តាម​រយៈ​សក្ដានុពល​នេះ ក្រុមហ៊ុន​នាំ​ចេញ​អង្ករ​ធំៗ​លើ​ពិភពលោក គ្រោង​នឹង​បង្កើត​កិច្ច​ព្រមព្រៀង​អ្នក​នាំ​ចេញ​អង្ករ​ទាំង​អស់ ដែល​ហៅ​ថា កាតែល (Cartel)។
ដោយ អាន ស៊ីថាវ
2012-11-27
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ទំនិញ១
កម្មករ​កំពុង​សំអាត​អង្ករ​សម្រាប់​លក់​ឲ្យ​អតិថិជន។
AFP Photo

កត្តា​សំខាន់​នៃ​ការ​បង្កើត​កិច្ច​ព្រមព្រៀង កាតែល នេះ គឺ​ជៀស​វាង​ការ​ប្រកួត​ប្រជែង​គ្នា​រវាង​អ្នក​នាំ​ចេញ ឬ​អ្នក​ផលិត​អង្ករ​នៅ​ក្នុង​តំបន់ ហើយ​លទ្ធផល​ចុង​ក្រោយ​នឹង​ធ្វើ​ឲ្យ​អ្នក​នាំ​ចេញ​អង្ករ​ទាំង​នោះ​លក់​អង្ករ​នៅ​លើ​ទីផ្សារ​អន្តរជាតិ​កាន់​តែ​មាន​តម្លៃ​ខ្ពស់។

ប្រទេស​នាំ​ចេញ​អង្ករ​ចំនួន​ប្រាំ ដែល​គ្រោង​នឹង​បង្កើត​កិច្ច​ព្រមព្រៀង​នេះ​ឲ្យ​បាន​មុន​ឆ្នាំ​២០១៣ រួម​មាន​ប្រទេស​កម្ពុជា ឡាវ ថៃ វៀតណាម ភូមា (មីយ៉ាន់ម៉ា)។

យោង​តាម​គេហទំព័រ​មីយ៉ាន់ម៉ា​ថែម (Myanmar Time) ដែល​ចេញ​ផ្សាយ​នៅ​ដើម​ខែ​តុលា ឆ្នាំ​២០១២ ថា ប្រទេស​សមាជិក​អាស៊ាន​ចំនួន​៥ ដែល​មាន​សក្ដានុពល​នាំ​ចេញ​អង្ករ​ខ្លាំង​លើ​ពិភពលោក នឹង​បង្កើត​កិច្ច​ព្រមព្រៀង​កាតែល នៃ​អ្នក​នាំ​ចេញ​អង្ករ​នៅ​ក្នុង​តំបន់​អាស៊ាន ដើម្បី​បង្កើន​តម្លៃ​នាំ​ចេញ​អង្ករ​ប្រមាណ ១០% នៅ​លើ​ទីផ្សារ​អន្តរជាតិ។ ទោះ​យ៉ាង​ណា ក្រៅ​ពី​ការ​បង្កើន​តម្លៃ​នាំ​ចេញ គឺ​ការ​បង្កើន​គុណភាព​អង្ករ​នៃ​ប្រទេស​ដែល​ចូល​ជា​សមាជិក​កិច្ច​ព្រមព្រៀង​ពាណិជ្ជកម្ម​នីមួយៗ។

ប្រធាន​សហព័ន្ធ​អ្នក​នាំ​ចេញ​អង្ករ​កម្ពុជា លោក​ឧកញ៉ា គឹម សាវុធ មាន​ប្រសាសន៍​ថា កិច្ច​ព្រមព្រៀង​នេះ​នឹង​ធ្វើ​ឲ្យ​កម្ពុជា ជា​ពិសេស​អ្នក​កែច្នៃ​នាំ​ចេញ​អង្ករ​ចំណេញ​ជា​ច្រើន ដូច​ជា​ការ​ទទួល​បាន​ព័ត៌មាន​ទីផ្សារ ការ​បែង​ចែក និង​ការ​កំណត់​ថ្លៃ​លក់​អង្ករ​នៅ​លើ​ទីផ្សារ​អន្តរជាតិ៖ «យើង​អាច​ចែក​រំលែក​ព័ត៌មាន​ទីផ្សារ​ទៅ​វិញ​ទៅ​មក ព្រោះ​កាល​ណា​យើង​ប្រជុំ យើង​ត្រូវ​និយាយ។ យើង​ត្រូវ​មាន​របាយការណ៍​នាំ​ចូល​ប៉ុន្មាន អ៊ីចឹង​យើង​គួរ​លក់​ទៅ​ប្រទេស​នោះ​ប៉ុន្មាន តម្លៃ​ប៉ុន្មាន លក់​ទៅ​អ៊ីរ៉ាក់ តម្លៃ​ប៉ុន្មាន។ អ៊ីចឹង​ពេល​ប្រជុំ យើង​មាន​របាយការណ៍ នឹង​អាច​ចែក​រំលែក​ព័ត៌មាន​ទៅ​វិញ​ទៅ​មក នឹង​អាច​ជួយ​កំណត់​តម្លៃ​លក់​របស់​យើង។ ខ្ញុំ​គិត​ថា ជា​រឿង​ល្អ ព្រោះ​អី​មាន​អ្នក​ខ្លះ​គោរព​មិន​បាន ១០០% ក៏​អ្វី​ដែល​យើង​បាន​ធ្វើ​វា​ល្អ​ជាង​យើង​អត់​ធ្វើ»

លោក​ឧកញ៉ា គឹម សាវុធ មាន​ប្រសាសន៍​បន្ត​ថា ការ​បង្កើត​កិច្ច​ព្រមព្រៀង​នៃ​អ្នក​នាំ​ចេញ​អង្ករ​កម្ពុជា បាន​ផ្ដល់​ផល​វិជ្ជមាន​ច្រើន​សម្រាប់​ប្រទេស​កម្ពុជា ជា​ពិសេស​អ្នក​នាំ​ចេញ​អង្ករ​ជាង​ផល​អវិជ្ជមាន។

ទោះ​បី​ជា​ការ​បង្កើត​កិច្ច​ព្រមព្រៀង​នាំ​ចេញ​រួម​គ្នា​នេះ នឹង​ធ្វើ​ឲ្យ​អ្នក​ផលិត ឬ​អ្នក​នាំ​ចេញ​ទទួល​បាន​ផល​ប្រយោជន៍​ក៏​ដោយ ប៉ុន្តែ​អ្នក​ប្រើប្រាស់​ជាក់​ស្ដែង​នឹង​ខាត​បង់​តាម​រយៈ​ការ​ឡើង​ថ្លៃ​ទំនិញ​ទាំង​នោះ ហើយ​អ្នក​ប្រើប្រាស់​ផ្ទាល់​នៅ​ក្នុង​ប្រទេស​នីមួយៗ នឹង​ខាត​បង់​ដែរ​តាម​រយៈ​ការ​ឡើង​ថ្លៃ​ទំនិញ។

អ្នក​វិភាគ​សេដ្ឋកិច្ច លោក ហេង ឌីណា មាន​ប្រសាសន៍​ថា កិច្ច​ព្រមព្រៀង​កាតែល ជា​ពិសេស​កិច្ច​ព្រមព្រៀង​នៃ​អ្នក​នាំ​ចេញ​អង្ករ​នៅ​ក្នុង​តំបន់ នឹង​ធ្វើ​ឲ្យ​អ្នក​ប្រើប្រាស់​អង្ករ​នឹង​ខាត​បង់ និង​ជះ​ឥទ្ធិពល​កាន់​តែ​អាក្រក់​ថែម​ទៀត​ដល់​អ្នក​ក្រីក្រ។ លោក ហេង ឌីណា បញ្ជាក់​ទៀត​ថា ប្រទេស​នីមួយៗ​អាច​មាន​វិធានការ​សម្រាប់​អ្នក​នាំ​ចេញ​នៅ​ប្រទេស​នីមួយៗ​ទប់​ស្កាត់​ចំពោះ​ផល​ប៉ះពាល់​នេះ៖ «នៅ​ក្នុង​ប្រទេស​នីមួយៗ រដ្ឋាភិបាល​គាត់​អាច​ចាត់​វិធានការ​សម្រាប់​ការពារ​ប្រជាជន​ដែល​ជា​អ្នក​ប្រើប្រាស់ តែ​បើ​លក្ខណៈ​អន្តរជាតិ​គ្មាន​យន្តការ​ណា​ដែល​ស័ក្ដិសិទ្ធិ ឬ​ដាក់​កំហិត​ថា​ប្រទេស​ណា​មួយ​មិន​អាច​ចង​ក្រង​គ្នា​ជា​កាតែល បាន​ទេ»

ទោះ​ជា​យ៉ាង​ណា កិច្ច​ព្រមព្រៀង​នេះ​អាច​នឹង​បរាជ័យ ដោយ​សារ​តែ​ប្រទេស​វៀតណាម ជា​អ្នក​នាំ​ចេញ​អង្ករ​ដ៏​ធំ​លើ​ពិភពលោក​មួយ នឹង​មិន​ចូល​រួម ដោយ​សារ​តែ​ប្រទេស​វៀតណាម មាន​ភាព​ប្រកួត​ប្រជែង​ស្រាប់​នៅ​លើ​ទីផ្សារ​ពិភពលោក។ ម៉្យាង​វិញ​ទៀត ប្រទេស​មួយ​ចំនួន​មិន​បាន​រៀបចំ​បទ​បញ្ញត្តិ​សម្រាប់​គ្រប់គ្រង​នៅ​ឡើយ។

ការ​ស្រាវ​ជ្រាវ​ដោយ​ក្រុម​ប្រឹក្សា​ធញ្ញជាតិ​អន្តរជាតិ ប្រចាំ​ប្រទេស​អង់គ្លេស បាន​ប៉ាន់ស្មាន​ថា ចំណែក​ទីផ្សារ​របស់​ប្រទេស​វៀតណាម និង​ថៃ នឹង​ធ្លាក់​ចុះ​ប្រមាណ ៣០% នៅ​ឆ្នាំ​២០១២ នៅ​ពេល​ដែល​ប្រទេស​ឥណ្ឌា ក្លាយ​ជា​ប្រទេស​អ្នក​នាំ​ចេញ​អង្ករ​ធំ​ជាង​គេ​លើ​ពិភពលោក ហើយ​ការ​បង្កើត​កិច្ច​ព្រមព្រៀង​រួម​គ្នា ដែល​ហៅ​ថា​កាតែល នេះ ដើម្បី​ឆ្លើយ​តប​ទៅ​នឹង​ការ​កើន​ឡើង​ចំណែក​ទីផ្សារ​អង្ករ​របស់​ឥណ្ឌា នៅ​លើ​ពិភពលោក។

ទោះ​ជា​យ៉ាង​ណា គម្រោង​បង្កើត​កាតែល នឹង​បរាជ័យ​ដោយ​សារ​តែ​ប្រទេស​នីមួយៗ​មិន​ចូល​រួម។ ក្នុង​នោះ ការ​នាំ​ចេញ​អង្ករ​របស់​វៀតណាម មាន​តម្លៃ​ថោក​ជាង​ប្រទេស​ជិត​ខាង ចំពោះ​ប្រទេស​ថៃ ចរចា​ចង់​បាន​តម្លៃ​ខ្ពស់ ហើយ​ប្រទេស​អ្នក​នាំ​ចេញ​អង្ករ​ផ្សេងៗ កំពុង​រង់ចាំ​មើល​នៅ​ឡើយ​ក្នុង​ការ​បង្កើត​កិច្ច​ព្រមព្រៀង​ពាណិជ្ជកម្ម​នាំ​ចេញ​អង្ករ​នេះ។

គេហទំព័រ​របស់​វ៉លស្រ្តីត ចឺណល (Wall Street Journal) ចេញ​ផ្សាយ​នៅ​ខែ​សីហា បង្ហាញ​ថា បញ្ហា​ប្រឈម​ផ្សេងៗ​ទៀត​នៃ​ការ​បង្កើត​កាតែល នេះ នឹង​បង្ក​ឲ្យ​មាន​ការ​តវ៉ា​ប្រឆាំង​ពី​សំណាក់​អ្នក​ប្រើប្រាស់​អង្ករ​ជាក់​ស្ដែង ជា​ពិសេស​នៅ​ក្នុង​ប្រទេស​ឥណ្ឌូនេស៊ី និង​ហ្វីលីពីន ហើយ​បើ​គម្រោង​នេះ​ទទួល​ជោគជ័យ​វិញ នឹង​ធ្វើ​ឲ្យ​ប្រជាជន​ច្រើន​លាន​នាក់​នឹង​ធ្លាក់​ចូល​ក្នុង​ភាព​ក្រីក្រ។

រដ្ឋមន្ត្រី​ក្រសួង​ពាណិជ្ជកម្ម លោក ចម ប្រសិទ្ធិ ធ្លាប់​មាន​ប្រសាសន៍​ថា សហប្រតិបត្តិការ​ជា​ផ្លូវ​ការ​រវាង​ប្រទេស​សមាជិក​អាស៊ាន​ប្រាំ នៃ​ការ​បង្កើត​កិច្ច​ព្រមព្រៀង​កាតែល ត្រូវ​បាន​ផ្អាក ដោយ​សារ​តែ​ប្រទេស​មួយ​ចំនួន​មិន​ទាន់​បាន​ឆ្លើយ​តប​នៅ​ឡើយ។

យ៉ាង​ណា​ក៏​ដោយ អ្នក​វិភាគ​កសិកម្ម​យល់​ឃើញ​ថា បញ្ហា​គ្រោះ​ទឹក​ជំនន់ គ្រោះ​រាំង​ស្ងួត និង​គ្រោះ​ធម្មជាតិ​នានា ធ្វើ​ឲ្យ​ខូច​ខាត​ដល់​ដំណាំ​កសិកម្ម និង​បាន​ជំរុញ​ឲ្យ​តម្លៃ​បាន​កើន​ឡើង។ អ្នក​វិភាគ​ទាំង​នោះ​បាន​បង្ហាញ​ទៀត​ថា ទោះ​បី​ជា​គ្មាន​គម្រោង​បង្កើត​កាតែល នេះ​ក៏​ដោយ ក៏​តម្លៃ​កសិផល​កសិកម្ម ជា​ពិសេស​តម្លៃ​អង្ករ បាន​កើន​ឡើង​ប្រមាណ ៥% រៀង​រាល់​ឆ្នាំ​ដែរ។

របាយការណ៍​របស់​អង្គការ​កសិកម្ម និង​ចំណី​អាហារ​ពិភពលោក (FAO) ប្រចាំ​ឆ្នាំ​២០១២ បាន​បង្ហាញ​ថា ប្រទេស​ថៃ វៀតណាម កម្ពុជា ឡាវ ភូមា បាន​នាំ​ចេញ​អង្ករ​នៅ​លើ​ទីផ្សារ​ពិភពលោក​ប្រមាណ ២០​លាន​តោន​រៀង​រាល់​ឆ្នាំ ដែល​តំណាង​ឲ្យ ៧០% នៃ​ការ​នាំ​ចេញ​សរុប៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល