ការទាមទារនេះធ្វើឡើងតាមរយៈលិខិតលើកទី២ទូលថ្វាយព្រះមហាក្សត្រនៃប្រទេសកម្ពុជា ក្នុងឋានៈជាប្រធានឧត្តមក្រុមប្រឹក្សាអង្គចៅក្រម និងលោក ឌិត មន្ទីរ ប្រធានក្រុមប្រឹក្សាវិន័យឧត្តមក្រុមប្រឹក្សាអង្គចៅក្រម និងអ្នករាយការណ៍ពិសេសនៃឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា កាលពីថ្ងៃទី១២ តុលា ឆ្នាំ២០០៩ ដោយស្នើសុំឲ្យផ្អាកជាបណ្តោះអាសន្នតួនាទីរបស់លោក ថោ សារ៉ន ជាចៅក្រមស៊ើបសួរក្នុងគ្រប់ករណីទាំងឡាយពាក់ព័ន្ធទៅនឹងការដណ្តើមយកដីជនជាតិដើមភាគតិចដោយក្រុមហ៊ុនឌីអឹមហ្គ្រូប។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបញ្ជាក់ពីការទាមទារ ៖ «ដរាបណាយើងអត់ធ្វើការស៊ើបអង្កេតនិងអនុវត្តតាមច្បាប់ត្រឹមត្រូវ អាហ្នឹងគឺយើងអនុញ្ញាតឲ្យចៅក្រមគ្រប់ទីកន្លែងជិះសេះលែងដៃ ហើយអំពើពុករលួយនៅក្នុងប្រព័ន្ធតុលាការនៅតែមានខ្ពស់ដដែល»។
វិទ្យុអាស៊ីសេរីមិនអាចទាក់ទងលោក ថោ សារ៉ន ដើម្បីអធិប្បាយសេចក្តីចោទនោះបាននៅឡើយទេ។
យោងតាមឯកសារដែលវិទ្យុអាស៊ីសេរីទទួលបានពីមជ្ឈមណ្ឌលសិទ្ធិមនុស្សកម្ពុជា លិខិតច្បាប់ចម្លងរបស់ខុទ្ទកាល័យក្រសួងព្រះបរមរាជវាំង ព្រះមហាក្សត្រ នរោត្តម សីហមុនី កាលពីថ្ងៃទី២៤ កញ្ញា ឆ្នាំ២០០៩ បានឡាយព្រះហត្តលេខាលើព្រះលិខិតមក លោក អង្គវង្ស វឌ្ឍនា សមាជិកឧត្តមក្រុមប្រឹក្សាអង្គចៅក្រម និងជារដ្ឋមន្ត្រីក្រសួងយុត្តិធម៌ ឲ្យពិនិត្យលើការទាមទាររបស់មជ្ឈមណ្ឌលសិទ្ធិមនុស្សកម្ពុជានោះ ហើយលិខិតនោះមជ្ឈមណ្ឌលសិទ្ធិមនុស្សកម្ពុជាទើបបានទទួលនៅថ្ងៃទី១៣ តុលា ឆ្នាំ២០០៩។
លោក គឹម ស៊ូភារិទ្ធ អ្នកតំណាងរាស្ត្រនៃគណបក្សសមរង្ស៊ីបានគាំទ្រការស្នើសុំនោះ។ លោកបញ្ជាក់ថា លោក អង្គវង្ស វឌ្ឍនា រដ្ឋមន្ត្រីក្រសួងយុត្តិធម៌ អះអាងនៅក្នុងកិច្ចប្រជុំរដ្ឋសភាក្នុងការត្រួតពិនិត្យអនុម័តច្បាប់ព្រហ្មទណ្ឌដោយឆ្លើយតបទៅនឹងសំណួរអ្នកតំណាងរាស្ត្រគណបក្សសមរង្ស៊ីថា លោកនឹងធ្វើការស៊ើបអង្កេតករណីលោក ថោ សារ៉ន នោះ។
លោក គឹម ស៊ូភារិទ្ធ បានថ្លែងថា ៖ «ខ្ញុំនឹងចូលរួមនៅពេលណាខ្លះទៀត ប្រសិនបើការងារហ្នឹងមិនបានអនុវត្ត?»។
គួរបញ្ជាក់ដែរថា ភាពមិនប្រក្រតីរបស់លោក ថោ សារ៉ន ដែលបានមជ្ឈមណ្ឌលសិទ្ធិមនុស្សរកឃើញរួមមាន បានស្នើសុំដីជាថ្នូរនឹងការដោះលែងអ្នកភូមិជនជាតិដើមទំពូនដែលត្រូវបានឃុំខ្លួនដោយសារតែប្រឆាំងការតវ៉ាការដណ្តើមដីដោយក្រុមហ៊ុនឌីអឹមហ្គ្រូប, ធ្វើឱសានវាទឲ្យលោក ប៉ែន ប៊ុណ្ណារ៍ មន្ត្រីសម្របសម្រួលសមាគមការពារសិទ្ធិមនុស្ស អាដហុក ចាកចេញពីខេត្តរតនគិរី ឬប្រឈមមុខនឹងការចោទពីបទញុះញង់ឲ្យមានភេរវកម្មដោយសារបានគាំទ្រអ្នកភូមិ, ប្រើប្រាស់រថយន្តដែលរឹបអូសបានដោយប៉ូលិសក្នុងអំឡុងស៊ើបអង្កេតករណីប្លន់ធ្វើឲ្យមនុស្ស៣នាក់ស្លាប់, មានឈ្មោះជាម្ចាស់កម្មសិទ្ធិលើដីទំហំ៣ហិតារដែលជាកម្មសិទ្ធិរបស់ជនជាប់ចោទក្នុងរឿងក្តីបង្ករបួសស្នាម និងបានហ៊ុមព័ទ្ធយកដីតំបន់ព្រៃឈើកម្មសិទ្ធិសាធារណៈរបស់រដ្ឋ៕