តំណាងអ្នកភូមិនៅឃុំជីខក្រោម ស្រុកស្រែអំបិល ចំនួន៣៤គ្រួសារ នៅថ្ងៃព្រហស្បតិ៍ ទី២៦ សីហា បាននាំគ្នាបន្តការតវ៉ាដោយធ្វើការចែកញ្ញាត្តិដល់អ្នកដំណើរនៅតាមផ្លូវជាតិលេខ៤៨ ដែលភ្ជាប់ពីស្រុកស្រែអំបិល ទៅខេត្តកោះកុងប្រយោជន៍ទាមទារឲ្យមានការដោះស្រាយវិបត្តិដីធ្លី ក្រោយពីជម្លោះរ៉ាំរ៉ៃមួយនេះ បានអូសបន្លាយអស់ជាច្រើនឆ្នាំមកហើយ។
ប្រភពពីក្រុមសិទ្ធិមនុស្សបានឲ្យដឹងថា អ្នកតវ៉ាខ្លះ គឺជាតំណាងសហគមន៍មកពីខេត្តនានា ហើយដែលពួកគាត់បានជួបនូវការបាត់បង់ដីធ្លីដែរនោះ បានចូលរួមបន្ថែមជាមួយអ្នកភូមិនៅឃុំជីខក្រោម ដើម្បីសំដែងការតវ៉ានេះដែរ។
តំណាងអ្នកភូមិ អ្នកស្រី ផាវ ញ៉ើង អាយុ ៣៥ ឆ្នាំ បានព្រមានថាពួកគេនឹងបន្តការតវ៉ារហូតដល់មានដំណោះស្រាយ។
បាតុកម្មអហិង្សាដោយធ្វើការចែកញ្ញាត្តិទាមទាររបស់អ្នកភូមិ បានធ្វើឡើងផងដែរក្រោយពីមានការប៉ះទង្គិចគ្នា រវាងអ្នកភូមិ និងកម្មកររបស់ក្រុមហ៊ុន ហេងហ៊ុយ កាលពីថ្ងៃពុធកន្លងទៅ ដែលនាំឲ្យអ្នកភូមិម្នាក់រងរបួសធ្ងន់ នៅគ្រាដែលអ្នកភូមិបានចូលហាមប្រាមក្រុមហ៊ុន មិនឲ្យធ្វើការឈូសឆាយ។
លោក អ៊ុច ឡេង មន្ត្រីសមាគមសិទ្ធិមនុស្សអាដហុក បានសំដែងថា នេះជាទំនាស់រ៉ាំរ៉ៃ ដោយសារតែអាជ្ញាធរមិនព្រមដោះស្រាយ ប៉ុន្តែផ្ទុយទៅវិញ អាជ្ញាធរបែរជាចូលរួមជាមួយក្រុមហ៊ុន ដើម្បីការពារក្រុមហ៊ុនដណ្ដើមយកដីអ្នកភូមិទៅវិញ។
អភិបាលស្រុកស្រែអំបិល លោក ទួន សីលា មិនជំទាស់នូវបាតុកម្មរបស់អ្នកស្រុកទេ ដោយអះអាងថា អ្នកស្រុក អាចមានសេរីភាពក្នុងការបញ្ចេញមតិ។ លោកបញ្ជាក់ទៀតថា តុលាការជាអ្នកដោះស្រាយរឿងនេះ មិនមែនសមត្ថកិច្ចរបស់លោកទេ។
ទំនាស់នៅភូមិព្រែកជីក ឃុំជីខក្រោម ស្រុកស្រែអំបិល រវាងអ្នកស្រុក៣៤គ្រួសារ និងក្រុមហ៊ុន ហេងហ៊ុយ លើដី ជាង១០០ហិកតារបានកើតឡើងចាប់តាំងពីឆ្នាំ២០០៧មក។ អ្នកស្រុកបានអះអាងថា ពួកគេមានប័ណ្ណកម្មសិទ្ធកាន់កាប់ដីទាំងនោះ ហើយលោក ហេងហ៊ុយ វិញបានឈ្នះក្តី នៅក្នុងការកាន់កាប់ដីធ្លី ឃុំជីខលើ ប៉ុន្តែបែរជាវាតយកដីធ្លីមកដល់ឃុំជីខក្រោមរបស់ពួកគាត់ទៅវិញ។
រីឯអាជ្ញាធរស្រុកវិញបញ្ជាក់ថា លោក ហេងហ៊ុយ បានទិញដីធ្លីមួយចំនួននៅតំបន់នោះ ហើយមួយចំនួនទៀត លោកទទួលបានពីការធ្វើសម្បទានពីរដ្ឋាភិបាល។
បើទោះបីការស្រាវជ្រាវរបស់ក្រុមអ្នកច្បាប់ របស់សហគមន៍ គេបានរកឃើញថា ពលរដ្ឋទាំងនោះ គឺជាម្ចាស់ដីពិតប្រាកដនៅក្នុងការវិវាទនេះ ប៉ុន្តែមកដល់ពេលនេះ បណ្ដឹងរបស់ពលរដ្ឋទៅកាន់តុលាការ មិនមានការដោះស្រាយឡើយ៕