ដីកាកោះហៅចំនួន២បានធ្វើឡើង ដែលចុះហត្ថលេខាដោយចៅក្រម និងព្រះរាជអាជ្ញារង។ ដីកាទី១ បានចុះហត្ថលេខាដោយព្រះរាជអាជ្ញារងនៃតុលាការក្រុងភ្នំពេញ លោក ឯក ឆេងហួត ផ្ញើមកមេធាវីរបស់លោក សម រង្ស៊ី គឺលោក ជូង ជូងី និងដីកាផ្សេងមួយទៀតបានចុះហត្ថលេខាដោយចៅក្រមជូនលោក សម រង្ស៊ី ជាចុងចោទកាលពីសប្ដាហ៍ថ្មីៗនេះ។ ក៏ប៉ុន្តែមេធាវីការពារក្ដីឲ្យលោក សម រង្ស៊ី គឺលោក ជូង ជូងី បានមានប្រសាសន៍ប្រាប់វិទ្យុអាស៊ីសេរី នៅថ្ងៃទី២៦ ខែមីនា ថា លោកនឹងមិនចូលរួមក្នុងសវនាការខាងមុខនោះទេ។
លោក ជូង ជូងី មានប្រសាសន៍ដូច្នេះ ៖ «ព្រោះថារឿងក្ដីនេះគឺកូនក្ដីខ្ញុំ គឺឯកឧត្ដម សម រង្ស៊ី គាត់អត់មានការចាប់អារម្មណ៍។ កាលណាកូនក្ដីខ្ញុំអត់មានការចាប់អារម្មណ៍ ខ្ញុំមិនអាចចូលទៅការពារក្ដីអ្វីទេ។ ក្នុងន័យថា គឺអាស្រ័យលើតុលាការគាត់សម្រេចយ៉ាងម៉េចសម្រេចទៅ ស្រេចទៅលើគាត់ គាត់យល់ថា ក្នុងផ្លូវច្បាប់ធ្វើម៉េចត្រូវ»។
មេធាវីការពារក្ដីឲ្យលោក ហោ ណាំហុង គឺលោក កា សាវុធ បានមានប្រសាសន៍នៅថ្ងៃទី២៦ ខែមីនា ឆ្នាំ២០១១ថា ៖ «ហ្នឹងមានអ្វីពិបាក បើឯកសារមានគ្រប់គ្រាន់អស់ហើយហ្នឹង ជាពិសេសសាលក្រមស្ថាពររបស់ស្រុកបារាំង»។
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង បានប្ដឹងលោក សម រង្ស៊ី មេដឹកនាំគណបក្ស សម រង្ស៊ី កាលពីឆ្នាំ២០០៨ កន្លងទៅ ទៅតុលាការទីក្រុងប៉ារីស ប្រទេសបារាំង និងប្ដឹងទៅតុលាការក្រុងភ្នំពេញ ក្រោមបទចោទថា លោក សម រង្ស៊ី បានផ្សាយព័ត៌មានមិនពិត និងបទបរិហារកេរ្តិ៍ ដោយសារលោក សម រង្ស៊ី បានធ្វើអត្ថាធិប្បាយមួយប្រាប់អ្នកកាសែតនៅថ្ងៃទី១៧ ខែមេសា ឆ្នាំ២០០៨ ដោយបានចោទថា មានមន្ត្រីជាន់ខ្ពស់នៅក្នុងរដ្ឋាភិបាលកម្ពុជា ជាអតីតកម្មាភិបាលខ្មែរក្រហម នៅក្នុងនោះមានរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងការបរទេសកម្ពុជា ដែលជាអតីតប្រធានគុកបឹងត្របែក សម័យខ្មែរក្រហម។
ចំពោះការចោទប្រកាន់នេះ លោក ហោ ណាំហុង ដែលជាឧបនាយករដ្ឋមន្ត្រីដែរនោះ ធ្លាប់បានមានប្រសាសន៍ប្រាប់វិទ្យុអាស៊ីសេរីថា ជារឿងមិនពិត ផ្ទុយទៅវិញ រូបលោកព្រមទាំងគ្រួសារទៅវិញទេ គឺជាអ្នកទោសដែលខ្មែរក្រហមចាប់ឃុំនៅគុកខ្មែរក្រហមបឹងត្របែក នៅអំឡុងពេលខ្មែរក្រហមកាន់អំណាច។ លោកបានបញ្ជាក់ថា លោកមានការឈឺចាប់ដោយសាច់ញាតិរបស់លោកចំនួនជាង ១០នាក់ ត្រូវបានខ្មែរក្រហមយកទៅសម្លាប់។
លោក ហោ ណាំហុង បានឈ្នះក្ដីលើលោក សម រង្ស៊ី នៅឯតុលាការប្រទេសបារាំង កាលពីខែមករា ឆ្នាំ២០០៩ កន្លងទៅ ដោយតុលាការទីក្រុងប៉ារីស ប្រទេសបារាំង បានប្រកាសសាលក្រមកាលពីថ្ងៃទី២៧ ខែមករា ឆ្នាំ២០០៩ ពិន័យលោក សម រង្ស៊ី ជាប្រាក់ចំនួន ១អឺរ៉ូ ដើម្បីសងជំងឺចិត្តលោក ហោ ណាំហុង ក្រោមបទបរិហារកេរ្តិ៍៕